1 Merikɨtsɨ xeitukaritsie, Kunatani Tsahuri nu'aya, yupaapa katiutaxatɨaka, yuparewiwame xeikɨa mɨpaɨ katiniutahɨawe: «Kenaye'a. 'Anutaɨye hikɨmɨ tekananukɨnikuni piritsiteutsixi mematiteitsie». 2 Matsi Tsahuri Kiweya mɨrakutewatsie tetsita pukatei, Mikuruni mɨrakutewatsie, xeime kɨranaru kɨyeyari hetɨa, 'ataxewime tsienituyari kuyaxi hamatɨana meniu'uwakaitɨni. 3 Mawari wewiwame kamixaya 'etsimɨyewa 'Ahiyaxi panakatɨkɨkai 'Akituwi nu'aya, 'Ikawuri 'iwaya kanihɨkɨtɨkaitɨni, Pinexi nu'aya 'Eri teukarieya, Tsiru mɨrakutewatsie mawari wewiwame kanihɨkɨtɨkaitɨni Yawé hetsiemieme.

Peru Kunatani kename hayeyakai nixewitɨ pɨkatimaikai. 4 Para mɨta'anikɨ piritsiteutsixi wahetsɨa, Kunatani huta 'aiyaritsie hixɨatatsie kaniuyeyani, Wutsexi, Tsene 'aiyaritsie mɨtitetewatsie. 5 Mexɨakame tayeta Mikimatsi hɨxie pɨti'anekai, xewitɨta tatsutɨa hepatsie Kehewa hɨxie pɨti'anekai. 6 Hikɨ Kunatani yuparewiwame mɨpaɨ katiniutahɨawe:

—Hikɨmɨ teɨteri Kakaɨyari memɨkamate wahɨxie tekaniuyekɨnikuni, Yawé ketatsiparewieka, mɨkɨ mɨtatsitawikweitsitɨanikɨ pɨkakwaniwe, tsepanetɨ memɨyuwaɨkawa ya'etsimemɨyupaɨme wahepaɨtsita.

7 'Iparewiwame mɨpaɨ katinita'eiya:

—'Aixɨa pɨyɨni, naime 'ekɨ yaketineuyuri kepemɨtiku'eriwa, neta nepɨnewaɨriya nemɨmatsiparewienikɨ.

8 Kunatani mɨpaɨ kaniutayɨni:

—'Aixɨa kani'aneni. Para memɨtatsihexeiyakɨ hakewa mematiteitsie mana tekananukɨnikuni. 9 Xɨka mɨpaɨ metatehetahɨawe: “Temɨxehanuku'axekɨ xeketaneukwewi”, mana tekanitahayewakuni tepɨka'uhuni. 10 Perutsɨ xɨka mɨpaɨ metatehetahɨawe: “'Ena xekenatikɨni”, matsi tekaniuhukuni, mɨkɨ 'inɨari kanayeimɨkɨ Yawé kemɨtatiparewieni temɨtehayu'iwakɨ.

11 Hikɨ mɨkɨ yuhutatɨ mekaniyu'eirieni piritsiteutsixi memɨwaxeiyakɨ.

Hikɨ piritsiteutsixi mɨpaɨ mekateniuhiwa:

—Neuxei hepɨrayutsixi kememɨteheyu'awietatɨkatei terɨta mekanitsutɨakari mewayekɨkatɨ.

12 Merikɨte kuyaxi tehɨwemete Kunatani mekaniutahiwieni meta 'iparewiwameya:

—'Ena xekenatikɨni, tepɨtehayexeiya tepɨtexetaxatɨani.

Kunatani yuparewiwame mɨpaɨ katiniutahɨawe:

—Ne'utɨma keneumieni, Yawé 'ixaheritsixi temɨtehayu'iwakɨ kataniupitɨani.

13 Kunatani 'aitsie pukuwieretɨya meta 'iparewiwameya kaniweiyakaitɨni. Kunatani piritsiteutsixi mɨwaratixɨrɨwakai 'iparewiwameya pɨwatakukuyakairi. 14 Kunatani yuparewiwame hamatɨa xeitewiyari piritsiteutsixi mekaniwarukwini 'etsimakuyewatsie, matɨari me'uyutakwika mɨya mekateniuyurieni.

15 Hikɨ Kakaɨyari kwie kaniutayuitɨani. Kuyaxi piritsiteutsixi mekanimamakaitɨni yunaitɨ kememɨyupaɨmekai mana memɨkutekai. Mɨkɨ yunaitɨ mekaniutimamani tehɨwemete meta kuyaxi yukukuyamete. 16 Kiweya paitɨ Wenikamini kwieyaritsie Tsahuri kuyaximama memɨtaneniere tehɨwemete mekaniwaruxeiya kuyaxi piritsiteutsixi memakuteitsie, memamatɨ mekaniyuta'unakaitɨni yuxexuitɨ. 17 Hikɨ 'ayumieme Tsahuri yukuyaxima mɨpaɨ katiniwarutahɨawe: «Xekeniwaruti'inɨata tame kemɨ'ane mepeuyewetse». Mɨpaɨ mekateniuyurieni, Kunatani meta parewiwameya meheuyewetɨ mekanakɨne.

18 Hikɨ Tsahuri 'Ahiyaxi kaniuta'aitɨani Kakaɨyari kakunieya memakwenikɨ. ('Ana tɨratu kakuniyari 'ixaheritsixi wahetsɨa kaniukateitɨni). 19 Mexi 'akuxi tikuxatakai piritsiteutsixi mematiteitsie waɨkawa matsi kwinimieme katiniuyɨni, 'ayumieme Tsahuri mawari wewiwame mɨpaɨ katiniutahɨawe: «Tsepari matsi keneuhayewa».

20 Hikɨ Tsahuri yukuyaxima kaniwarukuxeɨrieni yunaitɨ mekanayekɨne meyutakwinike. Piritsiteutsixi mepɨkayumaiwawekai matsi yɨkɨmana mekaniuyutikwitɨkɨne. 21 Merikɨtsɨ meripaitɨ hipatɨ hepɨrayutsixi piritsiteutsixi memɨwarutinɨkai, 'ana wahamatɨa memɨtitekai piritsiteutsixi memayuxeurietsie, 'ana Tsahuri meta Kunatani wahetsɨa pɨta mekanekɨne 'ixaheritsixi mekaniwarutinɨni. 22 'Epɨrahini hɨriyaritsie memɨyuti'awietakai hipatɨ 'ixaheritsixi, kepauka memɨte'utamari kename piritsiteutsixi meheyuta'unakai, me'uyukuxeɨrieka mekanekɨne mewareparewienike mekaniwarutinɨni. 23 'Ana tukaritsie Yawé 'ixaheritsixi mɨpaɨ katiniwarutawikweitsitɨani, Weti-'Aweni paitɨ mekaniye'axɨani meyukwitɨwetɨ.

24 Merikɨtsɨ kuyaxi 'ixaheritsixi waɨkawa mekaneuhakakwikukaitɨni, Tsahuri mɨpaɨ mutayɨkaikɨ Kakaɨyari hɨxie kuyaxi wahetsiemieme: «Kakuyɨriwekaku 'akuxi kemɨ'ane mɨtikwani mɨkɨ Yawé 'axake'iyurieni, memɨnetsi'aye'unie nekawara'iwawekaku 'akuxi». 'Ayumieme xewitɨ tɨma 'ana tukaritsie kuya pɨkatikwakai.

25 Yeuta me'uye'axɨaka, mɨpaɨ metenetimani kename kwiepa xiete xuawekai. 26 Kepauka makukɨyexiyatsie hipatɨ memu'axɨa, mɨpaɨ meteniuneniere xiete waɨkawa kanixuawekaitɨni, peru nixewitɨ pɨkayuwaɨri meme'inɨatakɨ mɨyamutayɨkaikɨ Tsahuri memamatɨ. 27 Merikɨte Kunatani yupaapa pɨka'u'eniekai kemutayɨkai yukuyaxi wahetsiemieme, kɨye makwekai 'utatseraka xiete mayema 'utseka kanekwani. 'Ana yapauka yuhɨxie hayexawatɨtɨ kanayani. 28 Hikɨ kuya xewitɨ mɨpaɨ katinitahɨawe:

—'Apaapa mɨpaɨ kaniutayɨni Kakaɨyari hɨxie kuyaxi tahetsiemieme: “'Axake'u'itɨarieni kemɨ'ane 'ikɨ tukaritsie tixaɨtɨ mɨtitakwani”. 'Ayumieme kuyaxi mekaniyehakakwitɨweni.

29 Kunatani mɨpaɨ kaniutayɨni:

—Nepaapa mɨkɨ niukikɨ waɨkawa 'axapɨtatsi'uyuri, neuxei kepauka xiete 'etsiwa nema'inɨataxɨtsie nehayexawatɨtɨ nekanayani nehɨxie. 30 Matsitsɨ kuyaxi kemeyɨnikekai xɨka memɨtatsi'aye'unie wa'ikwai me'utikwanike, matsi piritsiteutsixi waɨkawa tepɨwakwinikekai.

31 'Ixaheritsixi mɨkɨ tukaritsie piritsiteutsixi mekaniwarukwini Mikimatsi me'iyetsutɨaka 'Ayaruni paitɨ mekaniye'axɨani, kuyaxi mepɨkayɨwawekairi hakakɨ. 32 'Ayumieme piritsiteutsixi watewama mekaniwarutiwiya. Muxatsi, wakaitsixi, tsikerutsixi, mewaratixɨrieka mekaniwaranutixitexɨani, wai mekaniutikwani 'ayexuxureme memɨyumexɨitɨakaikɨ. 33 Merikɨte hipatɨ Tsahuri mekateniutaxatɨani:

—Yawé hepaɨtsita 'akuyaxi 'axamepɨteheyurie, wai mekanekwaka 'ayexuxureme.

Tsahuri mɨpaɨ kaniutayɨni:

—'Axateyuruwamete xekanihɨkɨtɨni. Hikɨ kwitɨwa tete xekenakurupa 'amɨnena 'ena xekenene'atɨiri.

34 Mɨpaɨta katiniwarutahɨawe:

—Xekenehu yunaime kuyaxi mɨpaɨ xeketenewaretahɨawi yuxexuitɨ tuurutsixi, yumuxatsi mekaniwa'atɨaxɨakuni para temɨwakwinikɨ 'ena tekaniwatikwaikuni, meta 'ari wai xuxureme mepɨkahekwakari, Yawé hɨxie 'axamepɨkateheyuriekari.

'Ana tɨkariyaritsie kwitɨwa yutuurutsixi yuxexuitɨ mekaniwa'atɨaxɨani, mana mekaniwarukwini. 35 Hikɨ Tsahuri mana mawari taiyame Yawé hetsiemieme kaniutawewieni. 'Ikɨ mawari taiyame mexɨakame mieme kanayani mitawewi. 36 Mɨpaɨta katiniwarutahɨawe yukuyaxima:

—Piritsiteutsixi wa'utɨma hikɨ yɨwikɨta tekaniyehuni. Kakahekɨariwekaku 'akuxi, naime tita memɨtehexeiya tekateniwarenawairiekuni, meta nixeime tepɨkahehayewa 'ayeniereme.

Kuyaximama mɨpaɨ mekatenita'eiya:

—Kehapaɨ matsi 'aixɨa mɨyɨni yaketineuyuri.

Mawari wewiwame mɨpaɨ kaniutayɨni:

—Kakaɨyari meri matsi teta'iwawiyame.

37 Merikɨte 'ayumieme Tsahuri Kakaɨyari kaniuta'iwawiya: «¿Piritsiteutsixi netiwaranukuweiya? ¿'Ixaheritsixi wahetsɨa petiwayetuani?» Perutsɨ 'ana Kakaɨyari pɨka'ita'ei. 38 'Ayumieme Tsahuri mɨpaɨ kaniutayɨni:

—Xeme yunaitɨ kuyaxi tewa'aitɨwamete 'ahurawa xekenakɨni, xeme hikɨ xekeneutinieri kemɨ'ane 'axapɨtiuyuri.

39 Yawé meta 'ixaheritsixi mɨtatsiwikweitsitɨwame munierixɨ kanihɨkɨtɨni tsepa xɨka Kunatani neniwe hetsie tiunake, pɨkatinenimayatsieni kanimɨmɨkɨ.

'Ana nixewitɨ pɨkayuwaɨriyaxɨ yamɨtayɨnikɨ. 40 'Ayumieme 'ixaheritsixi yunaime mɨpaɨ katiniwarutahɨawe:

—Xeme huma xekeneti'uti, tameta 'ena pɨta tekaniti'uikuni neniwe Kunatani hamatɨa.

Mɨkɨ mɨpaɨ mekatenita'eiya:

—'Ekɨtsɨ kehepaɨ 'aixɨa mɨyɨni yaketineuyuri.

41 Hikɨ Tsahuri Yawé kaniutawawirieni 'Ixaheri Kakaɨyarieya, kemɨ'ane wahetsie pɨtinakekai. Kememɨteyuta'iwaxɨ Tsahuri Kunatani wahetsie katiniunake, 'iya matsi mexɨxɨnitɨ meniyuhayewa. 42 Hikɨ Tsahuri mɨpaɨ kaniutayɨni:

—Hikɨta neniwe Kunatani matɨa teniyuta'iwakɨni.

Matsi Kunatani hetsie katiniunake. 43 'Ayumieme Tsahuri mɨpaɨ katinitahɨawe:

—Kepetiuyuri kenetineutaxatɨa.

Kunatani mɨpaɨ kaniutayɨni:

—Puyuri xiete nepa'inɨataxɨ 'etsiwa nekɨye kɨtsie 'ukaime. ¿'Ayumiemeri mɨkɨkɨ netimɨni?

44 Tsahuri mɨpaɨ katinitahɨawe:

—Xɨka 'ekɨ Kunatani peka'ɨmɨni, Kakaɨyari kenetiukwinitɨani kanetsinenimayatɨ.

45 Hikɨ kuyaxi Tsahuri mɨpaɨ mekateniutahɨawe:

—Kehapaɨtɨtɨ Kunatani pumɨni, mɨkɨ tiuyurieku matsi 'ixaheritsixi tepɨtehayu'iwaxɨ, tepɨtemate Yawé kemɨrayeniere, meta yaxeikɨa tepɨtemate nixewitɨ tɨma kɨpaya kwiepa pɨkakawiwieni, Kakaɨyari 'iparewiekaku ke'aixɨa mɨtiuyuri.

Merikɨte Kunatani kemɨtimɨnikekai menitawikweitsitɨani. 46 Tsahuri piritsiteutsixi waranukuweiyake katiniuhayewa, 'ayumieme hipatɨ yukwieyaritsie mepakunuaxɨa piritsiteutsixi.

47 Kepauka Tsahuri 'aixɨa muyuyuri mɨti'aitanikɨ 'ixaheritsixi wahetsie, Tsahuri memaye'unie yunaime kaniwarutikwitɨyani 'ahurawa memɨtitekai, muhawitsixi, 'amunitsixi, 'erumitsixi, Tsuwa kwieyaritsie te'aitamete meta piritsiteutsixi, mɨkɨ yunaime pɨwara'iwakai, 48 waɨkawa tɨrɨkariya mepexeiyakai. Metatsiere 'amarekitsixi kaniwara'iwa, meta hipame 'ixaheritsixi kaniwarutawikweitsitɨani kepauka metenawatsiyarietɨwekaku.

49 Merikɨtsɨ Tsahuri yuhaikame yuniwema 'ukitsi kaniwarayexeiya: Kunatani, 'Itsiwi meta Marikitsuha. Yuhutame meta 'ukari kaniwarayexeiya: Merawi 'amɨyumate pɨtitewakai, Mikari 'etsimɨyumate. 50 'Akinuhani 'ɨyaya pɨhɨkɨtɨkai 'Akimatsi nu'aya. Kuyaxi mutiwa'aitɨakai 'Awinexi pɨhɨkɨtɨkai Nexi nu'aya, Tsahuri tatatsieya. 51 Kihitsi, Tsahuri paapaya meta Nexi, 'Awinexi 'ukiyarieya, mɨkɨ yuhutatɨ 'Awiheri mepɨniwemamatɨkai.

52 Kepauka Tsahuri mɨti'aitakai puyumienekai piritsiteutsixi wahamatɨa kwinimieme. 'Ayumieme kepauka Tsahuri xeime mɨxeiya tɨrɨkaɨyeme, mɨkɨ kaniwaruta'iniwakaitɨni kuya hetsiena mieme mayanikɨ.