1 Hikɨ Rawiri Nuwi mɨrakutewatsie kaneyani mawari wewiwame 'Akimereki heu'iwatamieka, hikɨ Rawiri 'uxeiyaka kaniutimani.

Mɨpaɨ katinita'iwawiya:

—¿Titayari 'axaɨta pereyetɨa? ¿Kehapaɨtɨtɨri xewitɨtɨma pɨkamatsi'aweiya?

2 Mɨpaɨ katinita'eiya Rawiri:

—Ti'aitame netsihetanɨ'aku nepeyetɨa, titakɨ mɨnereyenɨ'a nixewitɨ tɨma mɨpaɨ pɨkatimaika. Neteɨterima 'ari yanepɨtiwaretahɨawixɨ hakewa temetakaxeiya. 3 ¿Tita tikwaiwame perexeiya? Paa 'auxɨwime keneneumikwa, yatsepa tita tawarita pemɨrexeiyani.

4 Mawari wewiwame mɨpaɨ kaniutayɨni:

—Paa kwaiwame nepɨkahexeiya. Paa tukita mieme mɨpatsie xeikɨa nekameniumiweni, xɨka xeikɨa 'ateɨterima 'ukarawetsixi mekawarekumaɨwani meta 'ekɨ.

5 Rawiri mɨpaɨ katinita'eiya:

—Tame matsi kepauka temayekɨka hurawa tekaniyukahɨweni ta'ɨitama tepɨkawakumaɨwa. Matsi hikɨ teewa temetanɨ'arie tekanitahɨkatɨtɨri.

6 Hikɨ mawari wewiwame Rawiri paa mɨpatsie kaniyetuirieni, hipatɨ mumawekaikɨ. Mɨkɨ paa pɨhɨkɨtɨkai Yawé hɨxie memɨwakatɨkɨkai, hipame pɨta hehekwame xɨxɨkame meneutiyatsakaitɨniri tukaritsie mieme.

7 Hikɨ mɨkɨ tukaritsie xewitɨ muwa kaniyeyeikakaitɨni Tsahuri hetsɨa ti'uximayatame Yawé tukita kani'iwatakaitɨni. Mɨkɨ 'erumi tewiyari kanihɨkɨtɨkaitɨni Ruheki pɨtitewakai, muxatsi wahɨwemete Tsahuri hetsɨa miemete tiwa'aitɨwame pɨhɨkɨtɨkai.

8 'Arikeketa Rawiri 'Akimereki kaniuta'iwawiya:

—¿Tepɨa pitsikayari pekarexeiya yatɨni 'ixipara? Ti'aitame mexɨima kanenetanɨ'ani, ne'ixipara nemakwenikekai nepɨkaheyɨwekaxɨa yaxeikɨa tihipame.

9 Mawari wewiwame mɨpaɨ katinita'eiya:

—Kuriyati piritsiteu tewiyari 'ixiparaya xeikɨa nepexeiya, 'Era mayeweritsie pemími. Mana kanakani 'ixurikikɨ kani'eimeni, mawari wewiwame kamixaya warie kanakukani. Xɨka pe'awaɨriyani pemeikweni kaniyɨweni, 'ixiparate hipame nepɨkahexeiya.

Rawiri mɨpaɨ kaniutayɨni:

—Keneneukweitɨa, mɨkɨ 'aixɨa kaniyɨmɨkɨ.

10 Hikɨ Rawiri 'ana tukariyaritsie, Tsahuri hepaɨtsita 'akuxi kaniyu'unarɨmekaitɨni, Kahati kiekariyaritsie kaneyani, mana ti'aitame 'Akihitsi hetsɨa kanekuyeixɨani. 11 'Akihitsi mɨpaɨ mekateniutahɨawe 'iparewiwametemama:

—¿'Ikɨ Rawiri katihɨkɨ naitsarie kwiepa ti'aitame? ¿Mɨkɨ katihɨkɨ kɨmanaya memɨte'utinei, mɨpaɨ mete'ukwitɨ:

12 Hikɨ Rawiri mɨkɨ tiu'enieka, kaniutimani waɨkawa 'Akihitsi hepaɨtsita, Kahati kiekariyaritsie ti'aitame. 13 Hikɨ 'ayumieme kepauka memiwiyarɨmekai, meuyuyehɨani hepaɨ kaniuyɨni, kanitsutɨani yɨmɨireme wahɨxie 'axayɨanetɨ tawekame hepaɨ 'itupari kanitixutsinakaitɨni 'aɨrikayatɨ.

14 Hikɨ 'ayumieme 'Akihitsi yuparewiwamete mɨtiwa'aitɨa mɨpaɨ katiniwarutahɨawe:

—¿Neuxei perutsɨ xekateyuku'ɨwiya? Pɨtawe mɨkɨ tewi. ¿Titayari xenete'atɨiri? 15 ¿'Akuxi meteheuyewetse memɨtarɨwe, merikɨte titayari xete'i'atɨa nehɨxie 'axamɨtiyɨnikɨ? Neuxei neparatsiyuta xekenanuyehɨwa.