1 Merikɨtsɨ Tsipi kiekatari Kiweya mekanekɨne Tsahuri mɨpaɨ metetaxatɨanike:

—¿Ti'aitame petimate, Rawiri Kakira yemuriyaritsie makumawe 'aurie meyu'awieta?

2 Hikɨ 'ayumieme Tsahuri kuyaxi kaniwarukuha'aritɨani haika miriyari 'ixaheritsixi mɨwaranayexei, Tsipi makumawetsie kanakayune Rawiri kuwaunetɨ. 3 Kakira yemuriyaritsie mekaniyuhayewa, makumawe hɨxie huye 'aurie. Hikɨ Rawiri makumawe 'uyeikatɨ, mɨpaɨ katinetimani kename Tsahuri 'iweiyakai, 4 'awie nenieremete kaniwarenɨ'ani hakewa meyeikakai timaimɨtɨ. 5 Hikɨ Tsahuri manuyeika kaneyani meta hakewa mehupukai katinetimani, yaxeikɨata 'Awinexi Nexi nu'aya kuyaxi tiwa'aitɨwame. Tsahuri hupaitɨ kanayekateitɨni, waritana naitsarie kuyaxi mekana'utɨkateitɨni. 6 Hikɨ 'ayumieme Rawiri 'Akimereki heti tewiyari meta 'Awitsahi Tsariwiya nu'aya Kuhawi 'iwaya kaniwaruta'iwawiya:

—¿Kemɨ'ane nehamatɨa puyuwaɨriya Tsahuri manuka temuhukɨ?

'Awitsahi mɨpaɨ kaniutayɨni:

—Ne 'ahamatɨa nekanimieni.

7 Merikɨte Rawiri 'Awitsahi hamatɨa 'ana tɨkariyaritsie mana mekaniye'axɨani, Tsahuri mekaniuxeiya mana mematiteitsie wahixɨapa kutsume, manutimu'utsie yupitsika 'uketɨ. 'Awinexi kuyaxi tiwa'aitɨwame 'auriena kaniukateitɨni kuyaxita wawarita mekanaheitɨkateitɨni.

8 'Awitsahi Rawiri mɨpaɨ katiniutahɨawe:

—Hikɨ Kakaɨyari matsiyetuirie mɨmatsi'aye'unie. Nemimienikɨ keneneupitɨa. Pitsikayakɨ nekanenukatseixɨamɨkɨ, xeimieme nekatiniyuriemɨkɨ, pɨkaheuyeweka tawarita.

9 Hikɨ Rawiri 'Awitsahi mɨpaɨ katiniutahɨawe:

—Pepɨka'ikumemiwani, Yawé pɨka'ihayewa matsi pi'uximatɨani kemɨ'ane menayexei mɨmieni.

10 Tawarita mɨpaɨ kaniutayɨni:

—Kaniyuritɨni Yawé kemɨrayeyuri, mɨkɨtɨtɨ kanimiemɨkɨ. Yatɨni yɨkɨmana kanimɨmɨkɨ, yayumienetɨ kanemieriemɨkɨ. 11 Merikɨte Yawé ne kenetsiparewieka, para menayexei hetsie 'axanemɨkatiyurienikɨ, pitsikaya xeikɨa keneutikwe'i meta tekɨxieya haa muyema manutimu'utsie muwe keneutihani, kɨmɨ tekaniyehuni.

12 Hikɨ Rawiri yukɨmana pitsika kaniutikweni meta tekɨxi haa muyema, Tsahuri manutimu'utsie muwekai hikɨ mekanekɨne. Nixewitɨ matsi pɨkawaruxei nixewitɨ 'atsipɨkaretima yunaitɨ mekanikutsukaitɨni. Yawé waɨkawa mɨwareukutsitɨakɨ. 13 Hikɨ Rawiri 'anutaɨye kananuyani yemuritsiepai kaneutiyani, manari 'apautatewakai Tsahuri mematiheteitsie. 14 'Ayumieme kuyaxi kaniwarutahiwieni meta 'Awinexi Nexi nu'aya:

—'Awinexi. ¿Penere'enie?

'Awinexi kanita'eiya:

—¿Kemɨ'ane pepetaine ti'aitame pemehiwie?

15 Merikɨte Rawiri kanita'eiya:

—'Awinexi, heiwa xeniu 'ekɨ kuya 'aixɨa pemɨ'ane petihɨkɨtɨni 'Ixaheri kwieyaritsie pemɨmariwa. ¿Titayari hikɨ mati'aitɨwame pekati'ɨwiyakai? Matsi nematinitaxatɨamɨkɨ xewitɨ kuya mana 'ahetsɨa kanitahani ti'aitame miemɨtɨ.

16 Kepemɨtiuyuri 'aixɨa pɨka'ane, kaniyuritɨni Yawé kemɨrayeyuri. 'Ekɨ matsi peuyewetse pemumɨnikɨ meta 'akuyaxima tixe'aitɨwame xemɨka'uta'ɨwiyaxɨkɨ Yawé menayexei. Tsiparatsɨ ¿hakewa ti'aitame pitsikaya pewe, meta haa muyema tekɨxi manutimu'ukai muwekai?

17 Merikɨte Tsahuri Rawiri niukieya hetimaika, mɨpaɨ kaniutayɨni:

—Rawiri neniwe, 'ekɨ peretaine.

Rawiri mɨpaɨ katinita'eiya:

―Huu neti'aitɨwame ne nekaniutaineni. 18 ¿Titayari neti'aitɨwame mati'uximayatsiriwame penetiuweiya? ¿Kekuta netiuyuri? ¿Ketitakɨkuta 'axanetiuyuri? 19 Hikɨ 'ekɨ ti'aitame nemaniwawirieka pemɨnetsi'enienikɨ. Xɨka Yawé tiyurieneni, 'ekɨ ti'aitame pemɨnetsi'aye'uniekakɨ, kenereuyehɨwirieka Yawé meta nemawarika kenaki'erieka. Mexɨka teɨteri meteyurieka, Yawé 'axakewaruyurieni, mekanenayeweweiyani 'ena kwie Yawé mɨnetsi'uxatɨatsie mɨpaɨ menetekɨhɨawetɨ, hipame pɨta kakaɨyarixi tiwa'uximayatsiriwame mekanenayeitɨwani. 20 Hikɨ matsi 'ekɨ 'aixɨa pɨkayɨni, pemɨnetsi'uweiya penetsimiemɨtɨ. ¿Titayari 'Ixaheri kwieyaritsie ti'aitame penetiwaune tepɨ nemɨhɨkɨtɨni hepaɨ, yanutsutɨni xɨ'au 'ɨtsita kiekame hepaɨ? Ne nemaniwawirieka 'ekɨ 'ateewa pemɨkanetsikumemiwanikɨ Yawé kanierekaku.

21 Hikɨ Tsahuri mɨpaɨ kaniutayɨni:

—Ne 'axanepɨtiuyuri, Rawiri neniwe nehetsɨa kenenua. Nepɨkamatikwinitɨaniri. 'Ekɨ matsi pepɨkanetsi'umi pepɨnereuyehɨwiri, ne matsi nemɨka'uka'iyarini hepaɨ nepɨyɨane.

22 Hikɨ Rawiri mɨpaɨ katinita'eiya:

—'Ekɨ ti'aitame, 'apitsika 'ena puwe, xeime kenetanɨ'a mati'uximayatsiriwame mekweimiekɨ. 23 Merikɨte Yawé tame taxexuime ketarakapitɨani heitseriemekɨ kemɨtiyupitɨwa, yurikɨ kemaine. Yawé hikɨ pɨnetsi'atɨakai hakewa nemɨyɨwekai nemɨmatsimienikɨ, ne matsi nepɨkanewaɨri 'ekɨ Yawé matsi'anayexei pemɨhɨkɨkɨ. 24 Hikɨ mɨpaɨ nepɨretima 'atukari waɨkawa pɨraye'akai, Yawé hikɨtane netukari raye'akame kehayeitɨaka meta kenetsiwikweitsitɨaka naimekɨ kenemɨtiuka'eniwa.

25 Tsahuri mɨpaɨ katinita'eiya:

—Merikɨte Rawiri 'aixɨa peke'itɨarieka. Mariwemekɨ 'ekɨ pekatiniyurimɨkɨ, pekatinayu'iwakamɨkɨ naimekɨ.

Hikɨ Rawiri kaneyani meta Tsahuri yuparatsiyuta kaneyani.