1 Papuru, Tsiriwanu meta Timuteu,

tekanixewaɨritɨaka xemɨyutixexeɨriwa tetsarunikatari Kakaɨyari mɨta'ukiyaritsie xetewiyatɨ, Ti'aitame Ketsutsi Kɨritsitu hetsieta xetewiyatɨ:

'Aixɨa mekete'u'iyarini xehetsiemieme, mekexepitɨaka yu'iyaritsie xemɨka'uximatɨariekakɨ.

2 Taheyemekɨ pamɨpariyutsi tekanipitɨaka Kakaɨyari yunaime xehetsiemieme, texehaxaxatatɨ kepauka temɨtatinenewiwa. 3 Tekatehayewatɨ yatetena'eriwani kexemɨteyurie yuri xete'erietɨ, kexemɨte'uximaya xeteyukanaki'erietɨ, kexemɨte'uka'eniwa xe'ikwewietɨ Tati'aitɨwame Ketsutsi Kɨritsitu, takakaɨyari ta'ukiyari hɨxie.

4 Neuxei ne'iwama Kakaɨyari mɨxenaki'erie, tepɨtemate mɨkɨ pɨxe'anayexei, 5 mɨpaɨ tepɨtemate taniuki 'aixɨa manuyɨne xehetsɨa pɨkanua niukikɨ xeikɨa, matsi meta tɨrɨkariyakɨ punua, 'Iyari Mɨtiyupatakɨ punua, yurikɨ tetetamaikaku punua. Xeme xepɨtemate xetsata ketemɨ'anenekai xehetsiemieme. 6 Xeme xetatsi'ɨketɨ xenakɨne, Ti'aitame meta xe'ɨketɨ xepakɨ, xepitanaki'eri niuki waɨkawa xe'uximatɨarietɨwetɨ, xeyutemamawietɨ tsiepɨre 'Iyari Mɨtiyupata kemɨtixetemawieriya. 7 Mɨpaɨ xeyɨatɨ 'ɨkitsika xekanakɨne yunaime yuri memɨte'erie Matseruniya meta 'Akaiya kiekatari wahetsiemieme. 8 Xehetsɨa putiraurɨka Ti'aitame niukieya, Kakaɨyari hetsie yuri kexemɨte'erie xeme, Matseruniyatsie 'Akaiyatsie xeikɨa pɨkatikuxaxatsiwa, matsi naitsarie katinikuxaxatsiwani, 'ayumieme tixaɨri pɨkareuyewetse tame temɨtiniunikɨ. 9 Mɨkɨtɨtɨ tahepaɨtsita mekatenikuxatani ketɨtɨ reyɨ kepauka tame xehetsɨa temeta'axɨa, kereyɨ kepauka xemɨte'uhayewaxɨ, kepauka Kakaɨyari hetsie xemɨte'uwiyaxɨ kakaɨyarixi xewaruku'eirieka, xemɨte'uximayakakɨ Kakaɨyari mayeyuri yurikɨ 'amuyeika hetsiemieme, 10 xemikwewiekakɨ Nu'aya taheima makaneni, Kakaɨyari yuniwe manukuketɨa mɨkite watsata, Ketsutsi kanihɨkɨtɨni kemɨ'ane mɨtatsi'utawikweitsitɨa haxɨa maye'axime mɨkatatsi'axekɨ.