1 'Ikɨ niuki yurikɨ paine, kemɨ'ane ti'ɨwiyame mayeimɨkɨ, mɨkɨ 'uximayatsika 'aixɨa mɨ'ane pɨhiwe'erie. 2 'Ayumieme kaneuyeweka ti'ɨwiyame hetsie tixaɨtɨ mɨkarahɨiwanikɨ tsepa mutaxanetsie, xeime hɨkɨa 'ukaratsi pawitɨkɨni, pɨyumaika, pɨtimaiweni, 'aixɨa pɨtixeiyarieka, pɨwanaki'erieka tewanarixi, pɨti'ɨkitaweni, 3 tawekame pɨkahɨkɨtɨni meta pɨkawatiwayani, tumini pɨkahiwe'erieka, matsi pɨka'ayu'eriyani, pɨkayumieneni, 4 'aixɨa 'anemekɨ pɨtiwa'aitɨaka yukie kiekatari meta yɨtɨriyama pɨwarexeiyani tiwa'aitɨatɨ naimekɨ meta 'aixɨa 'anemekɨ mepei'enieka, 5 kemɨ'ane 'atsimɨkatimate yukie kiekatari mɨtiwa'aitɨakakɨ, ¿keri tiwa'ɨwiyani memɨyutixexeɨriwa Kakaɨyari hetsɨa miemete? 6 Xike yuri mɨtiuta'eri pɨkahɨkɨtɨni, kapa 'uyuta'ɨreme kauyumarie hepaɨ 'uximatɨarika 'upitɨarieni. 7 Kaneuyeweka yuri memɨkate'erie 'aixɨa memɨte'ihekɨatanikɨ kapa 'axatiuxeiyarieme kauyumarie winiyarieyatsie 'uyukahɨani.

8 Yaxeikɨata teparewiwamete, peuyewetse mɨpaɨ memɨ'anenenikɨ, 'aixɨa mepɨtekahuni, yurikɨ mepɨtekuxatani, mepɨkatarɨwetɨweni, tumini mepɨkahiwe'erieka meteyukwamanakutɨ, 9 wa'iyari 'itiyatɨkaikaku kawatate'akaku mepi'ɨwiyani niuki matsiɨkɨtɨ mayeitɨarie titatsie yuri temɨte'erie. 10 Mɨkɨta yaxeikɨa wahepaɨ meke'uta'inɨatsieni meri xɨka meyɨwaweni, 'arike teparewiwamete meke'akɨne xɨka wahetsie karahɨiwani. 11 Yaxeikɨata wa'ɨitama 'aixɨa mepɨtekahuni, niuki peraixi mepɨkayɨaka, mepɨyukemaka meta heitseriemekɨ yamepɨtekahuni naimekɨ. 12 Tiparewiwame xeime hɨkɨa yɨ'ɨya pawitɨkɨni, meta 'aixɨa 'anemekɨ yɨtɨriyama ketiwa'aitɨaka meta yukie kiekatari. 13 Kemɨ'ane tiparewiwamekɨ yemekɨ memeye'atɨa yɨhɨritɨarika, mɨkɨ mepɨte'iwa 'aixɨa memɨtexeiyarienikɨ, meta meyuyetuatɨ yuri memɨte'eriekɨ Kɨritsitu Ketsutsi hetsie.

14 Tsepanetɨ kwitɨwa 'ahetsɨa nemeyeikani, 'ipaɨ nepɨmati'utɨirie, 15 mexɨka nekahenuaweni, ketinemaika kemɨreuyewetse kehepaɨ mɨtiuyeikani Kakaɨyari kie kiekatari watsata, mɨkɨ mekanihɨkɨtɨni memɨyutixexeɨriwa Kakaɨyari mayeniere hetsɨa miemete, muka'utɨka meta tsutɨmeyari tita yuri mɨraine. 16 Mɨpaɨ katinihekɨaka, pɨmariwe mɨkɨ niuki matsiɨkɨtɨ matɨa, ketemɨteheyexeiya Kakaɨyari manuyɨne: