10
'Ixaheri kwieyaritsie te'aitamete kememɨteyutihutarixɨ
(2Kem 10:1-11 – 1Te 12:1-24)
1 Hikɨ Xuwuhani kaneyani Tsikeni paitɨ, mana yunaitɨ 'ixaheritsixi memeyuxeɨriekaikɨ ti'aitame memeyeitɨanikɨ. 2 Hikɨ mɨkɨ hepaɨtsita Keruwuhani Nawati nu'aya katiniutamarieni, 'ayumieme 'Ekipitu kanakunuani, mana kaneyakaitɨni meripaitɨ ti'aitame Tsarumuni 'ayemakatɨ. 3 Kepauka 'ixaheritsixi kɨmana memɨte'utanɨ'a mɨ'atɨarie, hikɨ mɨkɨ meta yunaitɨ 'ixaheritsixi mekanekɨne Xuwuhani hetsɨa mɨpaɨ mekatenitahɨawe:
4 —'Apaapa kwinimieme raheteme yuku pɨtatsi'utitɨtɨa teka'ikemakame. Hikɨri 'ekɨ ha'exanime ketaneutitɨtɨa te'ikemakame, keyuri 'apaapa mɨtatsi'utitɨtɨa, hikɨ 'ana tepɨmateta'uximayatsirieni.
5 Xuwuhani mɨpaɨ katiniwarutahɨawe:
—Xekeneuhuni hikɨ, peru xekenayenexɨa haika tukari 'anukayayu.
Hikɨ kepauka teɨteri memekɨ, 6 ti'aitame Xuwuhani kaniwaruta'iwawiya 'ukirawetsixi paapaya Tsarumuni mayeyurikaitsie memɨparewiekai. Mɨpaɨ katiniwaruta'iwawiya:
—¿Kexehaitɨka xeme, kenetiwata'eiya 'ikɨ teɨteri?
7 Mɨkɨ mɨpaɨ mekaniutiyuani:
—Xɨka 'ekɨ ti'aitame 'aixɨa petiuka'iyarikamɨkɨ 'ikɨ teɨteri wahetsiemieme, xɨka kemɨtiwanake pewaru'enieni, xɨka pewaruta'eiya pewanaki'erietɨ, mɨkɨ mepɨmateta'uximayatsirieni yuheyemekɨ.
8 Peru Xuwuhani 'ukirawetsixi wa'ɨxatsi pɨka'anu'eni kememɨte'itahɨawixɨ, matsi temari pɨtata kaniwaruta'iwawiya hamatɨana memutiwawerixɨ meta 'anari memiparewiekai. 9 Mɨpaɨ katiniwaruta'iwawiya:
—¿Kexehaitɨka xeme, kenetiwata'eiya 'ikɨ teɨteri mɨpaɨ memɨnetekɨhɨawe: “Ha'exanime kenayeitɨa 'apaapa kwinimieme raheteme yuku pɨtatsi'utitɨtɨa teka'ikemakame”?
10 Mɨkɨ temari, hamatɨana memutiwawerixɨ, mɨpaɨ mekatenita'eiya:
—Teɨteri 'ipaɨ memɨmetehahɨawe ti'aitame: “'Apaapa kwinimieme raheteme yuku pɨtatsi'utitɨtɨa, 'ekɨri ha'exanime kenayeitɨa”. Neuxei, 'ipaɨ ketiniwaruta'eiya: “Ne ne'itɨwame 'etsimupe matsi 'akanipani keyuri nepaapa kemanupakai, xɨka nepaapa waɨkawa tixe'uta'uximayatsitɨani, ne matsi tawari waɨkawa nepɨtixeta'uximayatsitɨani. 11 Xɨka mɨkɨ yuku haheteme xe'anutitekirieni, neta matsi waɨkawa nepɨxeti'ikatɨani. Xɨka mɨkɨ xetiwayakaitɨni kɨyekɨ, ne kawayutsixi wawayamekɨ tepɨa manuyatsatɨkakɨ nepɨxetiwani”.
12 Merikɨte hairieka tukari 'aye'aku, kemutayɨkai ti'aitame Xuwuhani, hɨxiena Keruwuhani kaninuani yunaime teɨteri wahamatɨa. 13 Peru ti'aitame Xuwuhani kaniwaruta'eiya tiyukananaimakamekɨ: 'ukirawetsixi wa'ɨxatsi pɨka'anu'eni, 14 matsi temari wa'ɨxatsi pɨta kaniu'enieni. Mɨpaɨ katiniwarutahɨawe: «Xɨka ne'ukiyari yuku haheteme xe'utitɨtɨani, neta matsi waɨkawa nepɨxeti'ikatɨani. Xɨka mɨkɨ xetiwayakaitɨni kɨyekɨ, ne kawayatsixi wawayamekɨ tepɨa manuyatsatɨkakɨ nepɨxetiwani».
15 Ti'aitame teɨteri mɨkawaru'enikɨ, mɨpaɨ pɨtiuyɨ Kakaɨyari yahainekaku. Mɨpaɨ pɨraye'atɨarie Yawé niukieya Keruwuhani Nawati nu'aya kemɨtiutahɨawekai, Kakaɨyari niukameya 'Ahiyaxi Tsiru kiekame Keruwuhani yapɨtiutahɨawekai.
16 Kepauka memɨtehetima kename ti'aitame 'ari kawaru'eni, yunaitɨ 'ixaheritsixi mɨpaɨ mekateniuhiwakaitɨni meyuxewitɨ:
«'Ixaheritsixi teɨteriyari, yunaitɨ yukie xekeneutayeixɨa.
'Ekɨta, Rawiri, 'ahetsɨa miemete xeikɨa keniwarayexeiyani.
Tameri Rawiri hetsɨa tixaɨtɨ tepɨkatehayexeiya.
Tixaɨtɨkuta pɨkatatiyetuirieni 'Itsahi nu'aya».
Hikɨ mekaneutayeixɨani, yuxexuitɨ yukie. 17 Peru mɨyatɨtɨ, Xuwuhani piyeweiyakai ti'aitatɨ 'ixaheritsixi wahetsie Kura kiekariteyaritsie memutetɨkatei. 18 Hikɨ 'arikeke, ti'aitame Xuwuhani 'Arunirani kanenɨ'ani waɨriyarika memɨte'uximaya mɨhɨritɨariekai mɨnierimiekɨ, peru yunaitɨ 'ixaheritsixi tetexikɨ mekaneitituaxixɨani mekanimieni. Hikɨ mexɨiwa ti'aitame 'anutiyerɨka yukaxetatsie kaneyu'una Kerutsareme paitɨ. 19 Hikɨ mɨpaɨ tiuyɨku 'anatɨtɨ 'ixaheritsixi Rawiri nuiwarimama mepuwaruku'eiri, hikɨ yaxeikɨa mepɨ'ane.