1 Merikɨtsɨ tamamata heimana 'atahaika wiyari ti'aitakaku Keruwuhani, 'Awiyaxi ti'aitame kanayani Kura kwieyaritsie, 2 hikɨ Kerutsareme 'ukaitɨ katiniuta'aita haika wiyari. Maamaya Mikahiyaxi pɨtitewakai, 'Uriheri Kiweya kiekame punu'ayatɨkai.

Mɨkɨta mepɨyutikwi 'Awiyaxi matɨa Keruwuhani. 3 Hikɨ memɨyukwiyukɨ, 'Awiyaxi nauka tsienituyari miriyari yukuyaxima kaniwaranayexeiya, yemekɨ memeuyutakwiwawe. Keruwuhani metatsiere 'atahaika tsienituyari miriyari kaniwaranayexeiya yukuyaxima, hikɨ 'aixɨa mekateniuyu'uitɨani memɨwatakwinikɨ.

4 Hikɨ 'Epɨrahini muhɨriyatsie, Tsemarahini yemuriyaritsie 'Awiyaxi 'anutiyaka, mɨpaɨ katiniuhiwa: «Keruwuhani. 'Ixaheritsixi. Yunaitɨ xeme xekeneneu'eni. 5 Xepɨtemate Yawé 'Ixaheri kakaɨyarieya, Rawiri pɨyetuiri 'Ixaheri kwieyaritsie mɨti'aitanikɨ meta nuiwarimama tɨratu puwewi 'atsikayɨweme. 6 Peru, Nawati nu'aya Keruwuhani, Tsarumuni Rawiri nu'aya ti'uximayatsiriwame, kaniku'eirieni 'eye'unietɨ kanayani tiyu'aitɨwame. 7 Hipatɨ teɨteri 'axamete'u'iyaritɨ Xuwuhani Tsarumuni nu'aya mekaniutinɨni, kepauka 'ikɨ mɨtemaikɨtɨkai meta mɨkatɨrɨkaɨyekai, mɨkɨ mepɨka'ipitɨa, pɨka'uyɨwekaxɨa mɨwara'iwa.

8 »Xeme mɨpaɨ xeteku'eriwa hikɨ, xemɨyumɨirekɨ meta tsikerutsixi hurukɨ memɨwewiyatɨka xemɨwarexeiyakɨ, kakaɨyarixi memɨwewiyatɨka Keruwuhani mɨxe'utiwewiri xehe'iwake xeteyu'erie Yawé mɨra'aita, muwayetuiri Rawiri niwemama. 9 Metsɨ xekaniwarayeweiya 'Aruni nuiwarimama, Yawé mawari wewiwametemama memɨhɨkɨ, meta rewitsixi. Mɨkɨ wahetsiemieme hipame mawari wewiwamete xekaniwarutihɨawe, tsepa ke'anetɨ muwa'atɨa xeime tsikeru meta 'atahuta muxatsi 'ukitsi mɨkɨ xekaniwarayeitɨwani mawari wewiwamete memɨkayuri kakaɨyarixi wahetsiemieme, teɨteri Kakaɨyari memɨkamate wahepaɨ xepɨteyurie.

10 »Tame 'apɨta, Yawé tepɨkaku'eiriwawe, mɨkɨ mɨtakakaɨyarikɨ. 'Aruni nuiwarimama yaxeikɨa tamawari wewiwamete mepɨhɨkɨ Yawé memɨte'uximayatsirie meta rewitsixi mepɨhɨritɨarie memɨwaparewiekakɨ tukita. 11 Tukari mɨyehane, ximeri meta taikai, Yawé mepɨtemawirie mawari taiyariyari meta 'ɨkwa witsimu'ɨa mekanitairieka, metatsiere, yareuhanemekɨ taikai paa mɨpatsie mepemaniriwa huru mexayaritsie, meta kɨxeme mepetitaiya 'i'uitɨwame hurukɨ mɨwewiya hetsie muye'u. Tame hɨrixɨa Yawé takakaɨyari tepayexeiya, xeme xemiku'eiri. 12 'Ayumieme Kakaɨyari meta mawari wewiwametemama, tahɨxie mekananuyeteni. Kuxinetate kaniha'aritsieka mɨtihɨtsierienikɨ kepauka temɨxetakwini. 'Ixaheritsixi, Yawé xepɨkamietɨweni, xe'ukiyarima wakakaɨyari, xeme xepɨkayɨwawe xeme'iwa».

13 Keruwuhani 'Awiyaxi mɨkatimaritɨanikɨ, hipame yukuyaxima kuyaxi Kura miemete wa'utɨma kaniwarutanɨ'ani, hipameta wahɨxie pɨta kaniwarutanɨ'ani. 14 Kepauka memanakunenierixɨ Kura kiekatari, mekaniwaruxeiya 'ixaheritsixi mewakwitɨweme wa'utɨa memeu'ukai. Hikɨ 'ana Yawé mekaniutahɨawe, meta mawari wewiwamete kuxineta mekaniutihɨtsieni. 15 Hikɨ kepauka Kura kiekatari karima memutihiwaxɨ memuyutakwinikɨ, 'ana Kakaɨyari Keruwuhani kana'iwa meta 'ixaheritsixi, 'Awiyaxi pɨta kaniupitɨani mɨrayu'iwakɨ meta Kuratsie kiekatari. 16 'Ixaheritsixi mekaniyu'unakukaitɨni, peru Kakaɨyari kaniwayetuani Kuratsie kiekatari memɨwakwinikɨ. 17 'Awiyaxi meta kuyaximama yuwaɨkawame mepɨwareuyehɨa, mekaniwarukwini 'auxɨwime tsienituyari miriyari 'ixaheritsixi kuyaxiyari 'aixɨa memɨ'anene. 18 'Ana tukaritsie 'ixaheritsixi mekana'iwarieni, Kuratsie kiekatari mepɨte'ayu'iwaxɨ Yawé yu'ukiyarima wakakaɨyari hetsie memɨtewiyakaikɨ.

19 'Awiyaxi meta kuyaximama mekaniwaranukuweiya Keruwuhani kuyaximama, hikɨ kaninawairieni kiekarite Weteri, Ketsana meta 'Epɨrahini kiekariyari meta 'auriena mamanetɨka. 20 Keruwuhani tɨrɨkaɨyeme mayuyeitɨani pɨkayɨwekai kepauka 'Awiyaxi mɨti'aitametɨkai. 'Imatɨrieka Keruwuhani Yawé 'iwaku kaniumɨni.

21 'Apɨta 'Awiyaxi matsi waɨkawa tɨrɨkaɨyetɨ kanayani. Yu'ɨitama tamamata heimana nauka kaniwarexeiyakaitɨni, niwemama 'ukitsi xeitewiyari heimana huta mepuyupaɨmekai meta niwemama 'ukari tamamata heimana 'ataxewi mepuyupaɨmekai. 22 Hipatɨta kemɨtiuyɨ 'Awiyaxi ti'aitakaku, meta kemɨtiuyeikakai meta 'uximayatsikaya, katinaka'uka Kakaɨyari niukameya 'Iru xapayatsie.