1 Merikɨtsɨ Kutani kepauka mitsutɨa ti'aitatɨ xeitewiyari heimana 'auxɨwime wiyari pexeiyakai, hikɨ Kerutsareme 'ukaitɨ katiniuta'aita tamamata heimana 'ataxewi wiyari. Maamaya Kerutsa pɨtitewakai Tsaruki nu'aya. 2 Kutani yakatiniuyurieni Yawé kemɨtinake, naimetsie 'ukiyarieya 'Utsiyaxi ke'aixɨa mɨtikatɨa kanenukuweiya, peru Yawé tukita pɨkaheta'axekai. Matsi teɨteri, mepiyeweiyakai 'axameteyurietɨ. 3 Kutani katiniuyurieni Yawé tukieyatsie mieme 'itupari wapaitɨ mieme 'aixɨa muyuri. Metatsiere waɨkawa 'uximayatsika pɨtiuyuri 'Uperi kuraruyari hetsiemieme. 4 Kura hɨriyaritetsie kiekarite kaniutiwewieni, meta kiekarite kuraruyari 'amatitɨtɨ metatsiere tuxiyu kaniutiwewieni hɨritsie paitɨ.

5 Hikɨ Kutani kaniwarutakwini 'amunitsixi, meta kaniwara'iwa. Haika wiyari mekaniuyurieni, 'amunitsixi mete'ikupitɨwatɨ xeiwiyari 'aye'axekaku haika miriyari heimana nauka tsienituyari kiruyari pɨrata, huta miyuniyari heimana huta tsienituyari miriyari kiruyari tɨriku meta tsewara mɨpaɨ tɨriku hepaɨ paɨmeme.

6 Merikɨte Kutani waɨkawa tɨrɨkaɨyetɨ kanayani muyuwaɨrikɨ yamɨtikamienikɨ Yawé yukakaɨyari hetsiemieme.

7 Hipatɨta kemɨtiuyɨ Kutani ti'aitametɨkaku meta kemɨtiyumienekai meta kemɨtikatɨa, katinaka'utɨarieni 'Ixaheri kwieyaritsie te'aitamete meta Kura kwieyaritsie te'aitamete waxapatsie. 8 Kutani pexeiyakai kepauka mitsutɨa ti'aitatɨ xeitewiyari heimana 'auxɨwime wiyari, hikɨ Kerutsareme 'ukaitɨ katiniuta'aita tamamata heimana 'ataxewi wiyari. 9 Kepauka mumɨ, kaniukateukieni Rawiri kiekariena, hikɨ nu'aya 'Akatsi kanitsutɨani 'utɨmana ti'aitatɨ.