1 Merikɨtsɨ Kutsiyaxi kepauka mitsutɨa ti'aitatɨ 'atahaika wiyari kanihɨkaitɨni, Kerutsareme 'ukaitɨ katiniuta'aita xeitewiyari heimana tamamata heimana xewi wiyari. Mɨkɨ maamaya Kerira pɨtitewakai 'Arahiyaxi nu'aya, Wutsikati kiekame. 2 Kutsiyaxi Yawé kemɨtinake katiniuyurieni, naimetsie yakatinikamiekaitɨni, meripaitɨ 'ukiyarieya Rawiri kemɨtikatɨa, nihatsuakɨ pɨka'iku'eiri ni'etsiwatɨma.

3 Merikɨtsɨ tamamata heimana 'atahaika wiyari ti'aitatɨ, ti'aitame Kutsiyaxi xeime kaniutanɨ'ani kemɨtiuyɨ ti'utɨwame Tsapani titewakame 'Atsariyaxi nu'aya Metsurani teukarieya, mumiekɨ Yawé tukita, mɨpaɨ katinitahɨawe: 4 «Kenemie mawari wewiwamete tiwa'aitɨwame hetsɨa Kirikiyaxi, mɨpaɨ ketinehɨritɨa tumini puwaye'ɨni teɨteri memiyetuaya Yawé tukita meta kitenie tehɨwemete memɨwaku'ɨitɨwa. 5 Mɨpaɨ ketineta'aita mɨkɨ tumini memɨhɨritɨarie memɨyetuiriyarienikɨ Yawé tukieya 'aixɨa memɨtewewienikɨ, mɨkɨ memɨtewapitɨanikɨ te'uximayatamete tuki 'aixɨa memuyurieni. 6 Meketewarepitɨani kɨyexikɨ memɨteheuta'uximayatawawe, te'ɨkitamete mɨkɨ 'uximayatsika hepaɨtsita miemekɨ meta 'ixumawamete, metatsiere kɨyexi mekehetinaneni meta tetexi mɨxixiyatɨka tuki 'aixɨa mɨ'itɨarienikɨ. 7 Peru kemɨ'ane memɨhɨritɨarie mɨkɨ memɨtewapitɨanikɨ xepɨkatewawawirieka, karikɨ mɨkɨ mekateni'uximayaka heitseriemekɨ».

8 Metatsiere Kirikiyaxi mawari wewiwamete tiwa'aitɨwame, kemɨtiuyɨ ti'utɨwame Tsapani mɨpaɨ katiniutahɨawe: «Xapa nekaniutaxeiya 'inɨari niukiyari maye'uxa Yawé tukita». Hikɨ Tsapani kaniyetuirieni, hikɨ mɨkɨ 'ekaterɨwaka, 9 kaneyani ti'aitame hetsɨa katinitaxatɨani:

—'Ahetsɨa miemete te'uximayatamete tumini mekaniwaye'ɨni Yawé tukita, meta mekaniyetuiriyarieniri te'uximayatamete memɨhɨritɨarie tuki 'aixɨa memukuyuruwakai.

10 Meta kemɨtiuyɨ ti'utɨwame Tsapani, ti'aitame katiniutaxatɨani kename mawari wewiwamete tiwa'aitɨwame Kirikiyaxi xapa 'iyetuiriekai, hikɨ 'ana kanekaterɨwa hɨxiena.

11 Hikɨ ti'aitame kepauka mi'eni 'inɨari niukiyari, 'ana yukamixa kaneukatsana, 12 meta mɨpaɨ mawari wewiwame Kirikiyaxi katiniuta'aitɨani, meta 'Akikani Tsapani nu'aya, meta 'Akuwuxi Mikahiyaxi nu'aya, meta Tsapani kemɨtiuyɨ ti'utɨwame, metatsiere 'Atsahiyaxi 'ahurawa ti'uximayatsiriwame, mɨpaɨ katiniwarutahɨawe:

13 —Xekenehu Yawé xekeneta'iwawiya nehetsiemieme meta teɨteri wahetsiemieme, metatsiere naime Kura kwieyari hetsiemieme, 'ikɨ xapa mutaxeiyarie mɨyamɨre'uxakɨ. Yurikɨ Yawé kaniha'akari tahepaɨtsita, ta'ukiyarima memɨka'enu'enikɨ 'ikɨ xapa kemɨre'uxa meta mɨpaɨ memɨkate'uyurikɨ kemɨre'ukai meripaitɨ tahetsiemieme.

14 Hikɨ Kirikiyaxi mawari wewiwame meta 'Akikani, 'Akuwuxi, Tsapani meta 'Atsahiyaxi, mɨkɨ mekanekɨne 'uka Kakaɨyari niukameya Hurira hetsɨa, Kerutsareme 'aurie kiekari hekwamekɨ mukumakaitsie kaniukateitɨni. Hurira Tsaruni kani'ɨyayatɨkaitɨni, ti'aitame kemariteya ti'ɨwiyame, Tikiwa nu'aya meta Karikatsi teukarieyatɨtɨ.

15 Hurira mɨpaɨ katiniwaruta'eiya: «Yawé mɨpaɨ kanaineni, 'ixaheritsixi wakakaɨyari: “Mɨpaɨ xeketenetahɨawi kemɨ'ane mɨxehetanɨ'a, 16 kename ne Yawé mɨpaɨ nehaine: ‘Nekanenunɨ'amɨkɨ 'uximatɨarika 'ikɨ kiekaritsie meta mana kiekatari wahetsie, naime kemaine mɨkɨ xapa nekaneye'atɨamɨkɨ Kura kwieyaritsie ti'aitame mekaterɨwaxɨ. 17 Mɨkɨ mekaneniuku'eirieni, hipame pɨta kakaɨyarixi 'ɨkwa mekaniwarutitairieni, mɨkɨkɨ mekaneniuyehaxɨatɨani yunaime yukakaɨyarixikɨ, 'ayumieme nekaniha'aka 'ikɨ kiekari hetsiemieme, hatsuaku nepɨkatihayewa.’ 18 Peru Kura kwieyaritsie ti'aitame, mɨxeheyenɨ'a xemɨnetsita'iwawiyakɨ, mɨkɨ mɨpaɨ xeketenetahɨawi, kename ne Yawé 'Ixaheri Kakaɨyarieya mɨpaɨ nehaine: 19 ‘Waɨkawa pemunutuixiekaikɨ meta nitixaɨtɨ pemɨkarayuyeitɨakɨ Yawé hɨxie pe'i'enieka kenemiyurieni 'ikɨ kiekari meta teɨterimama, kememɨte'akumaweriyarieni meta ke'axame'itɨarietɨ memakɨne. Meta 'akamixa pemeukatsanaxɨkɨ meta nehɨxie pemutatsuakɨ, ne nekamaniu'enieni. Ne Yawé mɨpaɨ nekanaineni. 20 'Ayumieme, 'a'ukiyarima memakuhe nepɨmatsi'atɨani 'aixɨa 'iyari. 'Ekɨ pepɨkaniere 'uximatɨarika kenemɨti'atɨani 'ikɨ kiekaritsie’ ”».

Hikɨ 'ana mɨkɨ mekanakunuaxɨani ti'aitame mɨpaɨ memɨtehetaxatɨanikɨ.