1 Merikɨtsɨ ti'aitame Rawiri kaniuti'iwauni xɨka 'akuxi xewitɨ Tsahuri nuiwarieya 'uyeikakaitɨni para 'aixɨa miyurienikɨ Kunatani ha'eriwatɨ. 2 Hikɨ Tsahuri tɨriyamama xeime mekanexeiyakaitɨni memɨte'ihɨritɨakai yupiinite mɨkɨ Tsiwaha pɨtitewakai, mɨkɨ mɨwitɨkiemiekɨ mekateniutanɨ'ani. Kepauka Tsiwaha Rawiri hɨxie munua, mɨpaɨ katinita'iwawiya:

—¿Tsiwaha 'ekɨ petihɨkɨ?

Mɨkɨ mɨpaɨ katinita'eiya:

—Huu, nenepɨhɨkɨ mati'uximayatsiriwame.

3 Ti'aitame tawarita kanita'iwawiya:

—¿Xewitɨ 'akuxi katiyuhayewane Tsahuri nuiwarieya? Kakaɨyari pɨnetsi'uyuitɨa waɨkawa nemiparewienikɨ.

Tsiwaha mɨpaɨ katinita'eiya:

—Huu, ti'aitame. Kunatani 'akuxi niweya xewitɨ puyuhayewane muhurie yu'ɨkatetsie.

4 Ti'aitame mɨpaɨ kaniutayɨni:

—¿Hakewa peka?

Tsiwaha mɨpaɨ katinita'eiya:

—Ru-Rewaxi paitɨ. Makixi 'Amiheri nu'aya kie kanekani.

5 Hikɨ ti'aitame Rawiri katiniutanɨ'ani mɨwawiemiekɨ Makixi 'Amiheri nu'aya kie, Ru-Rewaxi paitɨ. 6 Kepauka Mepiwutseti Kunatani nu'aya meta Tsahuri teukarieya Rawiri hɨxie munua, kaniutihɨximakeni kwiepapai.

Rawiri mɨpaɨ katinita'iwawiya:

—¿'Ekɨ Mepiwutseti petihɨkɨ?

Mɨkɨ mɨpaɨ katinita'eiya:

—Huu, nenepɨhɨkɨ mati'uximayatsiriwame.

7 Hikɨ Rawiri mɨpaɨ katinitahɨawe:

—Pepɨkamaka, matsi 'apaapa Kunatani neha'eriwatɨ, nepɨnewaɨriya 'aixɨa nemɨmatsiyurienikɨ. Naime nemaniyetuiriemɨkɨ kwie 'ateukari Tsahuri manuyeikakaitsie meta hikɨri 'ena mautiyune nepɨmatimikwani nemexatsie timieme.

8 Mepiwutseti mɨpaɨ katinitahɨawe 'utihɨximakeka:

—Ne ti'a'uximayatsiriwame tixaɨtɨ matsi nepɨkatihɨkɨ, tsɨkɨ mɨmɨki hepaɨ xeikɨa nekani'aneni.

9 Hikɨ Rawiri Tsiwaha mɨpaɨ katiniutahɨawe, Tsahuri parewiwameya:

—Naitɨ ketipaɨmetɨ Tsahuri mati'aitɨwame mɨtipiinieyatɨkai meta tɨɨriyamama, teukarieya Mepiwutseti nekatiniyetuirieka. 10 Mɨpaɨ nekamatini'aitɨaka kwieya keneka'etsani hetsiena mieme, mɨtiutixuxuawere pepɨtiuti'utani kiena kiekatari memɨtekwakakɨ. 'Aniwema tamamata heimana 'auxɨwi memɨyupaume mekematsi'uparewieni meta xeitewiyari te'a'uximayatsiriwamete. Matsi mati'aitɨwametɨkai teukarieya, nemexatsie katiniutikwa'amɨkɨ yuheyemekɨ.

11 Tsiwaha mɨpaɨ katinita'eiya:

—Ti'aitame ne nepɨnewaɨriya nemɨmatita'uximayatsirienikɨ. Naimekɨ yanekatiniyurimɨkɨ kepemɨnetita'aitɨani.

'Ana mɨtiyetɨa Mepiwutseti Rawiri mexayatsie titikwa'atɨ kanayani, ti'aitame munu'ayatɨni hepaɨ. 12 Yunaitɨ Tsiwaha tɨɨriyamama Mepiwutseti mekateni'uximayatsiriekaitɨni. Mepiwutseti yuniwe xeime kanexeiyakaitɨni Mikahiyaxi titewakame. 13 Mepiwutseti Kerutsareme kaniukateitɨni, yu'ɨkatetsie muhuriekaikɨ, mana ti'aitame mexayatsie katiniutikwa'akaitɨni.