1 Hikɨ yapaɨmexɨa 'anuyeyaku mɨpaɨ katiniuyɨni. 'Awitsaruni Rawiri nu'aya yu'iwa 'uka kanexeiyakaitɨni witsiti'ɨimarikame Tamaxi titewakame. Xewitɨta Rawiri nu'aya 'Aminuni kanitihiwe'erieni. 2 Matsi Tamaxi mɨ'ɨimaritɨkaikɨ, 'Aminuni katiniutakwine yuhɨawetɨ mɨpaɨ tiku'eriwatɨ mɨkwaniwekaikɨ yamɨtiyurienikɨ kemɨtiku'eriwakai hetsiena mieme. 3 Peru 'Aminuni yuhamiku kwinie timaiweme kanexeiyakaitɨni Kunarawi titewakame, Tsimaha kaninu'ayatɨkaitɨni meta Rawiri kanimatsuyatɨkaitɨni. Kunarawi 4 'Aminuni mɨpaɨ katiniuta'iwawiya:

—¿Titayari 'ekɨ ti'aitame penu'ayatɨtɨ kwinimieme petiyɨxime petikuye? ¿Titayari pekaneraxaxatɨwa kepemɨti'akuhɨawe?

Hikɨ 'Aminuni mɨpaɨ katinita'eiya:

—Nerikɨ Tamaxi nepɨhiwe'erie, ne'iwa 'Awitsaruni 'iwaya.

5 Kunarawi mɨpaɨ katinita'ɨkitɨani:

—Keneu'akwinima pemɨtikuyeni hepaɨ ketinekani 'a'utatsie. Kepauka 'apaapa mɨmatsixeiyamie mɨpaɨ ketineutahɨawi: “Ximɨxi ne'iwa Tamaxi pamie mɨneramimiekɨ. Ne nekaneixeiyamɨkɨni 'uwa 'ikwai netiwewiriekame meta pɨnerapiniriwani”.

6 Hikɨ 'Aminuni kaniukahuni yukwinimatɨ. Kepauka ti'aitame meikuxei, mɨpaɨ katinitahɨawe:

—Ximɨxi ne'iwa Tamaxi pamie hutame tɨriku tsuirayari mɨnetsitiwewirienikɨ meta mɨkɨ mɨnetiminikɨ.

7 Hikɨ Rawiri yuniuki tuayame kanenɨ'ani Tamaxi kie mɨreitaxatɨanikɨ, mɨpaɨ mɨreitahɨawekɨ: «'A'iwa 'Aminuni kie kenemie meta 'ikwai ketinekawewiri». 8 Tamaxi yu'iwa 'Aminuni kie kaneyani yu'utatsie hekakaikame kanetaxeiya. Yapauka tɨriku mɨtɨxiyari kaniuhawiya hutame tsuiraxi kanitiwewirieni meta kanitikwaxiya. 9 Hikɨ xakɨtsie 'ikamanaka kanei'ɨirieni, peru 'Aminuni matsi kaniyuta'imani katikwaimɨtɨ mɨpaɨ pɨta katiniuta'aita:

—Yunaitɨ takwa xekenanuyekɨni, xeime tɨma nepɨkaheuxeiyamɨkɨ.

Yunaitɨ mewayekɨnekuke, 10 'Aminuni Tamaxi mɨpaɨ katiniutahɨawe:

—'Uwapaitɨ nemuyekukutsutsiepai kenenata'ɨiri, meta 'ekɨ kenetineumikwa.

Mɨkɨ tsuira mutiwewiekai henaka'ɨka, yu'iwa 'Aminuni kane'ɨirieni kiitana paitɨ, 11 peru kepauka 'ahurawa mutɨa timinike, mɨkɨ karima kaniwiya mɨpaɨ katinitahɨawe:

—Ne'iwa hikɨmɨ, nehamatɨa keneukahu'i.

12 Mɨkɨ mɨpaɨ katinitahɨawe:

—Ne'iwa, ketineuhayewa pepɨkanetsinanaimaka, 'ixaheritsixi mɨpaɨ tepɨkateyurie. 'Axapepɨkatiyurieneni.

13 Xɨka mɨpaɨ penetsi'uyurieni ne 'anepuyeikani neyutewiyatɨ. ¿'Ekɨta kepe'aneni? 'Ekɨ 'Ixaheri kwieyaritsie 'axatiyuruwame hepaɨ xeikɨa pepɨtixeiyarieka. Ne nepɨmatsiwawirie ti'aitame hamatɨa pemɨtitaxatakɨ, yurikɨ mɨpaɨ nepaine mɨkɨ pɨkata'imani 'a'ɨya nemayanikɨ.

14 'Aminuni matsi pɨka'i'eni, karima 'iwiyaka mɨkatɨrɨkaɨyekaikɨ hepaɨna, waɨriyarika 'ipitɨaka hamatɨana kaniukahuni. 15 Peru 'arike 'Aminuni 'ikumayɨakake kanitixani'erieni, meripaitɨ waɨkawa kemɨtihiwe'eriekai, hikɨtapɨta waɨkawa matsi kanitixani'erietɨyani. 'Ayumieme mɨpaɨ katinitahɨawe:

—Kenanukukekari keneumieni.

16 Tamaxi mɨpaɨ katinita'eiya:

—Pepɨkanetsi'anuyehɨpani. Mɨya pemɨnetsi'uyuri, hikɨta 'akuxi xɨka penetsi'anuyehɨani matsi waɨkawamekɨ 'axapekatiniyurimɨkɨ.

Peru mɨkɨ pɨka'enu'eni, 17 matsi pɨta tiyu'uximayatsiriwame 'uta'inieka mɨpaɨ katinita'aitɨani:

—'Ikɨ 'ukaratsi kenanuyehɨwa, xɨkari pe'enuyehɨani kitenie ketineukuketsa.

18 Hikɨ ti'uximayatame takwa kanenuyehɨani, kitenie katineunani.

Tamaxi kamixa 'amɨtewi 'amɨmamatetɨtɨ kananakatɨkɨkaitɨni, mɨpaɨ mana ti'aitame niwemama 'ɨimarixi mekateniu'iwikaitɨni. 19 Hikɨ naxi yumu'utsie heutiwiwieka meta yukamixa heukatsanaka, yumu'utsie heutimetɨ huyeta kaneyani 'utatsuatɨ karima. 20 Hikɨ 'iwaya 'Awitsaruni mɨpaɨ katinitahɨawe 'inɨtɨatɨ:

—¿'A'iwa 'Aminuni 'ahamatɨa rekahui? Merikɨte kayuwatɨ keneuyeikani netaru, keneyunɨtɨaka meta 'atsipepɨkahaineni, kani'a'iwatɨni 'atsitemɨte'uyurieni tepɨkayɨwawe.

Yuhiwerietɨ xeikɨa Tamaxi 'Awitsaruni kie kaniyuhayewa. 21 Kepauka Rawiri ti'aitame mɨtiutamari naime kemɨtiuyɨkai hepaɨtsita, waɨkawa kaniuyeha'ani. 22 'Ana mɨtiyehane 'Awitsaruni 'Aminuni pɨkakuhɨawekai, matsi kanixani'eriekaitɨni 'iwaya Tamaxi hamatɨa mukahuikɨ.

23 Merikɨtsɨ huta wiyari 'anuyeyaku, 'Awitsaruni kaniwaruta'inieni yunaime ti'aitame niwemama 'ixɨararipa, Wahari-Katsuxi paitɨ, 'Epɨrahini kwieyari manuka'atɨka heuhurakaku, mana teɨterimama muxatsi mekaniwarexitɨwekaitɨni. 24 Meta 'Awitsaruni ti'aitame hetsɨa kaniye'ani mɨpaɨ katinitahɨawe:

—'Ekɨ ti'aitame, ne ti'a'uximayatame nehɨkɨtɨtɨ nete'uximayatamete nekaniwarexeiyani texikamete. Ne nekamaniwawirieka memɨtehaxitɨwetsie pemɨmiekɨ meta 'aparewiwamete.

25 Ti'aitame mɨpaɨ katinita'eiya:

—Tixaɨ neniwe Tanaitɨ temaukɨne tepɨkayɨwawe matsi pekaneti'uxiweni petaremitɨ.

'Awitsaruni waɨriyarika kanipitɨakaitɨni, ti'aitame matsi pɨkayuwaɨri mɨyemiekɨ, mɨpaɨ xeikɨa katinitahɨawe Kakaɨyari kexehe'ɨwiyani. 26 Hikɨ 'Awitsaruni mɨpaɨ katinitahɨawe:

—'Ekɨri ti'aitame pemɨkamiekɨ, ¿'aixɨa katiyɨnikeyu ne'iwa 'Aminuni xɨka heuyanike mɨtatsiheteɨtakɨ?

Ti'aitame mɨpaɨ katinita'iwawiya:

—¿Titayarikuta 'ahamatɨa mɨmiekɨ pereiyehɨwa?

27 Peru 'Awitsaruni ti'aitame waɨriyarika kaniupitɨani, 'ayumieme ti'aitame kaniwarupitɨani 'Aminuni meta hipatɨ niwemama 'Awitsaruni 'utɨa memɨyehukɨ. 28 'Ikɨ 'Awitsaruni yuhetsɨa te'uximayatamete mɨpaɨ katiniwaruta'aitɨani: «'Aminuni xekenexeiyani xepɨkaheiyehɨpani. Kepaukari waɨkawa mɨtawekatsie ne yanekanitayɨmɨkɨ kepauka xemenukuweiya hikɨ xeme xekaneimiekuni. Xepɨkaheumamaka ne matsi nekanihɨkɨtɨni mɨpaɨ nemɨxeti'aitɨa. Xekeneyuwaɨriyani xekenetɨrɨkawini».

29 Te'uximayatamete yamekateniuyurieni 'Aminuni hepaɨtsita 'Awitsaruni kemɨtiwaruta'aitɨa. Hikɨ hipatɨ ti'aitame niwemama mekananuku'uni, yuxexuitɨ yumuratsixi wahetsie me'anutiyaxixɨaka mekanekɨne meyuta'unake.

30 Hikɨ 'akuxi huyeta yateewa mekaniuhukaitɨni Rawiri kepauka niuki mu'eni: «'Awitsaruni ti'aitame niwemama yunaime kaniwarekwini. Mɨkɨ nixewitɨ 'ayenieretɨ pɨkayuhayewaxɨ».

31 'Ana ti'aitame 'anukukeka, yukamixa kaneukatsana hiwerika 'inɨariyari kanayeitɨani, meta kwiepa kaniuhuni. Yaxeikɨata 'iparewiwamete yunaitɨ hamatɨana memu'uwakai yukamixa mekaneukatsanaxɨani. 32 Kunarawi Tsimaha nu'aya Rawiri matsuya, mɨpaɨ katinitahɨawe:

—'Ekɨ ti'aitame yunaitɨ 'aniwema mehekwi'iwame pepɨka'erieka, matsi 'Aminuni xeikɨa kane'itɨarieni. 'Awitsaruni yakatinimaikaitɨniri kepaukapai 'Aminuni Tamaxi mukumayɨatsie taruya. 33 'Ekɨ ti'aitame niukitsie yuri pepɨkati'erieka kename 'aniwema yunaitɨ mehekwi'iwaxɨ, matsi 'Aminuni xeikɨa kanemierieni.

34 Neniereme kiekari mɨta'ɨwiya, mana kaneutaniere huyeta meta tau manukayuyuipiketsie neutaniere muhɨriyatsie, mana mekanakahukaitɨni yumɨiretɨ. Hikɨ ti'aitame mɨpaɨ katinekɨhɨawe: «Kurunahini huyeyaritsie teɨteri mekanakahuni muhɨriyatsie». Mexi 'Awitsaruni yuta'unakai. 35 Hikɨ Kunarawi ti'aitame yakatiniutahɨawe:

—Kamɨ 'ekɨ ti'aitame, 'ena 'aniwema mekaniuti'axeni kenemɨmarahɨawekai.

36 Hikɨ mɨpaɨ metekuxatatɨ mete'anunɨku ti'aitame niwemama mana mekanatanexɨani karima me'utitsuatɨ, hikɨ ti'aitame meta 'iparewiwametemama mekanitsutɨani me'utitsuatɨ mekayunɨtɨarinɨatɨ.

37-38 'Awitsaruni kepauka muyuta'unaxɨ, Tarimahi hetsɨa kaneyani heyuti'awietake 'Amihuri nu'ayatsɨa, Ketsuxi kwieyaritsie ti'aitame mɨhɨkɨtɨkai. Haika wiyari mana kaniuyuhayewa. Rawiri matsi yuniwe 'Aminuni hetsiemieme kaniutitsuakakaitɨni tukarikɨ, 39 kepaukata 'Aminuni kemɨtiumɨ hepaɨtsita muyunɨtɨa, kanitsutɨani 'Awitsaruni hauxeiyamɨtɨ waɨkawamekɨ.