23
Rawiri 'imatɨrieka kemɨtiuxataxɨ
1 'Ikɨ Rawiri 'imatɨrieka mieme niukieya kanihɨkɨtɨni:
«Rawiri 'Itsahi nu'aya kemɨtiwarutaxatɨa yuteɨterima,
witsi'anɨyɨtɨkaime nɨawari mutiwewi 'ixaheritsixi wahetsiemieme,
tewi, Mɨmariwe hepaɨtsitana 'aixɨa mutayɨ
meta Kakuwu Kakaɨyarieya menayexei.
2 »Yawé 'Iyarieya niuki kaneniupitɨani,
hetsienamieme nemɨtaniunikɨ.
3 'Ixaheritsixi wakakaɨyari mɨpaɨ kaniutayɨni,
'Ixaheritsixi wa'ai mɨpaɨ kanetiniutahɨawe:
“Kemɨ'ane mɨtiwa'aitɨa teɨteri kemɨtiheitserie,
kemɨ'ane Kakaɨyari 'ayemakaxetɨ mɨti'aita,
4 mɨkɨ hekɨariya ximeri mieme hepaɨ kani'anemɨkɨ,
kahauhaiyakaku manatineika hepaɨ,
wiyeri 'utɨa manatineika hekɨariwietɨ
tupiriya kwiepa mɨtinenikɨ”.
5 »Kakaɨyari yuheyemekɨ nenuiwarima kaneniupitɨani,
tɨratu yuheyemekɨ nehamatɨa kaniuwewieni,
naime 'aixɨa hauti'aneme, mɨkayɨwe mɨpatsieni.
Kakaɨyari yakatiniyuriemɨkɨ nemɨrayu'iwanikɨ,
meta yamɨraye'anikɨ naitɨ tita nemɨreuyehɨwa.
6 Matsi 'axamemɨteyurie xuya mewiwiwa hepaɨ mekani'aneneni,
yumamakɨ nixewitɨ pɨkawakumaɨwa.
7 Tepɨa matsikɨiyarikɨ kanikuxexeɨriwani meta pitsika kɨyeyarikɨ,
hikɨ mana tai kanitixɨxɨtsitɨwani».
Rawiri kuyaximama memeuyutakwiwawe
(2Tsam 23:8-39 – 1Kem 11:10-41)
8 'Ikɨ Rawiri kuyaximama kwinimieme memɨtehayu'iwakai mekanihɨkɨtɨni:
Kutsewi-Watsewati Hakumuni kiekame, mɨkɨ matsi panuyekatei memuyuhaika wahetsiemieme, heiwamieme meheyukukwika yupitsikakɨ 'atahaika tsienituyari teɨteri kaniwarekwini.
9 'Utɨmana mieme 'Eriyatsaxi Ruruhu 'Akuki nuiwarieya nu'aya pɨhɨkɨtɨkai, mɨkɨta xewitɨ memɨyuhaika pɨhɨkɨtɨkai kwinimieme mɨreyutamiewe. Rawiri hamatɨa kaniuyeikakaitɨni kepauka yuhutatɨ memɨwaruyehaxɨatɨa piritsiteutsixi Patsiramini mɨrakutewatsie meyuxeɨriekaku mewatakwinike. 'Ana 'ixaheritsixi mekaneutayeixɨani, 10 matsi 'Eriyatsaxi pɨka'utima, hikɨ yumɨireme piritsiteutsixi kaniwarukwini, 'uxiyakɨ mamayatsie 'ixiparaya kaniuwere. Mɨkɨ tukariyaritsie Yawé kaniwaruparewieni memɨtehayu'iwakɨ. Kuyaxi 'Eriyatsaxi manuyeika mekaniu'axɨani, matsi piritsiteutsixi wapiinite xeikɨa mete'anupinike.
11 Hairieka mieme kwinimie mɨreuyutamiewe Tsamaha kanihɨkɨtɨkaitɨni 'Akehe 'Arari kiekame nu'aya. Heiwa kuyaxi piritsiteutsixi mume 'etsimɨpepe maku'etsietsie mekaniuyukuxeɨrieni. Hikɨ kuyaxi 'ixaheritsixi mɨkɨ wahɨxie mekaniuyuta'una, 12 matsi Tsamaha pɨkayuta'unaxɨ, pukunua 'ixaheritsixi wahetsie putanua, 'ana piritsiteutsixi kaniwara'iwa. 'Anata Yawé memɨtehayu'iwakɨ kaniwarupitɨani.
13 Yapaɨmexɨa 'anukayakuta, xeitewiyari heimana tamamata watsata yuhaikatɨ kwinimieme memɨtetɨrɨkawi 'Arurani terɨyarita mekanekɨne, Rawiri mayu'awietatsie. 'Itsanari kanitsutɨarieximekaitɨni, matsita kuyaxi piritsiteutsixi Xepahini kwieyaritsie mayeweritsie mekaniyuxeɨriekaitɨni. 14 Matsi Rawiri pɨyu'awietakai 'aitsata, 'ana mɨtiyehanetsie kuyaxi piritsiteutsixi Wereni kwieyaritsie mekatenitahɨkaitɨni. 15 Rawiri waɨkawa hauharimɨtɨ mɨpaɨ kaniutayɨni: «Xɨkatɨ tiyɨwenike xewitɨ mɨneniuharitɨani Wereni kitenie haa mɨtiniere». 16 Hikɨ memuyuhaika memauyutakwiwawe piritsiteutsixi mematiteitsie mekanitahaxɨani, Wereni putsu mɨtiniereta haa mewatihanaka Rawiri mekanehanirieni. Peru mɨkɨ pɨkahenuhari, matsi Yawé yetuirietɨ pɨta kanitayeurieni. 17 Mɨpaɨ kaniutayɨni yemekɨ mariwemekɨ: «Yawé keneneparewieka nemɨkahenuharenikɨ. Mɨkɨ teɨteri waxuriya nemanuhareni hepaɨ nekaniyumɨkɨ yutukari memɨyetua». Pɨkayuwaɨri menuharenikɨ.
Mɨkɨ yuhaikatɨ memauyutakwiwawe mariwemekɨ mekateniuyurieni.
18 'Awitsahi, Kuhawi pɨ'iwaya Tsariwiya nu'aya, mɨkɨ yuhaikame kaniwanɨ'akaitɨni, mɨkɨ matsi 'aixɨa katinikuxaxatsiwakaitɨni. Heiwa pitsika xeikɨa 'akwetɨ kaniuyutamieni, kaniwarukwini haika tsienituyari kuyaxi. 19 Mɨkɨ matsi waɨkawa 'aixɨa tikuxaxatsiwatɨ kanayani keyuri memɨyuhaika, mɨkɨ tiwa'aitɨwame kanayeitɨarieni, peru mɨkɨ wahamatɨa pɨka'inɨarikai.
20 Wenahiyaxi Kuyara nu'aya Kawɨtseri kiekame, mɨkɨ yumemiwame pɨhɨkɨtɨkai, waɨkawa mariweme katiniuyurieni kuyakɨ. Yuhutame teɨteri memauyutakwiwawekai Muhawi kiekatari kaniwara'iwa, xeimiemeta kepauka 'ɨwi 'ukawiwieku putsu muyewakita kaneukahani maye muwa kaniumieni. 21 Yaxeikɨata 'Ekipitu kiekame kwinimieme 'utewime kana'iwa. 'Ekipitutanaka tepɨa kanakwekaitɨni, matsi Wenahiyaxi kɨye xeikɨa kanakwekaitɨni, hikɨ tepɨaya 'inawairieka mɨkɨkɨ kanimieni. 22 Wenahiyaxi Kuyara nu'aya waɨkamexɨa mɨpaɨ katiniyumienekaitɨni rayu'iwatɨ, mɨkɨta yaxeikɨa 'aixɨa pɨtikuxaxatsiwakai memɨyuhaika memauyutakwiwawe wahepaɨ, 23 matsi mɨkɨ wahamatɨa pɨka'inɨatsiekai, tsepanetɨ waɨkawa mɨtiuyuri xeitewiyari heimana tamamata memauyutakwiwawe wahamatɨa. Meta matsi Rawiri 'ihɨwemete tiwa'aitɨwame kanayeitɨani.
24 Xeitewiyari heimana tamamata memauyutakwiwawe wahamatɨa memaye'ukai 'ikɨ mekanihɨkɨtɨni:
'Atsaheri Kuhawi 'iwaya,
'Erikanani Ruruhu nu'aya Wereni kiekame.
25 Tsama Karuri kiekame,
'Erikaha Karuri kiekame,
26 Heretsi Pereti kiekame,
'Ira 'Iketsi nu'aya Tekuha kiekame,
27 'Awihetsexi 'Anatuti kiekame,
Mewunahi Kutsa kiekame,
28 Tsarimuni 'Akuki nuiwarieya,
Marahi netupatanaka,
29 Kereri Wanaha nu'aya netupatanaka,
'Itahi Xiwahi nu'aya, Kiriweya kiekame Wenikamini kwieyaritsie,
30 Wenahiyaxi Piratuni kiekame,
Hirahi Kahatsi 'akiyaritsie kiekame,
31 'Awi-'Ariwuni Weti-'Arawa kiekame,
'Atsimaweti Warahumi kiekame,
32 'Erihawa Tsariwini kiekame,
Yatseni niwemama,
Kunatani 33 Tsama nu'aya 'Arari kiekame,
'Ahiyani Tsaraxi nu'aya Harari kiekame,
34 'Eripereti 'Akatsiwahi nu'aya Mahaka tewiyari,
'Eriyani 'Akituperi nu'aya Kiru kiekame,
35 Ketsiru Kaximeri kiekame,
Parahi 'Arawi kiekame,
36 'Ikari Natani nu'aya, Tsuwa kiekame,
Wanihi Kahari kiekame,
37 Tsereki 'amuni tewiyari,
Nakarahi Weruti kiekame, Kuhawi Tsariwiya nu'aya hetsie nunuwame patɨa,
38 'Ira 'itɨrita tewiyari,
Karewi 'itɨrita tewiyari,
39 'Uriyaxi heti tewiyari.
Yunaitɨ xeitewiyari heimana tamamata heimana 'atahuta mekaniyupaɨmekaitɨni.