5
Mari'itɨarika meta heiwerika
1 'Ikɨ niuki xekeneu'eni, 'ixaheritsixi teɨteriyari,
'ikɨ heiwerika kwikariyari 'ahetsiemieme neminɨawa:
2 «'Ari 'Ixaheri 'uka 'ɨimari kanatiweni,
tawariri pɨka'anukukeni,
yukwiepa kaniukani,
pumaweni kemɨ'ane menukuhana».
3 Yawé naimekɨmɨyɨwe mɨpaɨ 'Ixaheri kwieyari katinahɨaweni:
«'Iya kiekari kuyaxa mɨwewienekai xeimiriyari warawitɨtɨ kuyaxi
mɨkɨ xeitsienituyari warexeiyatɨ xeikɨa payani,
meta xeitsienituyari kuyaxi warawitɨtɨ muyumienekai
tamamata xeikɨa warexeiyatɨ kanayeimɨkɨ».
4 Yawé mɨpaɨ 'Ixaheri kwieyari katinahɨaweni:
«Xekeneneutiwawa hikɨ 'ana xe'ayeyuyuritɨ xepakɨne.
5 Peru Weteri xepɨkaheta'axeni,
meta Kirikari xepɨkahekɨkani,
meta Weritsewa xepɨka'uyekɨkani,
mɨkɨ Kirikari kananuhaniemɨkɨ 'ateewa paitɨ,
meta Weteri, nitixaɨtɨ pɨkarayeitɨarieni».
6 Yawé xekeneutiwawa xe'ayeyuyuritɨ xemakɨnekɨ,
kapa mɨkɨ tai hepaɨ 'anetɨ 'ukawenikɨ,
Kutse nuiwarimama wahetsie,
tai Weteri kaniutataiyaweni
nixewitɨ pɨka'itɨwe.
7 Xeme tita mɨtiheitserie ratsiwime xepɨtehayeitɨwa
meta 'aixɨa mɨti'ane kwiepa xepehɨpa.
8 Yawé Tsimanixi meta Terɨka puwarutiwewi,
yɨriya xawatɨriya payeitɨwa
meta tukari tɨkari payeitɨwa.
Mɨkɨ haa haramaratsie mieme putahɨawe
'ana kwie pukahatuiya.
Mɨkɨ Yawé katinitewaka.
9 Mɨkɨ, naime 'aixɨa mɨrekukurarutɨiyarie nitixaɨtɨ pɨkarayeitɨwa
meta kii mɨmamariwawe 'u'unime payeitɨwa.
10 Xeme xepi'uxiwe'erie tita mɨtiheitserie hetsie munua 'itsɨkate wahɨxie
meta xepixani'erie kemɨ'ane yurikɨ mɨtikuxata.
11 Haweri memɨ'anene xemɨwaketsitɨwekɨ
meta waɨkawa 'anamanemekɨ xemɨtewawawirie 'ikukɨ meteyutuakaku,
'ayumieme xeme yutetexi kiiyarita xepɨka'ayeyaxe xemitiwewi,
meta winu xepɨka'anu'ieni yukaxietsie mieme xemika'e.
12 Ne nepɨtimate kepaɨmeme xemɨte'apine,
pɨmɨireri ke'axaxemɨte'uyuri.
Xeme xepɨwananaima heitseriemekɨ yamemɨtekahu, waɨriyarika xepɨtewawawirie
meta 'itsɨkate wahɨxie mɨreuyehɨwa xepekahɨpa.
13 'Ayumieme mɨya mɨ'anekɨ mɨtimaiwe kayuwatɨ pɨta puyeika,
'ikɨ tukari 'aixɨa mɨka'anenekɨri.
14 'Aixɨa mɨti'ane xeketenekuwawa 'axamɨti'ane xepɨkatewautɨweni, hikɨ 'ana xepu'uwani,
mɨpaɨ xe'anenekaku Yawé Kakaɨyari Naimekɨmɨtɨrɨkaɨye xehamatɨa puyeikani,
xeme kexemaitɨka.
15 'Axamɨti'ane xeketenexani'erieka matsi 'aixɨa mɨti'ane xeketenenaki'erieka.
Tita mɨtiheitserie keti'aitani memati'iwawiyarɨwatsie,
mɨpaɨ heiwatɨ Yawé, Kakaɨyari Naimekɨmɨtɨrɨkaɨye,
Kutse nuiwarimama memuyuhayewatɨwe warutinenimayata.
16 'Ayumieme Yawé naimekɨmɨyɨwe, Kakaɨyari Naimekɨmɨtɨrɨkaɨye mɨpaɨ kanaineni:
«Naitsarie teɨteri memayukuxexeɨriwatsie kani'enieriemɨkɨ hiwerika,
meta naitsarie kayetetsie 'uximatɨarika hiwariyari puxuaweni.
Memɨte'uximayatatɨwe yu'etsita mepɨta'inierieni memɨyuhiweriekakɨ,
meta waɨkawa memeutatsuawawe mepɨta'inierieni memɨtitsuanikɨ memɨwahiweritɨanikɨ.
17 Pɨ'enierieni tsuari naitsarie kaxie haraweriyaritetsie
kepauka ne mana 'ahetsɨa nemunuani»,
Yawé mɨpaɨ kanaineni.
18 Xɨa'ui xeme, kekuta tekanitakwewieka,
xemaitɨka Yawé munuanikɨ.
'Ana kuhekɨareke xepɨka'erieka
matsi yɨriya kaninuamɨkɨ 'axa'anemekɨ.
19 Mɨpaɨ katiniyɨmɨkɨ xewitɨ maye 'umakarɨmetɨ
matsi hutse pɨta mitakwani hepaɨ,
yatɨni xewitɨ nuame yukie
yukitenie mɨrawiyakekai
kuu hetsie mumei mikei hepaɨ.
20 Yawé munuanitsie pɨkakuhekɨare matsi pɨkɨyɨre.
Yurikɨ temawierika pɨkaxuaweni matsi pɨta nutuixiya puxuaweni.
21 «Ne nepi'uxiwe'erie 'ixɨarari kexemɨte'ayexeiya,
nepɨkanaki'a tsepa patsiekamekɨ xemɨyukuxexeɨriwa nehetsiemieme.
22 Tsepa xemɨnetsi'atɨiriwa mawari taiyariyari meta hatsi mawariyari,
ne nepɨka'itanaki'erieni,
meta nepɨkaxe'enieni
tsepa tsikeru xemɨnetsi'utimawiri 'aixɨa temɨteyuxeiyanikɨ mawariyari.
23 'Akwikari pepɨkanetsi'enitsitɨaka,
'akanari yuariyaya nepɨkaheu'enimɨkɨ.
24 Matsi pɨta 'aixɨa mɨti'ane kexuaweni,
mɨtiheitserie ke'uhaneni haixa mɨka'ukawauke hepaɨ.
25 »Teɨteri 'ixaheritsixi, mawari xepɨkanetsi'uwewiri meta 'imikieri,
makumawetsie xe'uhutɨ huta tewiyari wiyari.
26 Hikɨ xeme xekanititɨkuni Tsikuti 'ɨkiyari ti'aitame xemɨte'iterɨwa,
metatsiere Kiyuni,
xurawetsixi wa'ɨkiyari
xemetɨtɨ xemɨwarutiwewi.
27 Hikɨ nekanixe'anunɨ'amɨkɨ xemanuhapanienikɨ Ramatsiku yeta paitɨ»,
Yawé mɨpaɨ kanaineni, Kakaɨyari Naimekɨmɨtɨrɨkaɨye mɨtitewa.