1 »'Ikɨ kanihɨkɨtɨni 'inɨari niukiyari meta 'aitsika waɨkawa Yawé 'akakaɨyari mɨnetsi'uta'aitɨa ne nemɨmatsita'ɨkitɨanikɨ, mɨpaɨ xemɨtehe'uwanikɨ xema'axɨanitsie yukwie xemayeitɨanikɨ, 2 kepemɨreutere pe'uyeikatɨ 'ekɨ 'aniwema meta 'ateukarima pepeyexeiyani Yawé 'akakaɨyari naime 'inɨari niukiyaritsie yaxetekahutɨ meta 'aitsika waɨkawa nemɨmatsiyetuirie, mɨixa wiyari 'apemuyeikanikɨ. 3 'Ixaheritsixi, xekeneu'enana meta xekeneuyuwaɨriya yaxemɨtekahunikɨ. Mɨpaɨ 'aixɨa 'iyari xepu'uwani, teɨteri memɨyumɨire xepɨhɨkɨtɨni mɨkɨ kwieyaritsie hakewa waɨkawa retsi mexuawe meta xiete, kemɨxerahɨawekai Yawé, xetutsima wakakaɨyari.

4 »'Ixaheritsixi, xekeneu'enana: Yawé takakaɨyari puyuxewi xeikɨa. 5 Kenenaki'erieka Yawé 'akakaɨyari yeme 'a'iyarikɨ, naime kepemɨti'amate meta naime 'atɨrɨkariyakɨ. 6 'A'iyaritsie kena'eriwani 'ikɨ niuki hikɨ nemɨmatsi'aitɨa. 7 Yaketiniwakuxaxatɨwani 'aniwema. Keniwakuxaxatɨwani kepauka 'akie pemuka, meta kepauka huyeta pemumie, kepauka pemɨkakuximenitsie meta kepauka pemanukukenitsie. 8 'Amamatsie keneutapieka ha'ukame 'inɨari hepaɨ mɨmatsiɨkɨnikɨ, meta 'ahɨxie pemɨ'inɨaritɨariekakɨ 'ahetsiemieme peme'eriwanikɨ, 9 'akii kitsaraɨyaritsie kena'utɨaxɨa meta 'akiekari 'itupariyaritsie.

10 »Yawé 'akakaɨyari kamanipitɨamɨkɨ pemeutahanikɨ kwie mɨwarutaxatɨakaitsie 'atutsima 'Apɨrahami, 'Itsahaki meta Kakuwu. Mɨkɨ kwieyari kiekarite kanexeiyani kwinimieme timamariwaweme meta rexeiyatɨkaime 'ekɨ pemɨka'itiwewi, 11 kiite waɨkawa piinite tiuyepitɨkaime 'ekɨ pemɨkatiuxeɨri, meta putsu pexeiyatɨkani xemɨkawati'inixɨa, meta kaxie huriwu haraweriyari pexeiyatɨkani pemɨka'ika'e. Kepauka mɨkɨ pemɨtikwanitsie petahuxame, 12 keneyukweriwayurieka Yawé pemɨkahatɨtɨmaiyanikɨ, 'Ekipitu mɨmatsiyewitɨ, mɨkɨ kwieyaritsie waɨriyarika pemɨti'uximayatsitɨariekaitsie.

13 »Yawé 'akakaɨyari kenayemakaxeni, mɨkɨ xeikɨa kenayexeiyani, yaketineyuhɨritɨa mɨkɨ kemɨtitewakɨ. 14 Mɨkɨ teɨteri hipatɨ xe'aurie memahane wakakaɨyarixi xepɨkawarayexeiyani, 15 Yawé 'akakaɨyari 'ahamatɨa kaniuyeikani, Kakaɨyari mɨ'ɨtetsa kanihɨkɨtɨni, kapa waɨkawa 'uyeha'anikɨ 'ahepaɨtsita, nɨka 'ena kwiepa metsi'akuyeitɨani.

16 »Yawé 'akakaɨyari pepɨka'inɨataneni, Matsaha reyetewakaku xemɨte'uyuri hepaɨ. 17 'Amarima xeikɨa kenaye'atɨwani Yawé 'akakaɨyari 'aitsikaya, meta naime 'inɨari niukiyari mɨmatsiyetuiri. 18 Tita mɨtiheitserie tita 'aixɨa mɨti'ane yaketineyurieneni Yawé hɨxie, 'aixɨa 'iyari pemuyeikanikɨ meta mɨkɨ 'akwie pemayeitɨanikɨ 'aixɨa mɨ'ane Yawé 'atutsima mɨwaruxatɨakaitsie. 19 Yawé yunaime kaniwarayeweiyamɨkɨ memɨxe'aye'unie kepauka xemɨwaranukunanakeni, mɨkɨ kemɨtixe'utahɨawixɨ.

20 »'Uxa'atɨni warie, kepauka 'aniwe mɨmatsita'iwawiya: “¿Ketita ti'inɨariyari niuki meta 'aitsikate naitɨ Yawé takakaɨyari mɨxe'uta'aitɨa?”, 21 mɨpaɨ pekatinita'eiyamɨkɨ: “Tame 'Ekipitu Parahuni ti'aitame waɨriyarika tepɨte'i'uximayatsiriekai, peru Yawé mana kataniyewitɨni kwinimieme mariwemekɨ tiyurienetɨ tɨrɨkaɨyemekɨ. 22 Tahɨxie, Yawé mamariwawemekɨ 'inɨarite puwewi, meta kwinimieme 'aneneme 'uximatɨarika 'ekipitutari wahetsiemieme, Parahuni meta yunaime tɨɨriyamama wahetsiemieme. 23 Hikɨ mana kataniyewitɨni mɨtatsi'anuwitɨnikɨ 'iya kwieyaritsie tatutsima kemɨ'ane muwarutaxatɨakai kename tatsiyetuirienikekai. 24 Yawé takakaɨyari pɨtatsi'uta'aitɨa kename teke'eyemakaxeni meta temeye'atɨakaku 'aitsikaya, 'aixɨa 'anemekɨ temu'uwanikɨ, te'ayenenieretɨ. Hikɨ temɨte'u'uwa hepaɨ. 25 Xɨka yatetekahuni ta'iyarikɨ naime 'aitsikatsie Yawé takakaɨyari hɨxie, naimekɨ kemaine, merikɨte 'ana heitseriekamekɨ temu'uwa tekanihɨkɨtɨkakuni”.