1 »Kepauka Yawé xekakaɨyari yunaime mɨwaka'una nuiwarite wakwie mɨxeyetuirieni, meta kepauka xemeri xemɨwarayeweiya, 'ari wakwietsieri kepauka xemɨtiteni meta wakiiteta, 2 kiekarite yu'awiwietame haikame xekananayexeiyakuni kwie Yawé mɨxeyetuirienitsie hixɨapa yukwie xemayeitɨanitsie. 3 Kwie, Yawé xekakaɨyari mɨxeyetuirieni xepiini mayanikɨ, 'ayehaikame xepayeitɨani, meta huye xepɨtiwewieni kemɨ'ane mɨtiyumieni mɨyɨwenikɨ mɨkɨtsie muyuti'awietakɨ.

4 »Xewitɨ tiyumiekame xɨka muwa ye'ani yuti'awietake, pɨyɨweni xeikɨa muyuti'awieta kemɨ'ane yu'iwa mumieni mɨpaɨ kara'eriwatɨ meta ka'ihekatɨ. 5 'Inɨarikɨ nehaitɨ, xɨka mɨpaɨ timieni: xɨka xewitɨ yu'iwa hamatɨa heyani 'ɨtsita memetikɨ'enikɨ, peru xɨka tiwitenekaku hatsaya hanutihɨne 'iwayatsie 'ukaweni xɨka 'imieni, mɨkɨ pɨyɨweni xeime mɨkɨ kiekaritsie muyuti'awietakɨ meta muyutawikweitsitɨanikɨ. 6 Pɨkaheuyewetse 'ateewa meyani mɨpaɨ tiuyurieme, mɨkɨ mɨha'a penuku'axiwe pimiewe, 'aixɨa pɨka'ane 'iya tewi mɨmierienikɨ yu'iwa mumikɨ mɨpaɨ kare'eriyatɨ. 7 'Ayumieme nepɨxe'aitɨa haika kiekariyari xemukunakakɨ.

8 »Xɨka Yawé xekakaɨyari xekwie matsi 'a'utayeuriya, xetutsima kemɨtiwarutahɨawixɨ, meta naime kwie xeme xeyetuirieni mɨkɨ kemutayɨkɨ, 9 xɨka xeme yaxetekakɨne 'ikɨ naime 'aitsikatetsie hikɨ nemɨxe'aitɨa, meta xɨka Yawé xekakaɨyari xenaki'erieka, meta huyetana yuheyemekɨ xe'uhuni, hikɨ 'ana tawarita haikame kiekari xepukunani. 10 Mɨpaɨ xeteyurieyu 'atsimɨkatiuyuri xuriyaya pɨkatayeuriyani mɨkɨ kwieyaritsie, Yawé xekakaɨyari mɨxeyetuirienitsie xehetsiemieme mayanikɨ, xemeta yaxeikɨa xehetsie pɨkarahɨiwani mɨkɨ mumieriekɨ.

11 »Peru xɨka xewitɨ tewi yu'iwa 'uxiwe'erietɨ, xɨka 'ihupieme, heitiwaxɨame tinawairieme meta 'imieme, hikɨ xɨka mɨkɨ xeime kiekari 'utiwaume mana heyani yuti'awietake, 12 'ukirawetsixi kiekarieyatsie kiekatari mekete'utanɨ'ani mewiyarienikɨ, 'imienike mikuwaune hetsɨa keyetuiyani mɨkɨ mimienikɨ. 13 Mɨkɨ memɨteyumemiwa xepɨkawanenimayaka, mɨpaɨ xeteyuriekaku 'Ixaheri kwieyaritsie pɨkarahɨiwani kename 'atsimemɨkateyurie waxuriya tayeuriwa, xemeta 'aixɨa 'iyari xepu'uwani.

14 »Kepauka 'iya kwieyaritsie xemɨ'axɨani Yawé xekakaɨyari mɨxeyetuirienitsie xekwie mayanikɨ, yu'iwa kwieya xepɨkahenawairietɨweni, meripaitɨ mɨkɨ mu'inɨatsiyarie.

15 »Xewitɨ xeikɨa ya'utainekaku munierixɨ pɨkayɨweni tewi mumierienikɨ xanetsietɨ kename 'axatiuyuri. Tsepa titakɨ mɨti'ayumieme 'aixɨa pɨtiyɨni yamehaitɨkaikaku yuhutatɨ yatɨni yuhaikatɨ memunenierixɨ.

16 »Xɨka xewitɨ tihekɨatame xeime xanetani 'itarikakɨ kename mɨkɨ tiuyuri 'utaitɨ, 17 mɨkɨ meyuhutatɨ mɨya memɨteyukumamateke Yawé hɨxie mepɨti'uni, mawari wewiwamete wahɨxie meta 'itsɨkate kemɨ'ane 'ana memɨte'uximayaka. 18 'Itsɨkate yemekɨ mepɨtetiwauni mepɨti'iwauni, xɨka yametehetimani kename mɨtihekɨata tiku'itawa meta kename yakɨ yu'iwatsie rahɨpa xeikɨa, 19 hikɨ mɨkɨ pɨta mɨpaɨ katinanuyeyeimɨkɨ yu'iwa hetsiemieme kemɨtiyurimɨkɨkai. Mɨpaɨ xepɨtehekuyeitɨaka 'axamɨti'ane xekwieyaritsie xɨka xuaweni. 20 Kepauka hipatɨ 'ikɨ memɨtetamarieni, mepɨtimamani tawarita mɨpaɨ ti'anetɨ pɨkatitixuawere xekwieyaritsie. 21 Xeime tɨma xepɨkanenimayaka. Mɨpaɨ xekeniwaruyuri xɨka xeime 'umieni mɨkɨta ke'umierieni, xɨka xeime hɨxieya watitɨni mɨkɨta hɨxieya kewatitɨiyani, xɨka tameya 'anaye'una mɨkɨta tameya ke'anaye'unarieni, xɨka mamaya wayemura mɨkɨta mamaya kewayemurarieni, yatɨni 'ɨkaya xɨka wayemura mɨkɨta 'ɨkaya kewayemurarieni.