33
Muitsexi nuiwarite 'aixɨa kemɨwaruyuri
1 Muitsexi 'akuxi kamɨwetɨ, Kakaɨyari ti'uximayatsiriwame, 'ixaheritsixi 'aixɨa kaniwaruyurieni:
2 «Yawé Tsinahi heyeyaka kaninuani:
Yuteɨterima wahetsie punua, tau 'ɨrɨya hepaɨ 'anetɨ Tsehixi kwieyaritsie,
puhekɨarixɨ Parani hɨriyaritsie paitɨ,
meta kaninuani Meriwa-Karetsi
yutserie tau 'ɨrɨya hexeiyatɨ.
3 'Ekɨ pepɨhɨkɨ 'ateɨterima pemɨwanaki'erie,
yunaitɨ memɨpatsietɨka 'amamatsie mepɨte'ane.
'Ayumieme mekameniuweiyani,
'ɨxatsi 'ahetsɨa mieme mekaniukaxexeiyani.
4 'Aitsika Muitsexi mɨtatsi'uhɨritɨa kanihɨkɨtɨni,
Kakuwu teɨterimama tiwapiini.
5 Yawé ti'aitame Ketsuruni wahetsie pɨhɨkɨtɨkai,
kepauka teɨteri memanuyetei memuyukuxeɨri,
meta yunaitɨ nuiwarite 'ixaheritsixi.
6 »Xuweni ke'ayeniereni, ke'uyeikani,
teɨterimama mepɨkayu'inɨatsinɨaka».
7 Mɨpaɨta Kura hetsiemieme kaniutayɨni:
«Yawé, Kura hiwarieya keneu'eni,
'ateɨterima keniwa'atɨa.
Kura puyumiene yutɨrɨkariyakɨ.
Keneuparewi memeye'unie wahepaɨtsita».
8 Rewi hetsiemiemeta mɨpaɨ putayɨ:
«'Urimi meta tumimi, 'apiini mɨtihɨkɨ,
pepiyetuiri tewi kemɨ'ane 'ahetsie mɨtiwiya.
Matsaha mɨrakutewatsie pepita'inɨataxɨ,
Meriwa hayaritsie mɨkɨ hamatɨa pemuyutami.
9 Mɨpaɨ putayɨ yupaapa meta yumaama wahetsiemieme:
“Tixaɨtɨ pɨkatiwarayeitɨaka”.
Yu'iwama pɨkawaretima,
meta yaxeikɨa yuniwema pɨkawaretima,
peru 'aniuki pu'eni
'atɨratutsie yapɨtikatɨa.
10 'A'aitsika Kakuwu puta'ɨkitɨa,
meta 'a'inɨari niukiyari 'ixaheri.
Mawari taiyametsie pumatiyetuiri,
'ɨkwa witsimu'ɨa meta mawari mɨtaiyarietɨka.
11 Yawé, 'aixɨa keniwayurieka kememɨteyurie
ketiniwanaki'eririeka tiwamayɨitari.
Memɨwaraye'unie watɨrɨkariya keneuka'una,
tawariri memɨkawakwitɨwenikɨ memɨwaraye'unie».
12 Mɨpaɨta Wenikamini hetsiemieme putayɨ:
«Yawé mɨnaki'erie, hamatɨana 'aixɨa 'anemekɨ ke'uyeikani,
mɨkɨ mi'ɨwiyakɨ tukarikɨ
meta kayuwatɨ hetsiena pu'uxipie».
13 Kutse hetsiemieme mɨpaɨta putayɨ:
«Yawé 'akwie 'aixɨa keyurieka
haɨtsi muyuawitsie makaneikakɨ
meta haa kwieta matineikatɨkakɨ,
14 'aixɨa ti'aneneme ketiuka'itsanani mukawiwiyetsie,
meta 'aixɨa ti'aneneme 'ikwaxi xeimetseritsie timieme,
15 'aixɨa ti'aneneme hɨritsie timieme
meta hɨri 'amanutitɨtɨtsie miemekɨ yuheyemekɨ 'aixɨa ke'itɨarieka,
16 'aixɨa mɨti'anene kwiepa mɨtixuawekɨ,
meta ke'iparewieka 'ɨtsi mɨta'a hetsie mɨkiekame.
'Ikɨ naitɨ Kutse hetsie ketiunake,
yu'iwama watsata manayexeiyarie 'aixɨa mɨtiyurienikɨ.
17 Kutse pɨmariwe tuuru mexɨakame hepaɨ,
pɨtɨrɨkaɨye tuuru yeutanaka hepaɨ.
Yu'awatekɨ pɨwatakwini nuiwarite hipame,
pɨwakuxeɨrieni kwie manunieretsie paitɨ.
Mɨpaɨ mepɨtetɨrɨkawi Manatsexi kuyaximama,
meta 'Epɨrahini kuyaximama memuyuwaɨkawa».
18 Tsawuruni hetsiemieme mɨpaɨta kaniutayɨni:
«'Ekɨ, Tsawuruni, pepɨ'atemawie pekuyeikatɨ xeikɨa,
'ekɨta, 'Itsakaxi, 'a'ixuriki kiiyarita xeikɨa pepayeka.
19 Hipame teɨteri mepɨwata'inieni hɨritsie memuhukɨ,
mana mawari memewewienikɨ 'aixɨa memɨteyuriekɨ.
Mepɨyutemamawieka haramaratsie tita waɨkawa mɨtixuawekɨ
meta mɨraye'axe xiekarita mɨti'awietsiekɨ».
20 Kahari hetsiemiemeta mɨpaɨ kaniutayɨni:
«'Aixɨa ke'itɨarieka kemɨ'ane Kahari kwieya 'amɨtayeuriya.
Kahari mana puyeika maye hepaɨ,
mamate wayetsanatɨ meta mu'ute.
21 Kwie 'aixɨa mɨ'ane panayexei yuhetsiemieme,
puyuti'utsiri mɨkɨ kwie manuyehaitɨa mɨhɨkɨtɨkaikɨ,
Kepauka teɨteri memanuyetei memɨyukuxeɨri,
mɨkɨ yapɨtikatɨa Yawé kemɨtinake,
yaxeikɨa kemɨtiwarutahɨawekai yuteɨterima».
22 Rani hetsiemiemeta mɨpaɨ kaniutayɨni:
«Rani maye nunutsi puhɨkɨ,
Watsani paitɨ mutsunane».
23 Nepɨtahari hetsiemiemeta mɨpaɨ kaniutayɨni:
«Nepɨtahari Yawé kemɨtiparewie panayuhayewa
Yawé 'aixɨa miyuriekɨ, 'aixɨa pɨ'itɨarie waɨkawa,
mɨra'aita pɨwere haramaratsie 'uye'atɨkaitɨ
meta makuwakitsie paitɨ».
24 'Atsexi hetsiemiemeta mɨpaɨ kaniutayɨni:
«'Atsexi matsi waɨkawa 'aixɨa pɨ'itɨarie yu'iwama watsata,
'iwamama yunaitɨ meke'inaki'erieka,
meta yu'ɨkatetsie huriwa hatseitiyarikɨ waɨkawa kewiriyarietɨkani.
25 'A'ituparite warita mauku'uwe tepɨa meta wurunitse tepɨayari pɨhɨkɨtɨni,
'apekereutere 'ape'uyeikatɨ petɨrɨkaɨyetɨ.
26 »Xewitɨ pumawe Ketsuruni Kakaɨyarieya hepaɨ 'aixɨa tiuka'iyaritɨ,
xeparewienike muyuawitsie pakaneika,
haitsata, waɨkawa mariwetɨ.
27 Kakaɨyari yuheyemekɨ 'amuyeika 'ahetsie pununuwame,
yuheyemekɨ pɨmatsi'atu'u.
Memɨmatsi'aye'unie 'ahɨxie pɨwataweiya.
Pɨmatsita'aitɨani pemɨwareuyehɨanikɨ.
28 'Ixaheri, tixaɨtɨkɨ pepɨkareuyukweriwayurieka,
'Axekeneu'uwani hipatɨ mekaxe'aye'uniekakɨ, Kakuwu nuiwarimama.
Xekwie waɨkawa tɨriku pexeiya meta kaxie winuyari,
muyuawi xeheima muyema haa puxuawitɨa.
29 'Ixaheritsixi, xekeneyutemamawieka yutukarikɨ.
¿Tawari kemɨ'ane 'aku xehepaɨ,
mepɨwikweitsitɨarie Yawé hetsie?
Mɨkɨ 'ahetsie nunuwame pɨhɨkɨ meta metsiparewiwame,
mɨkɨ xe'ixipara pɨhɨkɨ kɨmana xemɨtehayu'iwa.
Memɨxekwitɨwe xehɨxie mepɨtitunuma'uni,
wawari, hetsiena xema'uwe pakɨne».