3
Tukari puxuawe kemɨtiuyurieni hepaɨtsita
1 Xexuime tukaritetsie pɨtika'inɨaritɨka, tukari puxuawe naimetsie timieme kemɨtiuyurieni muyuawi hetɨa:
2 Kepauka temɨtinunuiwa,
kepaukata temɨkwini,
kepauka mɨtiuka'iteɨrita,
kepaukata temɨteka'uta,
3 kepauka mɨtiuyumieni,
kepaukata muwaranayexɨrɨwani,
kepauka mɨtiuka'unakɨ,
kepaukata menukuketɨanikɨ,
4 kepauka mutatsuakanikɨ,
kepaukata mutanawenikɨ,
kepauka muyuhiwerieka,
kepaukata temawierika mexeiyani,
5 kepauka tetexi mutaxɨrieni,
kepaukata mititɨkɨ,
kepauka muyutapatɨkani,
kepaukata muyutateutɨaxɨani,
6 kepauka mɨtikuwauneni,
kepaukata mɨkatikuwauneni,
kepauka mutiuti'uta,
kepaukata mɨrexɨrieni,
7 kepauka mutiutatsana,
kepaukata mɨtiutawipa,
kepauka mɨka'utaniukani,
kepaukata mɨtikuxatani,
8 kepauka muyunaki'erietɨkani,
kepaukata mɨtiyuka'uxiwe'erieka,
kepauka mukuyaxatɨni,
kepaukata kayuwatɨ memexeiyani.
Tixaɨtɨ pɨkarayani tsepa waɨkawa temɨte'uximaya
9 Tixaɨtɨ pɨkara'iwa kemɨ'ane waɨkawa tiyu'uxitɨatɨ mɨti'uximaya. 10 Mɨpaɨ nepɨtiniere Kakaɨyari mɨpaɨ pɨtiwarupitɨa hahetemekɨ, tewi mɨpaɨ muti'uximayakakɨ. 11 Kakaɨyari witsiti'aneme katiniunetɨani, mɨpaɨ tewi katiniupitɨani mɨpaɨ mɨtiku'eriwanikɨ 'uxa'atɨniwarie, tsepa tewi mɨkaheitimaitɨyeika Kakaɨyari 'uximayatsikaya mɨkɨ kemɨtiyuriene matɨari paitɨ meta 'imatɨrieka.
12 Ne nepɨtimate tewitsie puxuawe xeikɨa, temawierika meta 'aixɨa mɨtiyurienekɨ mexi'ayeyuri. 13 Mɨpaɨta nepɨtimate kename Kakaɨyari 'imikierieya hɨkɨ, tewi mɨtikwakakɨ mɨti'iekakɨ, meta naime yu'uximayatsikatsie timieme mɨra'inɨnɨatani. 14 Yaxeikɨata mɨpaɨ nepɨtimate naime Kakaɨyari mɨtiunetɨa yuheyemekɨ katiniwiyani, pɨkayɨwe temitanɨitɨanikɨ meta temenakaxɨrienikɨ, Kakaɨyari mɨpaɨ katiniuyurieni temimakaxenikɨ.
15 Hikɨ tita mɨtixuawe, katinixuawekaitɨniri,
ketitamɨtinenikekai, 'ariri katinixuaweni.
Kakaɨyari mɨpaɨ katiniyurieneni 'ɨxatsieya yamɨreuyuhanenikɨ.
'Axaketemɨteyurie tatukaritsie
16 Matsi tawari tixaɨtɨ nekatinixeiyanita 'ikɨ tukaritsie: 'axakatiniyɨaneni hakewa meta'iwawiyarienitsie, hakewa mɨheitserie mekuxaxatsiwatsie 'axamɨti'ane kanixuaweni. 17 Merikɨ mɨpaɨta nepɨtiu'eri: «Kakaɨyari heitserie mexeiya meta 'axamɨtiuka'iyari kaniwaranutaxɨriemɨkɨ, muxuawekɨ tukarite yamɨtiuyurienikɨ naimekɨ meta hakewa yamɨreyurienikɨ».
18 Meta mɨpaɨ nepɨtiu'eri teɨteri kememɨteyumate wahepaɨtsita: «Kakaɨyari kaniwa'inɨataneni, mɨkɨ mɨpaɨ memɨteheyutimanikɨ kename yeuta memɨte'u'uwa wahepaɨ me'anene. 19 Teɨteri yeutari wahepaɨ mekatenitakukuweni, yaxeikɨa mekatenita'ikwewani metakukuwetɨ yuxexuitɨ, yaxeikɨa meta kani'aneneni yunaitɨ kememɨte'ayeyuyuri, 'ayumieme tewi pɨkawe'eme tewaxi wahetsiemieme. Yurikɨ naitɨ tixaɨtɨ pɨkarayani, 20 'Axeikɨa naitɨ katiniyemieni.
»Naitɨ tumuanaritsie mɨtiyetɨa,
tumuanaritsie katininuamɨkɨ.
21 »¿Kemɨ'ane pɨtimate xɨka tewi 'iyarieya 'anutiyeikani 'ameutitewatsie, meta yeutari wa'iyari xɨka 'anukayeikani, 'emeukatewatsie kwiepa?» 22 Mɨpaɨ nepɨretima, tewi hetsie puxuawe xeikɨa, yu'uximayatsikatsie mɨtiwiyanikɨ mɨkɨ hetsiena pɨtiunakixɨ. Kamɨtsɨ, xewitɨ pumawe xeime mɨpaɨ mɨtitahɨawekɨ kemɨtiyɨnikɨ.