1 Hikɨ ti'aitame mɨkɨ tɨkaritsie pɨkakuwekai, 'ana katiniutanɨ'ani kemɨtiuyɨ xapayari muhuriyamiekɨ, kepauka mɨti'aitakaitsie mieme makaterɨwarienikɨ. 2 Mana mɨpaɨ tineuku'ukaitɨni kename Maxirukeyu Wihitani meta Teretsi mame warutaxatakai ti'aitame hɨwemetemama, mɨpaɨ memɨtekuxatakaikɨ kename ti'aitame 'Atsuheru memienikekai.

3 Ti'aitame mɨpaɨ kaniutayɨni:

—¿Ke'u'itɨarie tita tiyetuiriyarie yu'iwarika Maxirukeyu 'ikɨkɨ?

'Iparewiwametemama mɨpaɨ mekatenita'eiya:

—Tixaɨtɨ 'atsipɨkatiyuriwe hetsienamieme.

4 Kepauka 'Amani paratsiyu kitenie takwa munua ti'aitame tawawirienike, Maxirukeyu kɨye muta'aitakaitsie pɨhetsiena miemetɨkai. Hikɨ ti'aitame kaniuta'iwauni.

—¿Kemɨ'ane takwa puyeika?

5 'Iparewiwamete mɨpaɨ mekaniutiyuani:

—Takwa muyeika 'Amani kaniyɨaneni.

Ti'aitame mɨpaɨ katiniuta'aita:

—Kewatayani.

6 Kepauka 'Amani muwataha ti'aitame mɨpaɨ katinita'iwawiya:

—¿Kehepaɨ 'itɨariwa tewi ti'aitame 'aixɨa mɨtixeiya?

Hikɨ 'Amani mɨpaɨ kaniutayɨni yuxatatɨ: «¿Kemɨ'ane tawarikuta ti'aitame 'aixɨa pɨtixeiyarie nexeikɨa nekanihɨkɨtɨni?» 7 'Ayumieme mɨpaɨ kaniutayɨni:

—Ti'aitame tewi 'aixɨa mɨtixeiya, 8 'ixurikikɨ ketiutanɨ'ani ti'aitame menakatɨkɨkai meta kawayuya manutiyeixa yumu'utsie witsiti'anenekame reukapikame. 9 'Ixurikite meta kawayu ketiyetuiriyarieni ti'aitame kemɨ'ane ti'uximayatame 'aixɨa mɨtixeiya, ti'aitame tewi 'aixɨa mɨtixeiya mɨtitiketɨanikɨ, ke'utiyani kiekaritsie 'ehanatɨ, mɨpaɨ tiuhiwatɨ: “Mɨpaɨ kani'itɨariwani tewi ti'aitame 'aixɨa mɨtixeiya”.

10 Ti'aitame 'Amani mɨpaɨ katiniutahɨawe:

—Yapauka kenemie 'ixuriki pe'ahurietɨ meta kawayu pe'ahanatɨ yaketineuyuri kepemutayɨ, Maxirukeyu huriyu tewiyari ti'aitame kitenie mutaka. Pepɨkaratɨtɨmaiyani nixeiniukiyari tɨma naimekɨ kepemutayɨ yaketineuyuri.

11 Hikɨ 'Amani 'ixuriki 'anuhurieka meta kawayu 'anuhanaka, Maxirukeyu katiniutikemaritɨani, kawayutsie 'anakaime kiekaritsie 'ehanatɨ kaniuyeikakaitɨni, mɨpaɨ 'utaitɨ: «Mɨpaɨ kani'itɨariwani tewi ti'aitame 'aixɨa mɨtixeiya».

12 Maxirukeyu kaninuani ti'aitame paratsiyu kitenie, 'Amani yukieta kanakunuani yumexɨitɨatɨ, nutuixietɨ heuyutinatɨ yɨhɨxie. 13 Yu'ɨya Tseretsi meta yunaime yuhamikuma katiniwarutaxatɨani kemɨranuyeyakai.

Hikɨ 'ɨxatsitamete waɨkawa memɨtemaiwawekai meta 'ɨyaya Tseretsi mɨpaɨ mekatenitahɨawe:

—Maxirukeyu xɨka pemiemɨkɨ, xɨka huriyu tewiyari hɨkɨtɨni pepɨkayɨwekaxɨani. Kaniyuritɨni 'ekɨpɨta pekanimieriemɨkɨ.

14 Hikɨ mexi'akuxi metekuxatakai 'Amani hamatɨa, mekaniu'axɨani ti'aitame te'uximayatsiriwamete mekaneiwitɨni mexɨima 'ixɨararipa 'Etsitexi meiwewiekai hetsɨa.