1 Xewitɨ kaniuyeikakaitɨni Rewi nuiwarieya, kepauka mutineɨkixɨ mana tsiere mieme kanewitɨni. 2 Mɨkɨ kaniutihukata nunutsi kanayexeiya, 'ixeiyaka kwinimieme mɨtitemaikɨkaikɨ, kaniti'awieta haika metseri. 3 Kepaukari mɨkayɨwekai mi'awietanikɨ tsikɨiwiti kaniutawewieni, xɨrɨka kanitawirieni kwetsɨka mɨyɨwi nɨkame, mana nunutsi kanikateni hatetsita kaneikweni, hakatsata kanihɨani hapa mɨye'ukaitɨa, Niru hatetsitayaritsie. 4 Hikɨ nunutsi kurieya yateewa kaniuyuhayewa, niereke kemɨranuyeyanikekai.

5 Hikɨ mana kaniukateni 'uka Parahuni niweya ku'ɨwanetɨ, Niru hatuxameyaritsie. Te'i'uximayatsiriwamete hatetsita mekaniu'uwakaitɨni, yapauka Parahuni niweya tsikɨiwiti kaniuxeiya hakatsata kaniyewiekaitɨni, xeime ti'uximayatame kaniutanɨ'ani mituimiekɨ. 6 Kepauka Parahuni niweya tsikɨiwiti manutiyepi nunutsi kaniuxeiya 'utatsuakame, kanitinenimayata mɨpaɨ kaniutayɨni:

―Hepɨrayu nunutsi pɨhɨkɨ.

7 Hikɨ mɨkɨ nunutsi kurieya Parahuni niweya mɨpaɨ katiniutahɨawe:

—Ya xeime 'ukaratsi nepɨti'inimie hepɨrayu tewiyari mitsitsitɨanikɨ, mitaweriyakɨ mɨkɨ nunutsi 'ahetsiemieme.

8 Mɨkɨ mɨpaɨ katinita'eiya:

—Kenemie kenewitɨmie.

Kurieya kaneyani, peru nunutsi maamaya kani'atɨani. 9 Parahuni niweya mɨpaɨ katinitahɨawe:

—Kenanutu'i 'ikɨ nunutsi kenetsitsitɨaka keneneutaweriri, ne nepɨmatipitɨaka mɨpaɨ pemɨtiyurienikɨ.

Mɨpaɨ tiɨyɨku mɨkɨ nunutsi maamaya kaneituni 'itsitsitɨatɨ kanitaweriya. 10 'Utawerekuri nunutsi, kaneiwitɨni Parahuni niweya hetsɨa, mɨkɨ kaniyutaniwetɨani, meta Muitsexi katiniterɨwa mɨpaɨ 'utaitɨ: «Ne hapa nepetitui».

11 Kepauka Muitsexi 'amuyutama, yu'iwama kaniwarekuxeiya, kaniuniere kememɨte'uximatɨariekai. Xeime kaniuxeiya 'ekipitutanaka hepɨrayu tewiyari tiwayakaku. 12 Hikɨ hanieretɨyaka nixewitɨ hawaikɨ mɨkareyeikakaikɨ mɨkɨ 'ekipitutanaka kaniumieni, kaniti'awieta xiekarita. 13 'Uxa'arieka hutarieka kanikuyani, hipameta kaniwaruxeiya meyukwitɨweme yu'iwamatɨ hepɨrayutsixi, mimainekai kaniuta'iwawiya:

—¿Titayari 'a'iwa petimiene?

14 Mɨkɨ kanita'eiya:

—¿Kemɨ'anekuta 'ekɨ matsi'utahɨawixɨ 'itsɨkamekɨ tahetsie pemɨti'aitanikɨ? ¿Netsɨta penenemieni 'ekipitutanaka hepaɨ?

Mɨyamɨtiutahɨawariekɨ Muitsexi waɨkawa kaniutimani mɨpaɨ katiniu'erieni: «Xɨari nepahekɨarixɨ kenemɨtiuyuri». 15 Mɨyatiɨyɨku Parahuni katinetimani, Muitsexi kanimienikekaitɨni, peru Muitsexi kaniyuta'una Mariyani kwieyaritsie paitɨ kaneyani, putsu matiniere kaniuyuhayewa.

16 Mawari wewiwame Mariyani kiekame 'atahuta meyupaɨmeme 'ukari kaniwarexeiyakaitɨni, mɨkɨ mekaniuyehanɨtɨkɨkakaitɨni muxatsi mematiharewe memɨtihɨniyakɨ, yupaapa muxatsimama mewatiharitɨanike. 17 Peru muxatsi wahɨwemete 'ukitsi mana mekani'axekaitɨni mewataweiyake. Heiwa Muitsexi wahetsie kaniutanuani, 'ukitsi kaniwarutaweiya, 'ukari wamuxatsima kaniwarutiharitɨani. 18 Kepauka 'ukari memakunuaxɨa yupaapa kie Xehueri, mɨkɨ mɨpaɨ katiniwaruta'iwawiya:

—¿Titayari hikɨ kwitɨwa xete'u'axɨa?

19 Mɨkɨ mɨpaɨ mekaniutiyuani:

—Xewitɨ 'ekipitutanaka tahetsie kanetanuani, muxatsi wahɨwemete haa kememɨtekwerie, matsita haa watihanaka muxatsi kaniwaretiharitɨani.

20 Mɨkɨta mɨpaɨ katiniwarutahɨawe:

—¿Hakewari mɨkɨ 'uki? ¿Titayari yuxaɨta xeteheiku'eiri? Xekeneta'ini mɨtikwanikɨ.

21 Muitsexi kaniuyuwaɨriya mɨkɨ hetsɨa mukanikɨ, mɨkɨ kaniwitɨtɨani yuniwe Tsepura. 22 Mɨkɨ nunutsi xeime kanayexeiya, Muitsexi Keritsuni katiniterɨwa, mɨpaɨ tiu'erieka: «'Ateewapai nepɨkiekame xaɨtsie nepuyeika».

23 Mɨixa wiyari 'anuyeyaku, ti'aitame 'Ekipitu kiekame kaniumɨni. 'Ixaheritsixi yaxeikɨa mekateniuka'eniwakaitɨni, waɨriyarika te'uximayatamete mehɨkɨtɨtɨ, mekaniutihiwakaitɨni parewiya meheuyehɨatɨ. Wahiwari Kakaɨyari kaniu'enieni mewaɨripiekaku. 24 Hikɨ 'u'enaka kememɨte'uximatɨariekai kanaye'erieni tɨratu kememɨte'uwewi 'Apɨrahami, 'Itsahaki meta Kakuwu hamatɨa. 25 Mɨpaɨ Kakaɨyari 'ixaheritsixi katiniwaraye'erieni, maye'akaikɨ yamemɨteyuriekakɨ.