1 Mɨpaɨ metewarutahɨaweka Muitsexi 'Aruni Parahuni hɨxie mekaniti'uni mɨpaɨ mekatenitahɨawe:

—Mɨpaɨ paine Yawé 'ixaheritsixi takakaɨyari: “Keniwarupitɨa neteɨterima makumawetsie paitɨ memɨyehukɨ 'ixɨarari memɨwewienikɨ nehetsiemieme kemɨnetinake”.

2 Parahuni mɨpaɨ kaniutayɨni:

—¿Kemɨ'ane mɨkɨ Yawé pɨhɨkɨ, para ne nemenu'enienikɨ 'ixaheritsixi nemɨwapitɨanikɨ? Ne Yawé nepɨkamate, ne nepɨkawapitɨani 'ixaheritsixi memɨyehukɨ.

3 Mɨkɨta mɨpaɨ mekaniutiyuani:

—Hepɨrayutsixi wakakaɨyari 'upɨtatsihanakirɨme, 'ayumieme tame haika tukari tepuhuni makumawetsiepai, Yawé temɨtehetimawirienikɨ takakaɨyari. Xɨka mɨpaɨ tekate'uyurieni waɨkawa pɨtatiukwinitɨawe, tixaɨtɨ 'upɨranɨ'ani kwiniya yatɨni pɨtatsi'ukwiwe yu'ixiparakɨ.

4 Ti'aitame 'Ekipitu kiekame mɨpaɨ kaniutayɨni:

—Muitsexi, 'Aruni, teɨteri xepɨkawa'uximatɨaka memɨte'uximayakakɨ. Xekenakunuaxɨa xemɨteha'uximayatsie. 5 Xekeneutimaixɨa mepɨyuwaɨkawa teɨteri 'ena 'Ekipitu, xemeta xekatewapitɨa memɨte'uximayaka.

6 Mɨkɨ tukaritsie Parahuni mɨpaɨ katiniwaruta'aitɨani te'aitamete 'ekipitutari meta 'ixaheritsixi memɨtewa'aitɨa: 7 «Xɨnariya tata'ime memɨtiwewienikɨ 'ɨxa xepɨkawayetuiriwaniri, mɨkɨ mekeheiteɨxiyuni yɨkɨmana. 8 Peru xeme yaxeikɨa paɨmeme xekeniwawawirieka xɨnariya, xepɨkahenukahɨpani memɨyɨ'ɨraraxie mekanihɨkɨtɨni, 'ayumieme mɨpaɨ mekanetenikɨhɨaweni: “Ketaneupitɨa takakaɨyari temɨtemawirieyukɨ”. 9 Kwinimieme ti'uxiyakame xekeniwa'aitɨaka. Xeketeniwa'aitɨaka yamemɨte'uximayakakɨ. Mɨpaɨ 'itarika mepɨkahanu'enieni».

10 Te'aitamete 'ekipitutari mekanayekɨne 'ixaheritsixi memɨtewata'aitɨanikɨ, meta teɨteri memɨtewa'aitɨa mɨpaɨ mekateniwarutahɨawe: «Parahuni mɨpaɨ kanaineni: “'Ɨxari xepɨkayetuiriyarieniri. 11 Xemeri xekaniwauyuni tsepa hakewa xemeikaxeiya, perutsɨ yaxeikɨa paɨmeme xepɨtiwewiwani kexemɨte'aitɨarie”».

12 Mɨpaɨ tiuyɨku 'ixaheritsixi mekaneutayeixɨani 'Ekipitu kwieyaritsie meteheuteɨxɨtɨkaitɨ mɨraku'etsitɨretsie, 'ɨxa memɨyetuiriyarɨwakaitsiemieme. 13 Memɨtewa'aitɨa mekaniyeweiyakaitɨni mɨpaɨ metewakɨhɨawetɨ: «Xeketenaye'atɨwani kexemɨte'aitɨarie 'ɨxa xemɨyetuiriyaruwakai hepaɨ». 14 Matsita memɨte'aita Parahuni hetsɨa miemete 'ixaheritsixi memanuyetei mekaniwatiwayakaitɨni mɨpaɨ metewaku'iwawiyatɨ: «¿Titayari takai meta hikɨ xekate'aye'atɨa kepapaɨmeme xemɨ'aitɨarie, meripai xemitiwewiwakai hepaɨ?»

15 Memanuyetei 'ixaheritsixi mekanekɨne Parahuni hetsɨa, mɨpaɨ mekateneitahɨawe:

—¿Titayari 'ekɨ mɨyapetiwayuriene te'a'uximayatamete? 16 'Ɨxari xemɨkatatsiyetuiriwa. Mɨyatɨtɨ yaxeikɨa papaɨmeme tetewawiyarie xɨnariya, 'etsimɨpaɨmeni hepaɨ tetetiweiwa. Ti'aitame 'ateɨterima 'aixɨa mepɨkateyurie.

17 Parahuni mɨpaɨ kaniutayɨni:

—Xemɨyɨ'ɨraraxie, xemɨyɨ'ɨraraxie xekanihɨmetɨni. 'Ayumieme mɨpaɨ xekaniutiyuaneni: “Ketaneupitɨa Yawé takakaɨyari temɨtemawirieyukɨ”. 18 Hikɨ xekenehu xeketene'uximayaka. 'Ɨxa xepɨkayetuiriyarieniri, peru yaxeikɨa paɨmeme xepɨtiwewiwani xɨnariya.

19 Te'uximayatamete memanuyetei 'ixaheritsixi mɨpaɨ mekatenetimani mexɨima katinaniuwakaitɨni, kepauka mɨpaɨ mɨtiutaniukie kename yaxeikɨa papaɨmeme meyetuayanikekai. 20 Muitsexi hetsɨa meta 'Aruni hetsɨa me'u'axɨaka kitenie memuwakwewiekai, 21 mɨpaɨ mekateniwarutahɨawe: «Yawé kexeheutixeiyaxɨani kexehanutaxɨrieni. Xeme ya'ane xeheutiwiwiexɨaku 'axatepu'ɨatɨka Parahuni hɨxie yaxeikɨa memɨte'i'uximayatsirie wahɨxie, xeme xekateniuyurieni 'ixipara xemɨwarukweitɨa memɨtatsikwinikɨ».

22 Muitsexi Yawé mɨpaɨ katiniutahɨawe:

—Neuxei, Yawé, ¿titayari 'ikɨ kiekari 'axapetiyuriene? ¿Mɨpaɨ mɨti'anenikɨ penereyenɨ'a? 23 Kepaukapai Parahuni hɨxie nemutaniu 'ahetsiemieme, tixaɨtɨ 'atsipɨkatiyuriwe matsi pɨta pɨwananaima 'ikɨ teɨteri memɨ'ateɨterima. 'Ekɨta 'atsipepɨkatiyuriwe pewaxɨnake.