15
Muitsexi kemɨtitanɨawaxɨ
1 Hikɨ Muitsexi meta 'ixaheritsixi xeime kwikari mekaniutakwika Yawé hetsiemieme, mɨpaɨ kananuyɨneni:
Yawé nepɨtanɨawa, mariwemekɨ mɨrayu'iwaxɨkɨ
haramaratsie pɨwareukaxɨri kawayutsixi meta teɨteri memutekai.
2 Yawé pɨnetɨrɨkariya meta pɨnekwikari,
mɨkɨ pɨnetsiwikweitsitɨwame.
Mɨkɨ pɨnekakaɨyari, nepinɨawani,
mɨkɨ nepaapa Kakaɨyarieya pɨhɨkɨ, 'ayumieme 'aixɨa nepaineni hetsiena mieme.
3 Yawé kuya meuyutamiewe kanihɨkɨtɨni,
Yawé katinitewaka.
4 Yawé haramaratsie kaniwareukaxɨrieni,
Parahuni kaxetatemama meta kuyaximama.
Te'uximayatamete 'ekipitutari 'aixɨa memɨtekahu paratsiyuta
mekaniukayunixɨani Haramara Mɨxeta hetsie.
5 Haramara 'amatiyewatsie mekaniukayunixɨani,
meukatewatsiepaitɨ tetexi hepaɨ mekaniukayunixɨani.
6 Yawé, 'atɨrɨkariya pepuhekɨataxɨ mariwemekɨ,
Yawé, memɨtatsi'aye'uniekai pepɨwarutitsanaxɨa.
7 Mariwemekɨ pepɨtiuyuri
pepɨwaruka'unaxɨ 'aneneɨkixiwima,
waɨkawamekɨ pepuyeha'a,
xatsi hepaɨ xeikɨa mepɨte'utai.
8 Xei 'iiyayarikɨ pepɨtiuyuri,
haa manutayepierekɨ,
hamewari kayuwatɨ pɨtiu'ui 'ixumeri hepaɨ pɨtiyuxexeiyakai,
haa pɨkakuyuatɨkatei tetɨata paitɨ.
9 Taneɨkixiwima mɨpaɨ meputiyuanekai:
«Hikɨmɨ tepɨwaruweiyani,
nepɨwaranuku'axe.
Tinaime tepɨtewarenawairieni wapiini, waɨkawa temɨtehexeyanikɨ.
Ta'ixipara tepɨwatihapaxɨani
tamamakɨ tepɨwarekwini».
10 Peru 'ekɨ xeimieme pewaruhɨtsieku haramara pɨwareukakwai,
mepukayunixɨa tepɨa mahete hepaɨ.
11 Yawé, xewitɨ pumawe kakaɨyarixi watsata 'ahepaɨ 'anetɨ.
Xewitɨ pumawe 'ahepaɨ timariwetɨ meta 'ahepaɨ tipatsietɨ.
'Ekɨ, mariweme pemɨtiyuriwe,
'ekɨ yemekɨ pepɨtatsihɨxiyatsitɨa 'atɨrɨkariyakɨ.
12 Kepauka 'ekɨ 'atserie pemutatseraxɨ,
kwie pɨwareukakwai.
13 Waɨkawamekɨ pewanaki'erietɨ pepɨwaruwitɨxime 'ateɨterima pemɨwarutawikweitsitɨa,
'atɨrɨkariyakɨ pepɨwaruwitɨxime 'akiekari makupatsie.
14 Naitsarie kwiepa nuiwarite mepɨtimamani me'enaname,
kepauka memɨtehetimani piritsiteutsixi mepetinututuixieni.
15 'Erumi kiekatari wa'ukiyarima waɨkawa mepɨtimamani,
waɨkawa meputiyɨyɨakatɨkani 'itsɨkate Muhawi kiekatari.
Meta Kanani kiekatari meputiweranaxɨa,
16 mɨkɨtsɨ wahetsie pɨtinakeni marika.
Yawé, kepemɨtitɨrɨkaɨyekɨ,
mekaniuwawetɨ mepakɨne tetexi wahepaɨ
kepaukake 'ateɨterima memanuyekɨne,
teɨteri 'ahetsiemieme pemɨwarutinanai.
17 'Ekɨ pepɨwareutawitɨni, pepɨwaka'iteɨta,
'iya hɨritsie kemɨ'ane 'ahetsɨamɨmieme,
Yawé, 'ekɨ hakewa pemeyeika,
hakewa 'ekɨ, Yawé, 'atuki pemeyutawewiri.
18 Yawé katini'aitakamɨkɨ yuheyeme, tukarikɨ.
Miriyami kwikarieya
19 Kepauka Parahuni kawayutsiximama meta kaxetamama teɨteri me'utetɨ haramaratsie memanukɨnekekai, Yawé yakatiniuyurieni haa waheima muyeurienikɨ. 'Ixaheritsixi mekayu'iyaritɨatɨ mepanukɨ kwie wakimetsie. 20 Merikɨtsɨ Miriyami Kakaɨyari niukameya, 'Aruni taruya, kaitsawiwame kaniuti'ɨni, hipatɨta 'ukari mekaniweiyakaitɨni yukaitsakɨ mete'ukayuitɨwatɨ meta mete'ukaye'atɨ. 21 Miriyami mɨpaɨ katiniukwikakaitɨni:
Yawé xekenenɨawani, mɨkɨ mariwemekɨ mɨrayu'iwaxɨkɨ,
kawayutsixi wahetsie memutei
meta kawayutsixi haramaratsie pɨwareukaxɨri.
Haa matsiwi Maraha meta Herimi
22 Merikɨtsɨ Muitsexi kaniwaruta'aitɨani 'ixaheritsixi Haramara Mɨxeta hetsie memayekɨnekɨ meta makumawetsie memɨtayunekɨ Tsuhuxi kwieyaritsie. 'Ixaheritsixi mana mekaniuhukaitɨni haika tukari makumawetsie haa mekataxeiyawawetɨ. 23 Hikɨ mekaniuta'axɨani Maraha mɨrakutewatsie, mana mɨpaɨ katinakutewakaitɨni mana haa hatsiwitɨ muxuawekaikɨ, mana mepɨkatenewiekairi meheuharikutɨ. 24 Merikɨte mɨkɨ mekaniutiniukixietɨkɨne Muitsexi hepaɨtsita, mɨpaɨ mete'iku'iwawiyatɨ: «¿Ketita tetetihareni?» 25 Muitsexi Yawé kaniutawawirieni, mɨkɨ pixeitsitɨa kɨye yatewime, mɨkɨ Muitsexi hapa kaneikahɨani, yapauka haa 'aixɨa ha'anetɨ kanayani.
Mana Yawé kaniwaruta'inɨata, kaniwarupitɨani 'inɨari niukiyari kememɨtekahuni. 26 Mɨpaɨ katiniwarutahɨawe: «Netsɨ Yawé xekakaɨyari nekanihɨkɨtɨni. Xɨka neniuki xe'enietɨ yaxetekahuni heitseriemekɨ, xɨka 'inɨari niukiyaritsie yaxetekahuni kemɨreuyewetse meta ne'aitsikatsie, ne hatsuaku kwiniya nepɨkahanɨ'ani xehetsie, 'ekipitutsie kenemɨtiuyuri. Netsɨ Yawé nekanihɨkɨtɨni, hatsuaku kwiniya xehetsie pɨkatinake».
27 'Arikeke 'ixaheritsixi mekaneta'axɨani, 'Erimi mɨrakutewatsie, hakewa tamamata heimana huta haixayari mexuawekai meta haika tewiyari heimana tamamata takɨ mati'u, mana mekaniyuhayewa, haa mayema 'aurie.