1 »'Ɨkwa taiyame witsimu'ɨa mexayari keneutawewi 'akatsiya kɨyeyarikɨ. 2 Yaxeikɨa hatewatɨkaime, huta tewiyari heimana 'auxɨwi tsenitimeturuyari 'ayetewime meta yaxeikɨa mɨpaɨ 'atayeukame meta nauka tewiyari heimana tamamata tsenitimeturuyari 'aweme. 'Awateya naitɨ kaniyuxewiriyakamɨkɨ mɨkɨ mexa matɨa. 3 Herie keneukawiri huru hɨkɨame metatsiere naitsarie 'etsatana meta 'awateya, tenimeyaritsie hurukɨ kenata'utɨa. 4 Tenimeyari manukaniere hanira kenamanaxɨa naitsata 'etsatana mana kɨyexi meuye'unikɨ mɨkukweiyanenikɨ. 5 Kɨyexi 'akatsiya kɨyeyari keneuyuri, huru keneutiwiri. 6 'Ɨkwa witsimu'ɨa mexayari 'ixuriki meuwie hɨxie keneutaketsa kakuni meukunama, kakuni kanamikieya hɨxie, ne mana nepɨmatsikɨhɨaweni.

7 »Mukatatarenitsie 'Aruni, kepauka kɨxeme 'aixɨa mukuyuruwanitsie, 'ɨkwa witsimu'ɨa yakatinikutaiyamɨkɨ 'ɨkwa witsimu'ɨa mexayaritsie, 8 meta taikai kepauka mikutaiyanitsie. Xenuiwarima memɨtixuawere 'ɨkwa witsimu'ɨa yamekateniutitaiyakuni Yawé hetsiemieme. 9 Tawarita xeime 'ɨkwa yɨkɨ'aneme pepɨkataiyani mɨkɨ 'ɨkwa witsimu'ɨa mexayaritsie, meta mana mawari taiyariyari pepɨkakuwewiwani, meta hatsite mawarikayari meta mana winu pepɨkaheutitu'ani. 10 Xeiwiyari 'anukayeikakaku 'Aruni 'itiya mawariyari pukuwewiwani memɨtinunuiwa wahetsiemieme memɨ'itiyanikɨ. Mawari taiyame 'awateya kanitixurimamɨkɨ 'axamɨtiuyuri mɨ'itiyanikɨ. Mɨkɨ mawari taiyame yuheyemekɨ patsietɨ kanayeimɨkɨ Yawé hetsiemieme».

11 Yawé Muitsexi katiniutaxatɨani mɨpaɨ katinitahɨawe: 12 «Kepauka memaka'utɨarieni 'ixaheritsixi, yuxexuitɨ Yawé hetsɨa mekateniyutuakuni yutukaritsiemieme, memɨkatetikwikwinenikɨ kepauka memɨti'inɨatsieni. 13 Yuxexuitɨ memaka'utsie mekateniyutuakuni Yawé hetsiemieme 'ataxewime kɨramuyari pɨrata, tuki kemɨti'inɨata hixɨapa 'akame. 14 Yunaitɨ memaka'utsieni xeitewiyari wiyari memɨhɨtɨka mɨkɨ mawari mekaniyetuakuni Yawé hetsiemieme. 15 Yutukari memɨtawikweitsitɨanikɨ, yunaitɨ yaxeikɨa paɨpaɨmeme mekaniyetuaxɨakuni, waɨkawa mɨrexeiya meta mɨkarexeiya. 16 'Ekɨ mɨkɨ pɨrata pekananɨ'ɨimɨkɨ 'ixaheritsixi memiyetuani, pekaniyetuamɨkɨ 'ixuriki tukiyari hetsiemieme mayanikɨ. Mɨpaɨ xɨka xete'uyurieni Yawé 'ixaheritsixi kɨmana memɨte'uyutua kanixeiyakamɨkɨ memɨkakwinikɨ».

17 Yawé Muitsexi katiniutaxatɨani, mɨpaɨ katinitahɨawe: 18 «Katsu maimawame keneutawewi 'ayeume wurunitse tepɨayarikɨ, meta 'ɨkayari yaxeikɨa wurunitsekɨ wewiyakame, 'ixuriki tukiyari manuwe meta mawari taiyame wahixɨapa keneutaketsa. Haa kenakatu'a, 19 kɨmana 'Aruni meta niwemama mekaniukamaimawakuni meta yɨ'ɨkate mekanitihauxinakuni. 20 Kepauka memeutahaxɨani tukita, yatɨni kepauka mɨratimawatɨre hepa memukɨne taiyarika mawariyari Yawé hetsiemieme mewewienike, mana meheuyuhauxinatɨ 21 yumamatetsie meta yɨ'ɨkatetsie memɨkakukuwenikɨ. 'Ikɨ 'aitsika hawaikɨ pɨkahau'axe 'Aruni hetsiemieme meta nuiwarimama wahetsie».

22 Yawé Muitsexi katiniutaxatɨani, mɨpaɨ katinitahɨawe: 23 «Naime 'ikɨ ketineukuxeɨri witsimɨtiu'ɨatɨka 'aixɨa mɨti'anene: 'ataxewime kiruyari mixaxi mɨhaxiki, haika kiruyari witsimu'ɨa kanera, haika kiruyari 'uwá witsimu'ɨa, 24 'ataxewime kiruyari katsiya kararayari witsimu'ɨa, nauka rituruyari huriwa hatseitiyari, kemɨti'inɨarikai tukita 'ana. 25 Mɨpaɨ tipaɨmemekɨ hatseiti pekanikawewimɨkɨ, witsimɨtiu'ɨatɨka tiwewiwame hepaɨ. Mɨkɨ hatseiti mɨpatsie kanayeimɨkɨ. 26 Mɨkɨkɨ 'ixuriki tukiyari pekanikawirimɨkɨ meta tɨratu kakuniyari, 27 mexa meta naime mana mɨrapine, kɨxeme 'uitɨwame meta naime tita mɨreutinɨ'ɨ, 'ɨkwa witsimu'ɨa mexayari, 28 mawari taiyariyari wewiwame naime tita mɨreutinɨ'ɨ, meta maimawame yaxeikɨata 'ɨkaya hetsiena muyema. 29 Mɨpaɨ petiyurieme mɨkɨ yemekɨ tipatsietɨ katinayeimɨkɨ, xɨka mɨkɨ piinite tiukumayuani patsietɨta kanayeimɨkɨ.

30 »'Aruni meta niwemama keniwarukawiri, mepatsiekame keniwarayeitɨa nemawari wewiwamete memɨhɨkɨtɨnikɨ. 31 'Ixaheritsixi mɨpaɨ pekatiniwatahɨawimɨkɨ: “'Ena mɨreutiyune, 'ikɨ nehatseiti mɨpatsie kanihɨkɨtɨkamɨkɨ. 32 Hipameta teɨteri xepɨkawakawiriwani, meta hatseiti hepaɨna reukuwewiyakame xepɨkawewieka. Mɨkɨ hatseiti mɨpatsie kanihɨkɨtɨni, mɨpaɨ xeketenemaika. 33 Kemɨ'ane xeme hepaɨna 'aneme witsimu'ɨa mɨkawewieni, xeime kemɨ'ane mɨkamawari wewiwame mɨkawirieni, mɨkɨ yukiekaritsie kanayeweiyariemɨkɨ”».

34 Yawé Muitsexi mɨpaɨ katiniutahɨawe: «Yaxeikɨa tipapaɨmeme ketineukuxeɨri hipame kɨyexi tsuayari, meta 'amɨwaxi, kariwanu meta 'ɨkwa hɨkɨa, 35 mɨkɨ naime ketineunɨitɨa 'ɨkwa witsimuku'ɨare mayanikɨ, 'ɨkwa witsimu'ɨa wewiwamete wahepaɨ. 'Una kenanutiwiwi, 'ɨkwa hɨkɨa mɨpatsie mɨhɨkɨtɨnikɨ. 36 Yapaɨmeme keneutɨxi tumuanime kenayeitɨa, 'ixuriki tukiyarita kakuni hɨxie kenamana, hakewa ne 'ahamatɨa nemɨretixaxatani. Mɨkɨ xehetsiemieme 'ɨkwa witsimu'ɨa yemekɨ pɨpatsieka, 37 tawarita hepaɨna reukuwewiyatɨ pɨkayuwewieneni, mɨkɨ Yawé hetsiemieme kanihɨkɨtɨni. Xeme mɨpaɨ xeketenemaika patsiekame xekenayeitɨaka. 38 Kemɨ'ane mɨkɨ 'ɨkwa witsimu'ɨa mɨkawewieni 'i'ɨkwimɨtɨ, mɨkɨ yukiekaritsie kanayeweiyariemɨkɨ».