17
Kaxie nanari meta kwixɨ
1 Yawé yuniukitsie mɨpaɨ kanetiniutaxatɨani: 2 «Tewi pemunu'aya: 'Ikɨ niuki keniwarutaxatɨa 'ixaheritsixi teɨteriyari, keniwarutaxatɨa 'ikɨ 'ɨxatsi niukiyari. 3 Mɨpaɨ ketiniwaraye'eritɨa kename ne Yawé nehaine:
»Riwanu kaninuani Kwixɨ 'anetɨ,
'a'anateyeyeutɨ, waɨkawa heuhuxatɨ, witsiheu'anetɨ.
Kariuxa yekɨrita kaniuyeyerɨni,
4 kanekatutseni yɨrariyari 'amutewitsie.
Xeime kwieyaritsie kaneitɨni tetuayamete wahetsɨa,
kiekari mɨratuiyatsie kanikayeni.
5 Hikɨ mɨkɨ kwieyaritsie 'imɨari kaniyetɨkɨ,
kanika'eni kwie 'aixɨa mɨraku'anetsie.
Kanika'eni hapuri kɨyeyari kemɨrayu'etsa,
waɨkawa haa 'uhanekaku 'aurie.
6 'Imɨari kaniutineni,
kaxie nanari 'apatɨ kanayani, yakɨ hawetɨ,
kwixɨ hetsie paitɨ kaneuti'ani mamateya,
yunanakɨ waɨkawa katiniukawiya.
Mɨpaɨ katinayani kaxie nanari,
waɨkawa yɨratɨ.
7 Peru xewitɨ 'apuyeikakaita kwixɨ 'anetɨ,
'a'anateyeyeutɨ, waɨkawa heuhuxatɨ.
Tawarita kaxie yunanarikɨ katiniukawiya,
manapaita xawari kaniukanetɨani,
haa waɨkawa mɨharekakɨ
kemɨkatiharekai.
8 Mana puka'etsiekai kwie 'aixɨa mɨ'anetsie
waɨkawa haa 'uhanekaku 'auriena,
mɨyɨranikɨ meta 'ikwaxi muxuawitɨakakɨ,
kaxie nanari witsi'anetɨ mayanikɨ.
9 »Mɨpaɨ ketiniwaraye'eritɨa: Yawé mɨpaɨ kanaineni:
»Mɨkɨ kaxie pɨkakaxuawere.
Kwixɨ nanarimakame pahuna.
'Ikwaxi pɨka'inɨni,
kaxie nanayari pɨtayɨnare.
Huu, yɨrariyari pɨtiwani.
Pɨkaheuyeweka mamá tɨrɨkaɨyetɨ meta teɨteri meyumɨiretɨ
memehunakɨ naime.
10 Tsepa xaɨtsie mukayerie pɨkatawere.
'Eka tau manatineika mayeneika
pitawatsiɨxa xɨka 'i'axe.
Yurikɨ kanitawamɨkɨ
hakewa mekayerie».
11 Yawé yuniukitsie mɨpaɨ kanetiniutaxatɨani: 12 «Keniwaruta'iwawiya 'ikɨ teɨteri memɨ'iyaritsetse'i kehepaɨtɨtɨ 'ikɨ naitɨ manuyɨne. Mɨpaɨ ketiniwaraye'eritɨa, ti'aitame Wawiruniya kiekame Kerutsareme punua, yukwieyaritsiepai Kura kwieyaritsie ti'aitame pehanie meta 'iparewiwamete. 13 Hikɨ xeime panayexei memanuyetei waniwe, waɨriyarika wapitɨatɨ yapɨtiwarutahɨawixɨ tɨratutsie yamemɨtekakɨnekɨ meyuhɨritɨatɨ. Ti'aitame mɨpaɨ katiniwarewitɨni memanuyetei yukwieyaritsie paitɨ. 14 Mɨya pɨwaruyuri waɨkawa Kura kwieyaritsie kiekatari mekatɨrɨkaɨyeme mɨwarayeitɨanikɨ. Mɨpaɨ pɨtiwarutahɨawixɨ mariweme memɨka'ayuyeitɨwanikɨ, waɨriyarika pɨwapitɨakai memeye'atɨanikɨ tɨratu. 15 Hikɨ mɨkɨ ti'aitame Wawiruniya kiekame 'aye'unietɨ patɨa, pɨwarenɨ'a texaxatamete 'Ekipitutsie memiparewienikɨ, kawayutsixi wahekɨ meta kuyaxi yuwaɨkawamekɨ. ¿Kemɨ'ane mɨyamɨtiuyuri tiyuta'una 'aku? ¿Tiyɨwe tɨratu kahaye'atɨame mutawikweni? 16 Hawaikɨtsitɨ, matsi kanimieriemɨkɨ Wawiruniya, ti'aitame kemɨ'ane mitahɨawixɨ kwieyatsie, kemɨ'ane tɨratu hamatɨa muwewi hetsɨa, tɨratu miwewitsitɨa mɨkaheye'atɨiri hetsɨa. Ne Yawé naimekɨmɨyɨwe mɨpaɨ nekanaineni. 17 Parahuni yukuyaxima yunaime wahamatɨa memiparewieni pɨkayɨwe, tsepa tetsariya 'imɨmɨiyari memutawewi meta tsepa tuxiyu memutiwewi waɨkawa teɨteri memɨwakwinikɨ. 18 Kura kwieyaritsie ti'aitame nu'aya, tɨratu pɨkahaye'atɨa. Hikɨ mɨyamɨtiuyurikɨ naime yɨhɨritɨaka pɨkayuta'una.
19 »'Ayumieme, Yawé naimekɨmɨyɨwe mɨpaɨ kanaineni: “Yurikɨ mɨpaɨ nekanaineni nekɨmana nepi'uximatɨani kemɨtiyɨhɨritɨakai netɨratutsie yamɨkatiuyurikɨ. 20 Newiniyari hɨxiena nepuwɨtɨani, mana kaniwierimɨkɨ. Wawiruniya nekanenuhanimɨkɨ, mana kanitaxanetsiemɨkɨ yamɨkatikatɨakɨ. 21 Kuyaximama 'aixɨa memɨ'anene mepɨkwi'iwa 'ixiparakɨ, kemɨ'aneta memuyuhayewa naitsarie nuiwaritetsie nepɨwataxɨriexɨani. 'Ana mɨpaɨ mepɨtehetimani kename ne, Yawé mɨpaɨ nehaine.
22 »”Yawé naimekɨmɨyɨwe mɨpaɨ kanaineni:
»”Kariuxa kɨtsita yɨrariyari ne nekaniwatimuramɨkɨ,
kemɨ'ane 'amutewinitsie nekanewatimuramɨkɨ,
nekanikayemɨkɨ xeime hɨri 'a'utewimetsie.
23 'Ixaheri hɨriyaritsie nekanika'iteɨtamɨkɨ,
'amanutitewatsie,
mana mɨtayɨrakɨ meta 'ikwaxi mɨkaxuawitɨanikɨ,
kariuxa witsi'anetɨ mayanikɨ.
Yunaitɨ wikixi hetsiena mekaniyuti'ituatɨakuni,
'etɨriyayatɨa xeikɨa mekaniu'uwakuni.
24 Yunaitɨ kɨyexi yeuta mieme
mɨpaɨ mepɨtehetimani kename ne Yawé nehɨkɨ.
Kemɨ'ane kɨye mɨmariweni nepewiteke,
kemɨ'ane 'etsimutewini nepitaweriya,
Kemɨ'ane kɨye mɨyɨra nepitawatsiɨxa,
kemɨ'aneta mɨwaki, mɨtaxutunikɨ yanepɨtiyurie.
Ne, Yawé, mɨpaɨ neputayɨ,
nepeye'atɨani”».