27
Hiwerika Tiru matihɨiyakɨ
1 Yawé mɨpaɨ kanetiniutahɨawe: 2 «Tewi pemunu'aya, 'ikɨ hiwerika kwikariyari Tiru hetsiemieme keneutakwika, 3 kiekari haramara tetsita memukuma mɨti'uximaya yumɨireme kiekarite wahamatɨa meta tewanarixi haramara tetsita mukumane.
»Yawé naimekɨmɨyɨwe mɨpaɨ kanaineni:
»“'Ekɨ, Tiru kiekariyari,
witsipeti'axexeiyame pepɨ'a'erie meta 'aixɨa pe'anekame.
4 Haramaratsie mariwemekɨ pepɨti'aita,
tewewiwamete 'aixɨa ti'anenekame mepɨte'utiwewi.
5 Huku mexayari Tsenixi hɨriyaritsie miemekɨ
mepɨte'utiwewi.
Meta kariuxa Riwanu miemekɨ
kɨye 'apame hixɨapa nawiya heima mieme meputawewi.
6 Xiu Watsani miemekɨ
tiwekemete meputiwewi,
meta tsipɨrexi kɨyeyarikɨ Tsipɨre miemekɨ
'aheima muyema meputawewi,
meta witsipuka'itɨarie
witsimɨrekemakakɨ 'eripanite 'awateyakɨ.
7 Rinu 'ixurikiyari 'Ekipitu mieme mɨtixutɨkakɨ
'eka kwekwewiwame meputiwewi,
mɨkɨkɨ 'apatera pepayeitɨa.
Haramara tetsita 'Eritsaha kwieyaritsie mieme,
'ixuriki mɨyɨtsikimaɨye meta mɨxeta pɨ'atɨarie 'akiitsie meuwɨre.
8 Tiru 'aku, tewekemete Tsiruni mepanexɨa meta 'Axiwari.
Wapaitɨ mepatitekai yemekɨ memɨmatsi'unɨ'axime,
teɨteri memɨte'akumate haramaratsie timiemekɨ.
9 Kɨyekɨ 'aixɨa memɨteheutawewiwawe Kewari kiekatari
'aixɨa mepiyuri hakewa meumurikai kanuwa 'amɨpa.
Haramaratsie kanuwa 'amɨpapatsie hauwemete yumɨiretɨ
tita pemɨtituakai mepɨtetuakai.
10 Teɨteri Peritsiya kiekatari, Ririyatari meta Puti kiekatari
'akuyaxi wahamatɨa mepaye'ukai.
'Aixɨa mepɨmatsi'ukuyuri yuhetsie nunuwamekɨ meta kuya xupureruyakɨ,
mɨkɨ mepihekɨatakai kepemɨtimariwekai.
11 »”'Axiwari kiekatari, meta 'akuyaxima wahamatɨa, mepi'ɨwiyakai 'akuraru 'awarita maka, meta Kamari kiekatari 'atuxiyute mepɨtahɨkai. 'Akuraru 'utɨma yuhetsie nunuwame mepukuwɨwɨtɨwakai, witsi'anekame mematsihayeitɨatɨ. 12 Pɨtimɨirekai kepemɨrexeiyakai Taritsi 'ahamatɨa ti'uximayakaku. Pemɨtituiriekaikɨ mɨkɨ pɨmatsixatɨakai pɨrata, tepɨa, 'etsitaniyu meta tepɨa mahete. 13 Metatsiere Kɨretsiya, Tuwari meta Metseki 'ahamatɨa mepɨte'uximayakai, pemɨtiwatuiriekaikɨ mepɨmatsixatɨakai te'uximayatamete meta purunitsekɨ mɨtiwewiyatɨka. 14 Teɨteri Weti-Tukaxima mepɨmatepitɨakai kawayutsixi te'uximayatametekɨ, kawayutsixi yeixamete meta muratsixi. 15 Xuraxi*27:15 Hepɨrayukɨ paine Rerani. kiekatarita yaxeikɨa 'ahamatɨa mepɨte'uximayakai. Yuwaɨkawa pepɨtiwatuiriekai kwie haramaratsie mɨyemane wahamatɨa, mɨkɨ mepɨmetepitɨakai kɨye mayeyɨyɨwikɨ meta 'eripanite tameteyakɨ. 16 Waɨkawa piinite pemɨrexeiyakaikɨ, Tsiriya pɨmatinanairiekaita, pɨmatipatsiriekai tupatsiyukɨ, 'ixurikite muyuyuawikɨ, 'ixurikite tixutɨkaimekɨ rinu 'aixɨa mɨ'ane meta tetexi witsimɨ'anenekɨ. 17 Kura meta 'Ixaheri mepɨmatetuiriekai tɨriku Miniti miemekɨ, paa witsimɨ'anene, hatseiti meta waritsamu. 18 Waɨkawa piinitɨarika pemɨrexeiyakai, waɨkawa pemɨxikutɨkai, Ramatsiku tsiere pɨmatinanairiekai. Winu Keriwuni mieme meta Tsakaxi mieme muxa huxarieyakɨ mepɨmatekupitɨwakai. 19 Mematepatsirietɨ 'apiinitekɨ Rani nuiwarimama meta kɨriyekutsixi mepɨte'atɨwakai, 'Utsari mieme tepɨa 'aixɨa mɨ'ane, kanera meta 'uwá witsimu'ɨatɨka. 20 Rerani kiekatari mepɨmatsituiriekai xira yeixame. 21 'Ahetsɨa memɨtenanetɨwe mepɨhɨkɨtɨkai 'Arawiya meta yunaitɨ te'aitamete Tseraxi miemete, mɨkɨ mepɨmatepitɨakai muxatsi yakɨ memɨpapakɨ, muxatsi 'ukitsikɨ meta tsipuri wahekɨ. 22 Meta 'ahetsɨa mepɨtenanetɨwekai yunaitɨ tetuayamete, Tsawa miemete meta Xakama. Mɨkɨ mepɨmatepitɨakai hurukɨ, tetexi witsimɨ'anenekɨ meta witsimu'ɨatɨka 'aixɨa mɨ'anenekɨ. 23 Meta Karani, Kane, Hereni meta tetuayamete Tsawa kiekatari, 'Atsiriya meta Kirimari 'ahetsɨa mepɨtenanetɨwekai. 24 Waɨkawa pemɨrexeiyanikɨ mepɨmatsituiriekai 'ixuriki witsi'anenekame, matate mɨyɨtsikimawi, tixuiyatɨkaime, tiwiparietɨkaime yɨkɨ'anenemekɨ meta kaunarite 'aixɨa reukukakaunime. 25 Kanuwate 'amɨpapa Taritsi miemete 'apiinite mepɨte'anutuayakai.
»”Piinitɨarika mɨraye'atɨka tihɨpɨneme peratɨtɨ,
haramara 'amatiyewatsie pepɨyanekai.
26 'Awekemete haramara 'ameutatewatsie mepɨmatsihetɨ,
haramara 'amatiyewatsie 'eka tau manatineika mieme pɨmatsi'utamuraxɨ.
27 Kepauka pemɨkayune
pɨtikayunixɨani haramara 'ameukatewatsie,
mɨmatixikutɨriyakai pemɨtituakai meta pemɨtiwewiekai,
'ahetsie mematitei meta memɨmatsi'unɨ'axime,
kemɨ'ane 'akanuwa 'amɨpa 'aixɨa memɨtiyuruwa meta kemɨ'ane memɨmatetuiriekai,
'akuyaxima metatsiere yunaitɨ matsiparewiwamete.
28 Memɨmatsi'unɨ'axime me'utihiwakaku
haramara tetsita memɨtama mepɨtimamani.
29 Yunaitɨ kanuwa 'amɨpapa wekemete mepɨwaku'eirieni,
haramaratsie kɨkamete meta tenɨ'awamete kwiepa mepɨ'axɨani.
30 'Ahetsiemieme mepɨtihiwa
mepɨtitsuani yemekɨ meyuhiwerietɨ,
naxi yumu'utsie mepeuyutiwiwiriexɨani,
meta hetsiena mepɨtikurupe.
31 'Ekɨ ya'ane pewiwiekaku yumu'utsie mepuyukaxini,
hiwerika kamixayari mepanakatɨxɨani.
'Ahetsiemieme mepɨtitsuani meyuhiwerietɨ,
'aixɨa 'iyari meka'u'uwatɨ.
32 Hiwerika kwikariyari mepitikwika,
yemekɨ kwinimieme mɨtinutuixiwetsie mɨpaɨ mepɨtiyuani:
‘Nixewitɨ haramara hixɨapa pumawekai
Tiru hepaɨ 'anetɨ’.
33 Kepauka mɨti'atɨariwakai 'apiinite
nuiwarite yumɨiretɨ mepɨtekunanakekai.
Waɨkawa pemɨrexeiyakaikɨ meta piinitɨarikakɨ,
pepɨwaxikutɨriyakai te'aitamete kwiepa memɨtama.
34 Peru hikɨ haramara pɨmatsi'utamuraxɨ,
haramara 'ameukatewatsie pepɨyeka.
'Apiinite meta kemɨ'ane pemɨtiwa'aitɨakai
'ahamatɨa mepukayunixɨa.
35 'Ahetsiemieme mepɨmama
yunaitɨ haramara tetsita kiekatari,
te'aitamete marikakɨ mepuyɨyɨakatɨka,
wahɨxie pɨmatsiɨkɨ kememɨtemama.
36 Waɨkawa mekanimamaka
hipatɨ kwieyaritsie tenawemete,
'a'imatɨrieka tukari kanaye'ani,
tawariri pepɨkanuani”».