30
Hiwerika 'Ekipitu hetsiemieme
1 Yawé mɨpaɨ kanetiniutahɨawe: 2 «Tewi pemunu'aya, mɨpaɨ ketineuxata kemɨtiyɨni, mɨpaɨ ketiniwaraye'eritɨa:
»Yawé mɨpaɨ kanaineni:
“Mɨpaɨ xeketeneutsuanani: ‘Xɨa'ui 'iya tukaritsie’.
3 Yawé tukarieya pehehurari,
huu, 'ari tukari kanaye'aximeni.
Haiwitɨri waɨkawa mɨyɨyɨwi tukariyari kanaye'amɨkɨ,
nutuixiya tukariyari nuiwarite wahetsiemieme kanaye'amɨkɨ.
4 'Ekipitu kanitamieriemɨkɨ 'ixiparakɨ,
meta 'Etihupiya kiekatari mepɨmamaka.
Kepauka mema'iwarieni 'ekipitutari,
wapiinite naitɨ katininawariemɨkɨ
meta waki tenariyari naitɨ pɨtika'unarieni.
5 'Etihupiya meta Puti kiekatari, metatsiere naitɨ 'Arawiya meta Ririya kiekatari,
mekanikwi'iwakuni 'ixiparakɨ,
meta yaxeikɨa mekatenanuyekɨnikuni waniwema, tsepa tɨratu memexeiya.
6 »”Yawé mɨpaɨ kaniutaineni,
Yawé naimekɨmɨyɨwe mɨpaɨ kanaineni:
Mekanikwi'iwakunita 'Ekipitu matɨa memuyuxewi,
kememɨteyutimariwekatakai mekaneiyehɨakuni.
Mikiruri metsutɨtɨ 'atsita 'Atsuhani
'ixiparakɨ mekanikwi'iwakuni.
7 Wakiekarite naitɨ kanika'unariemɨkɨ,
yemekɨ kwie mɨkaha'eriwa kanayeimɨkɨ.
8 Kepauka ne 'Ekipitu nemɨtairiya,
meta yunaitɨ memiparewie mepɨkwi'iwa,
'ana mɨpaɨ mepɨtehetimani kename ne, Yawé nehɨkɨ.
9 »”'Iya tukaritsie nenɨ'arima texaxatamete mekanayekɨnikuni, kanuwa 'amɨpapatsie 'Etihupiya memɨtimariutakɨ, 'Ekipitu tukarieya 'ari kanaye'ani, hiwerika hetsɨana pɨtinake.
10 »”Yawé naimekɨmɨyɨwe mɨpaɨ kanaineni:
»”Ti'aitame Wawiruniya kiekame hekɨ, Nawukurunutsuxi,
'Ekipitu kemɨtiyutamariwekata nekanika'unamɨkɨ.
11 Nawukurunutsuxi meta kuyaximama meyunɨtɨ,
mekani'axɨakuni mɨkɨ kwieyari meka'unake,
mɨkɨ yemekɨ mɨtɨrɨkaɨye nuiwarite mɨwara'iwa.
Ne'ixipara nekaniwatihanimɨkɨ 'Ekipitu hetsiemieme,
mɨkɨ kwieyaritsie mɨkite mekanitahɨnikuni.
12 Haa nenikawatsiɨxamɨkɨ, Niru hetsie mɨrawiwiya,
mɨkɨ kwieyari nekaniyetuamɨkɨ teɨteri 'axamemɨte'u'iyari wahetsɨa.
Tewanarixi meteyurieyu
mɨkɨ kwieyari hakumaweme nekanayeitɨamɨkɨ.
Ne, Yawé, mɨpaɨ nekaniutayɨni.
13 »”Yawé naimekɨmɨyɨwe mɨpaɨ kanaineni:
»”Yunaime nekaniwaka'unamɨkɨ, Menipitsi kakaɨyarixi memɨtama,
yunaime nekaniwareuyehɨamɨkɨ memɨkayuri kakaɨyarixi.
Yunaitɨ memɨtimamanikɨ yanetiniyurimɨkɨ mɨkɨ kwieyaritsie,
tawariri te'aitamete mepɨka'anuka'uni 'Ekipitu.
14 Paturutsi kiekariyaritsie yunaime nekaniwaka'unamɨkɨ,
Tsuhani kiekariyari nekanitataiyamɨkɨ,
meta Tewatsi hetsiemieme yanekanitayɨmɨkɨ mɨtikwinitɨarienikɨ.
15 »”Nehaxɨa Tsini kiekariyaritsie nekanikawiwimɨkɨ, 'Ekipitu mana mɨtɨrɨkaɨyekai, meta Tewatsi tita mɨrexeiya nekatinitaxɨriexɨamɨkɨ. 16 'Ekipitu nekanitataiyamɨkɨ, Tsini kukuiniya kanika'eniexɨamɨkɨ. Tewatsi hetsɨa mieme tetsariyari heutaxaxawame pexeiyani, meta Menipitsi paye'uniwani yuheyemekɨ. 17 'Uni kiekatari temari meta Wuwatsititsi kiekatari mekanikwi'iwakuni 'ixiparakɨ, 'ukarawetsixita mekananuhapaniekuni. 18 Kepauka ne, yuku 'Ekipitu mieme nemɨtamura, Tapinetsi kiekariyaritsie tukarikɨ kanikuyɨrimɨkɨ. Mɨpaɨ katineutiparimɨkɨ kemɨtiyukatawe'eriekai yutɨrɨkariyakɨ. 'Ekipitu hai kanenukanakamɨkɨ, waniwema 'ukari mekananuhapaniekuni. 19 Mɨpaɨ katinikwinitɨariemɨkɨ, hikɨ 'ana 'Ekipitu mɨpaɨ katinetimaimɨkɨ kename ne, Yawé nehɨkɨ”».
20 Tamamata heimana xewi wiyari 'anuyemiekaku, mexɨakame metseritsie, 'atahuta tukaritsie, Yawé mɨpaɨ kanetiniutahɨawe: 21 «Tewi pemunu'aya, ne Parahuni mamaya nekanamura, ti'aitame 'Ekipitu kiekame. Xewitɨ pɨka'i'uayemawe meta xewitɨ pɨka'enakuhɨiriewe, mɨtatɨrɨkaxɨanikɨ meta 'ixipara mɨkweiwenikɨ. 22 'Ayumieme Yawé mɨpaɨ kanaineni: “Parahuni nekanaye'unieka, ti'aitame 'Ekipitu kiekame. Hutame mamateya nekanamuraxɨamɨkɨ, 'aixɨa mɨ'ane meta muwayemuri, meta 'ixipara kakweiweme nekanayeitɨamɨkɨ. 23 'Ekipitutari nekaniwataxɨriexɨamɨkɨ nuiwarite watsata, meta hipame wakwieyaritsie paitɨ. 24 Matsi ti'aitame Wawiruniya kiekame mamateya nekanititseiriyamɨkɨ: 'ixipara nekanikweitɨamɨkɨ, matsi Parahuni mamateya nekanamuraxɨamɨkɨ. Hikɨ mɨkɨ kanitatsuamɨkɨ meye'unie hɨxie mɨmɨximeni hepaɨ. 25 Ti'aitame Wawiruniya kiekame mamateya nekanititseiriyamɨkɨ, matsi Parahuni mamateya katɨrɨkawime nepayeitɨani. Kepauka ne ti'aitame Wawiruniya kiekame 'ixipara nemɨkweitɨani, mɨkɨta xɨka 'Ekipitu heitatsera, 'ana mɨpaɨ pɨtimatsiɨkɨre kename ne, Yawé nehɨkɨ. 26 'Ekipitutari nekaniwataxɨriexɨamɨkɨ nuiwarite watsata, meta hipame kwieyaritsie paitɨ. Hikɨ 'ana mɨpaɨ mepɨtehetimani kename ne, Yawé nehɨkɨ”».