1 Yawé mɨpaɨ kanetiniutahɨawe: 2 «Tewi pemunu'aya, 'ateɨterima ketiniwarutaxatɨa, mɨpaɨ ketiniwarutahɨawi: “Kepauka ne kuyaxa nematinetɨani xeime kwieyaritsie, mana kiekatari teɨteri xeime tewi mekananayexeiyakuni, mɨtaniere mayanikɨ, 3 xɨka mɨkɨ kuyaxi memɨwaraye'unie waruxeiya 'ame'ahukame wahepa, mɨkɨ kuxineta kanitahɨtsiemɨkɨ teɨterimama mɨpaɨ memɨtehetimanikɨ. 4 Hikɨ, xewitɨ xɨka tsepa kuxineta mu'eni xɨka kayukuha'aritɨani, tiyumemiwame 'ixiparakɨ kanimiemɨkɨ, yukɨmana yuhetsie rahɨame kanimieriemɨkɨ. 5 Kuxineta 'u'eniekatɨtɨ yuri mɨkarayeitɨa, mɨkɨ yukɨmana kaniyumiemɨkɨ, xɨka matsi yuri rayeitɨanike puyutawikwetsitɨanikekai.

6 »”Hikɨta, xɨka mɨtaniere waxeiyatɨtɨ memɨwaraye'unie 'ame'ahukaku xɨka kuxineta ka'utahɨtsieni teɨterimama mɨpaɨ memɨtehetimanikɨ, tiyumemiwame nuame xɨka xeime 'umieni, mɨkɨta kanimɨmɨkɨ mɨyamɨtiuyurikɨ, matsita ti'ɨwiyame mɨtaniere nekatinitawawiriemɨkɨ mɨkɨ mumieriekɨ”.

7 »'Ekɨ, tewi pemunu'aya, ne ti'ɨwiyamekɨ nekamenanukakeni 'ixaheritsixi wahetsiemieme. 'Ayumieme neniuki pekani'enimɨkɨ, pekaniwarayehɨtɨamɨkɨ nehetsiemieme mɨpaɨ memɨtemaikakɨ. 8 Kepauka ne xeime 'axatiyuruwame mɨpaɨ nemɨtitahɨawe: “Pekanimɨmɨkɨ”, xɨka 'ekɨ mɨpaɨ pekatitahɨawe mɨtihayewakɨ 'axakemɨtiyuriene, mɨkɨ 'axatiyuruwame kanimɨmɨkɨ 'axamɨti'anekɨ, matsi 'ekɨ nekamatinitawawiriemɨkɨ mumɨkɨ. 9 Matsi xɨka, 'ekɨ peheye'eritɨani mɨtihayewakɨ 'axatiyurienetɨ, xɨka mɨkɨ yakatikayani, mɨkɨ kanimɨmɨkɨ 'axamɨtiuyurikɨ peru 'ekɨ 'atukari pekanitawikweitsitɨamɨkɨ.

10 »Tewi pemunu'aya, 'ixaheritsixi mɨpaɨ ketiniwarutahɨawi: “Xeme mɨpaɨ xeputiyuane: ‘'Axateteyurietɨ meta 'inɨari niukiyari teheutitsanaxɨaku pahete tahetsie, 'ari tepɨkwixime te'ayenenieretɨ. ¿Pɨkayɨweri temu'uwani?’ ” 11 Mɨpaɨ ketiniwarutahɨawi: “Yawé naimekɨmɨyɨwe mɨpaɨ kanaineni: Ne yurikɨ mɨpaɨ nekanaineni, nepɨkanetemawie 'axatiyuruwame mɨmɨnikɨ, matsi 'axatiyurienetɨ ketiuhayewa meta 'ake'uyeikani. 'Ayumieme xeketeneuhayewa, 'ixaheritsixi teɨteriyari, xeketeneuhayewa 'axaxeteyurietɨ. ¿Titayari xetetakukuweni?”

12 »'Ekɨ, tewi pemunu'aya, 'ixaheritsixi waniwema mɨpaɨ ketiniwarutahɨawi: “Tewi 'aixɨa mɨtiuka'iyari xɨka 'axatiuyurieni xɨka yukɨmana 'aixɨa tiuyurieme yu'erieka pɨkatawikweni, meta 'axamɨtiyuruwame mɨkɨ pɨkatikuhana xɨka tiuhayewa 'axatiyurienetɨ. Xɨka tewi heitserie mexeiya 'axatiuyurieni, pɨkayɨwe mutawikweni meripaitɨ 'aixɨa mɨtiuyurikɨ. 13 Xɨka ne heitserie mexeiya mɨpaɨ netiutahɨawe: ‘Pekaniuyeikamɨkɨ’, peru xɨka mɨkɨ yukɨmana yu'ɨwiyame heitserie yatiyurieneni meta xɨka 'axatiuyurieni, ne heitseriemekɨ nepɨkaheye'erieni, matsi kanimɨmɨkɨ 'axamɨtiuyurikɨ. 14 Xɨkata 'axatiyuruwame mɨpaɨ netiutahɨawe: ‘Pekanimɨkɨ’, xɨka mɨkɨ yapauka tiuhayewa 'axatiyurienetɨ, xɨka 'aixɨa pɨta tiyurienetɨ hayani, 15 xɨka tita mɨtiupatakai ti'atɨani, meta tita mɨtiunawakai xɨka rayukatuani, xɨka 'aitsika tukari mexeiyatsie yatikayani, 'axakatiyurienetɨ yurikɨ 'akaniuyeikamɨkɨ meta pɨkamɨni. 16 Pɨkataxatsiyarieni 'axakemɨtiuyuri meripaitɨ miemekɨ, matsi 'apuyeikani heitseriemekɨ 'aixɨa tiyurienetɨ 'amuyeikakɨ”.

17 »'Ateɨterima 'ixaheritsixi waniwema mɨpaɨ meputiyuane: “Yawé heitseriemekɨ yapɨkatiyuriene”. Matsi yurikɨ nehaitɨ, mɨkɨ pɨta heitseriemekɨ yamepɨkateyurie. 18 Xɨka heitserie mexeiya tiuhayewa 'aixɨa tiyurienetɨ, xɨka 'axatiuyurieni, mɨkɨkɨ kanimɨmɨkɨ. 19 Xɨka 'axatiyuruwame tiuhayewa 'axatiyurienetɨ, xɨka heitserie 'aixɨa tiyurieneni, 'akaniuyeikamɨkɨ. 20 Mɨyatɨtɨ xeme 'akuxi mɨpaɨ xeputiyuane: “Yawé heitserie yapɨkatiyuriene”. Peru ne 'ixaheritsixi, nepɨxetahekɨata yuxexɨitɨ xeme kexemɨte'u'uwani».

21 'Auxɨwirieka tukari 'umiekaku tamamata metseriyaritsie, tamamata heimana huta wiyari 'anuyemiekaku kepauka temehapanie, 'ana xewitɨ kaninuani Kerutsareme heyuta'unaka, mɨpaɨ kanetiniutahɨawe: «Kiekari 'ari kana'iwarieni». 22 Tɨkaritsie meyuta'unaxɨ kanuawekaku 'akuxi, Yawé yutɨrɨkariya nehetsie kaniupitɨani nekaniuweme kanenayeitɨani, hikɨ 'uxa'arieka ximeri kepauka munua meyuta'unaxɨ 'ana Yawé neniuweme kanenayeitɨani.

23 Hikɨ Yawé mɨpaɨ kanetiniutahɨawe: 24 «Tewi pemunu'aya, teɨteri kii 'u'unimeta memayetei 'Ixaheri kwieyaritsie, mɨpaɨ mekanetiyuaneni: “'Apɨrahami matsi yuxaɨtatɨtɨ 'ikɨ kwieya naitɨ pɨhɨkɨtɨkai, tame matsi tepɨtawaɨkawa, 'aixɨa kani'aneni 'ikɨ takwie mɨhɨkɨtɨnikɨ”. 25 'Ayumieme, mɨpaɨ ketiniwaraye'eritɨa Yawé naimekɨmɨyɨwe kename mɨpaɨ nehaine: “Xeme wai 'ayexuxureme xekanikwa'ani, kakaɨyarixi memɨwewiyatɨka xekaniwarayexeiyani, meta xuriya xekanitayeuriwani, ¿Mɨya xeteyurietɨ mɨkɨ xekwie tihɨkɨtɨni? 26 Metatsiere, yu'ixiparatetsie xepauwawaɨre, 'axaxeteyurietɨ kemɨkanetinake, 'ahepaɨ tewi 'ɨyaya xepɨwakumaɨwa, ¿Mɨya xeteyurietɨ mɨkɨ xekwie tihɨkɨtɨni?”

27 »'Ayumieme, mɨpaɨ ketiniwaraye'eritɨa Yawé naimekɨmɨyɨwe kename mɨpaɨ nehaine: “Ne yurikɨ nekanayeniereni, kemɨ'ane kii 'u'unimeta memayeteni 'ixiparakɨ mekanikwi'iwakuni, kemɨ'aneta yeuta memu'uwani yeutari mekaniwatikwaikuni, meta kemɨ'ane kii 'aixɨa rekukurarutɨiyariekameta memayeteni meta terɨta kwiniyakɨ mekanikwikuni. 28 Mɨkɨ kwieyari kiɨripa nekanayeitɨamɨkɨ, kemɨtitɨrɨkaɨye meta kemɨtiyukatawe'erie nepɨtinawairieni. 'Ixaheri hɨriyaritsie 'akumawetɨ kaniyuhayewamɨkɨ, nixewitɨ mana pɨka'uyeikani. 29 Kepauka ne 'ikɨ kwieyari hakumaweme nemayeitɨani, yuxaɨta kumakame mana memu'uwakai kwinimieme 'axamemɨte'uyurikɨ, 'ana mɨpaɨ mepɨtehetimani kename ne, Yawé nehɨkɨ”.

30 »'Ekɨta, tewi pemunu'aya, 'ateɨterima 'ahepaɨtsita mepɨtekuxata kuraru 'aurie meta yukitenie metitetɨ, mɨpaɨ mepɨteyutahɨawe: “Hikɨmɨtɨka niuki tepɨ'enieyu Yawé mɨtatsi heyenɨ'airiwa”. 31 Mɨkɨ mekani'axeni yunaitɨ meyunɨtɨ 'ahɨxie, 'aniuki mekaniuti'eniwani mana metitetɨ, peru yamepɨkateyurie. Pɨwanake kepemɨtikuxata, peru 'ariketa tumini mepukuwautɨwe 'axa'anemekɨ meteyurietɨ mepi'iwa. 32 Yurikɨ nekanaineni, 'ekɨ wahetsiemieme kwikame xeikɨa pekanihɨkɨtɨni, naki'eriya kwikariyari pemuyemate witsipehanati'anetɨ pemutakwika, kanarikɨ 'aixɨa pepɨtiuyuitɨwa, 'aniuki mepɨ'enie peru yamepɨkatekahu. 33 Peru neuxei, naitɨ yakatinaye'aximeni, kepauka yamɨraye'ani, 'ana mɨpaɨ mepɨtehetimani kename tixaxatame wahamatɨa 'uyeikakai».