1 Merikɨtsɨ Kakuwu kaneyani, tau manatineika hepatsie kiekatari wakwieyaritsie kaniye'ani. 2 Hikɨ mana 'uta'aka yeuta haputsu kaniuxeiya, 'auriena haika tewayari muxatsi mekani'uxipitɨariekaitɨni mana memɨtiharewekaikɨ. Mɨkɨ haputsu tete 'ayeukamekɨ kananukanakaitɨni. 3 'Ayumieme yunaitɨ tehɨwemete meyukuxeɨriemeke mekaniyexɨrakaitɨni, hikɨ yunaime mewatiharitɨame, tawarita yunaitɨ mekanenukanarɨmakaitɨni haputsu.

4 Hikɨ Kakuwu kaniwaruta'iwawiya tehɨwemete:

—¿Hakewa xepekiekatari xeme?

Mɨkɨ mɨpaɨ mekatenita'eiya:

—Karani tepɨkiekatari.

5 Tawarita Kakuwu kaniuta'iwauni:

—¿Kamɨtsɨ xeme Rawani xetemate, Nakuxi nu'aya?

—Huu tepimate —mekatenita'eiya.

6 Tawarita mɨpaɨ Kakuwu katiniwaruta'iwawiya:

—¿'Aixɨa kapɨreu'erietɨtɨ?

Mɨkɨta mɨpaɨ mekatenita'eiya:

—'Aixɨa pɨreu'erie. Kamɨmatsi niweya huma kanamieni Xakeri muxatsi wara'arietɨ.

7 Hikɨta Kakuwu mɨpaɨ katiniwarutahɨawe:

—Matsi 'akuxi puximeri, yakɨpupauka 'akuxi muxatsi xemɨwareunaxɨanikɨ wakuraruta, 'aixɨa pɨyɨni yumuxatsima xekeniwarutiharitɨaka xeketenewamiyu.

8 Mɨkɨ mɨpaɨ mekatenita'eiya:

—Hawaikɨ tepɨkayɨwawe mɨpaɨ temɨte'uyurieni taxaɨtame, teyukwewiemeke tanaitɨ tehɨwemete tepenuku'ɨwe tete. 'Anake tepɨyɨwawe tamuxatsima temɨwarutiharitɨani.

9 Wahamatɨa tikuxatakaku 'akuxi, Xakeri kaninuani muxatsi wara'arietɨ yupaapa tewamama, mɨkɨ kaniwahɨwemetɨkaitɨni. 10 Hikɨ kepauka Kakuwu Xakeri muxei, yutatatsi Rawani niweya, mana 'uyaka haputsu kananutiyepieni, muxatsimama kaniwarutiharitɨani. 11 'Anata kwitɨwa Xakeri kaniu'itseni, meta kaniutatsuani, 12 mɨkɨ katinitaxatɨani kename me'iwamarixi Xeweka mɨnu'ayatɨkaikɨ. Hikɨ 'ayumieme Xakeri yapauka 'unautsarɨmetɨ kaneyani yupaapa hetsɨa reitaxatɨanike.

13 Hikɨ Rawani yumatsu Kakuwu 'utamarieka kaneyani kaneikunake kanitatapa meta kani'itseni, yukie kanei'inieni. Hikɨ Kakuwu naime katinitaxatɨani naime kemɨreyɨ, 14 Rawani mɨpaɨ katinitahɨawe: «'Ekɨtsɨ yuheyemekɨ ta'iwa pekanihɨkɨtɨni».

Merikɨtsɨ Kakuwu xeimetseri kaniukateitɨni Rawani hetsɨa. 15 Mɨpaɨ katinitahɨawe:

—Tsepanetɨ hurawa pemɨne'iwa yakɨxeikɨa pepɨkati'uximayaka nehetsɨa. Yakenetineutahɨawi kepaɨmeme pepeu'iwamɨkɨ.

16 Rawani yuhutame kaniwarexeiyakaitɨni yuniwema 'ukari, kurieya Reya pɨtitewakai, taruyata Xakeri. 17 Reya hɨxiteya witsipɨ'anenekai, peru Xakeri witsipɨtiyuxexeiyakai naitɨ. 18 Hikɨ Kakuwu Xakeri mɨhiwe'eriekaikɨ yutatatsi mɨpaɨ katiniutahɨawe:

—'Atahuta wiyari nepɨti'uximayaka 'ahetsɨa, 'aniwe yakɨ mɨyumate Xakeri nemɨtiwitɨnikɨ.

19 Rawani mɨpaɨ katinita'eiya:

—'Aixɨa kaniyɨmɨkɨ nemɨmatsiwitɨtɨanikɨ 'ekɨ, xeime nemɨka'imate nemɨkakuwitɨtɨwanikɨ. Nehetsɨa keneuyuhayewa.

20 Hikɨ Kakuwu 'atahuta wiyari katini'uximayakaitɨni Xakeri mɨtiwitɨnikɨ, hikɨ 'apɨkareuterixɨ tsepa mɨixa tukari manuyetɨa waɨkawa minaki'eriekaikɨ. 21 Hikɨ Kakuwu mɨpaɨ Rawani katiniutahɨawe:

—'Ari nepɨraye'atɨa kenemutayɨ. Keneneyetuiriri nemitiwitɨnikɨ.

22 Rawani mana kiekatari yunaime kaniwaruta'inieni, 'ixɨarari mariweme kaniuwewieni. 23 Peru kepauka mukɨyɨrixɨ, kurieya pɨta Kakuwu kaniyetuirieni Reya mɨtitewakai, 'ana Kakuwu hamatɨana kaniukahuni. 24 Reya xeime ti'uximayatame pexeiyakai Tsiripa titewakame, 'ayumiemeta Rawani kanixatɨani miparewiekakɨ.

25 Hikɨ 'uxa'arieka katinetimani Reya matɨa pɨta mukateikɨ, 'ayumieme Rawani mɨpaɨ katiniutahɨawe:

—¿Titayari mɨyapenetiuyuri? ¿Netamɨ nekamatiuta'uximayatsiri Xakeri nemɨtiwitɨnikɨ? ¿Ketitayari penetiu'itai?

26 Rawani mɨpaɨ katinita'eiya:

—Tame tayeiyari mɨpaɨ pɨ'ane 'ikɨ kwieyaritsie, Kurieya meri pɨtiwikieni 'ariketa taruya. 27 'Ayumieme hikɨ kenaye'atɨa tsemana kemɨreuyewetse, tawarita 'uximayatsikakɨ 'atahuta wiyarikɨ tawarita xeime nepɨmatsiwitɨtɨani.

28 Kakuwu mɨpaɨ katinikayani, kepauka tsemana maye'atɨa xeimetsie mieme kemɨreuyewetse, Rawani Xakeri kaniyetuirieni 'ɨyaya mayanikɨ. 29 Xakeri xeimeta ti'uximayatame kanexeiyakaitɨni Wiriha titewakame, Rawani kaniyetuirieni miparewiekakɨ. 30 Hikɨ Kakuwu kaniukahuni hamatɨana, waɨkawa matsi Xakeri kaninaki'eriekaitɨni Reya 'akuxi matsi 'etsiwa, tsepa 'akuxi 'atahuta wiyari tawarita Rawani mɨtiuta'uximayatsiri.

31 Kepauka Yawé Reya muxei kanaki'eriwame, kanipitɨani tɨɨri mɨwarayexeiyakɨ, Xakeri 'akuxi pɨkaniwewekai. 32 Hikɨ Reya kaniutihukata, xeime 'ukitɨme kaniutiniweni Xuweni katiniterɨwa, mɨpaɨ 'utayɨka: «Yawé pɨnetsi'uxei kenemɨtinehiweriekai, hikɨrixɨa nekɨna pɨnetsinaki'erieka». 33 Hutarieka kaniutihukata xeimetsiere 'ukitɨme kanayexeiya, Tsimehuni katiniterɨwa, mɨpaɨ 'utayɨka: «Yawé pe'enaxɨ, kename nekanaki'eriwa, 'ayumieme xeimeta pɨnetsiheyenɨ'airi nunutsi 'ukitɨme».

34 Hairiekata kaniutihukata xeime nunutsi 'ukitɨme kanayexeiya, Rewi katiniterɨwa, mɨpaɨ 'utayɨka: «Hikɨrixɨari nekɨna netsinaki'erietɨ payani, yuhaikameri tɨɨri hetsiena mieme nemɨwarayexeikɨ».

35 Nauriekata kaniutihukata Reya, xeime 'ukitɨme kaniutiniweni, Kura katiniterɨwa, mɨpaɨ 'utayɨka: «Hikɨ Yawé nekanitanɨawamɨkɨ». Mɨpaɨ tiuniweka tawarita pɨka'utiniwexɨ.