1 Merikɨtsɨ Rina Kakuwu niweya Reya hetsie meyexei, hipame 'ukarawetsixi kaniwareku'iwata mana kiekatari. 2 Kepauka mixei Tsikeni, Kamuxi nu'aya, heweu tewiyari, mana mɨtiwa'aitɨakai, 'iwiyaka waɨriyarika 'ipitɨatɨ hamatɨana kaniukahuni kaninanaimani. 3 Mɨya 'iyuriekaketa kanitihiwe'erieni 'aixɨa katinixeiyakaitɨni pitiwitɨnikekai. 4 Hikɨ yupaapa mɨpaɨ katiniutahɨawe: «Mɨkɨ 'uka keneutawawa ne'ɨya mayanikɨ».

5 Hikɨ Kakuwu mɨpaɨ katinetimani kename Tsikeni nu'aya Rina 'unanaimakai, 'atsipɨka'utayɨ niwemama yeuta meme'uwakaikɨ tewaxi metewarehɨtɨwetɨ, me'u'axɨakuke katiniwarutaxatɨani. 6 Hikɨ Kamuxi Tsikeni paapaya, Kakuwu hetsɨa kaneyani hamatɨana titaxatake. 7 Kepauka Kakuwu niwemama memu'axɨa mekateniutamarieni kemɨtiɨyɨkai, pɨkawarunakixɨ waɨkawa meha'atɨ mekaniuyuhayewa. Tsikeni waɨkawa 'axakatiniuyuriekaitɨni 'Ixaheri hepaɨtsita niweya munanaimakɨ, pɨkaheuyewekai matsi mɨpaɨ mɨtiyurienikɨ. 8 Kamuxi peru mɨpaɨ katiniwarutahɨawe:

—Neniwe Tsikeni xe'iwa 'uka kanihiwe'erieka. Neuxeikuta xekeneupitɨa memuyutiwitɨnikɨ. 9 Tepɨtatimareta. Taniwema mepuyuwitɨtɨweni. 10 Mɨpaɨ xepɨteyuhayewani xeme tahamatɨa, 'ikɨ kwie xehetsiemieme pɨhɨkɨtɨni 'ena xekeneu'uwani kemɨtixenake xete'uximayatɨ, meta kwie xekeneukukurarutɨiyaxɨa.

11 Hikɨ Tsikeni mɨpaɨta katiniwarutahɨawe Rina 'iwamama meta paapaya:

—Xɨka xeme xenetsi'utanaki'erieni, ne nepɨtixepitɨani tita xemɨnetetawawirieni. 12 Xepɨyɨwawe tita xemɨnete'utawawirieni kɨmana, meta 'imikieri nemɨtixeminikɨ, peru yemekɨ xekeneneupitɨa 'uka ne nemɨtiwitɨnikɨ.

13 Hikɨ wa'iwa Rina munanaimariekɨ, Kakuwu niwemama mekaniwaruta'eiya kwamanarikakɨ Tsikeni meta paapaya Kamuxi.

14 Mɨpaɨ mekateniwarutahɨawe:

—Tame tepɨkayɨwawe mɨpaɨ temɨte'uyurieni. Xɨka ta'iwa teyetuani xeime xitekiya 'inɨariyari kahexeiyame hetsɨa tepɨtatewiyatsitɨani tame. 15 Ketemɨtexetahɨawe xɨka mɨpaɨ xe'uyɨni 'ana yatepɨtetanaki'erieni: yunaitɨ xeme 'ukitsi xitekiya 'inɨariyari xekeneuyuwewiri tahepaɨ xemɨ'anenenikɨ.

16 'Anake taniwema temɨwatawitɨtɨwani kaniyɨwemɨkɨ, xehamatɨa temɨtiteni xeikiekariyari temɨhɨkɨtɨni. 17 Mexɨka yaxekate'utanaki'erieni xitekiya xeka'uyuwewirieni, ta'iwa te'awitɨtɨ tame tekaniyehuni.

18 Kamuxi Tsikeni matɨa yameteniutanaki'erieni kememutiyua, 19 Tsikeni kwitɨwa kaniuyu'inɨaritɨani Kakuwu nu'aya kwiniemieme mɨtinaki'eriekaikɨ.

Tsikeni waɨkawa 'iwamama memei'eniekaikɨ, 20 paapaya Kamuxi kaneiteɨta kiekari kitenie paitɨ, mana mekateniutixata kiekatari wahamatɨa. Mɨpaɨ mekateniwarutahɨawe:

21 —'Ikɨ teɨteri 'aixɨa mepɨtekahu mepɨhamikutsixi. Xekeniwarupitɨa takwieyaritsie memu'uwanikɨ, mekete'uximayaka 'ena, 'apakuyewakuta wahetsiemieme. Meta tame tepɨyɨwaweni temɨwatiwitɨni waniwema, mɨkɨta taniwema. 22 Mɨkɨ yamepɨteha'eriwa tahamatɨa memuyuhayewakɨ xeikiekariyari temakɨnekɨ, xɨka yatetekakɨne kememaitɨka: xɨka teyunaitɨ 'ukitsi xitekiya 'inɨariyari te'uyuwewirieni, mɨkɨ kememɨte'uhu.

23 Hikɨmɨtɨka yatepɨtekakɨne, tahamatɨa memuyuhayewanikɨ. Mɨpaɨ wawakaitsixi naime tita memɨtehexeiya tapiini mepɨtehɨkɨtɨni.

24 Yunaitɨ kiekari kitenie memuyuxeɨriekai, yameteniutanaki'erieni Kamuxi meta nu'aya Tsikeni kememaitɨkatei, 'ana yunaitɨ 'ukitsi mekaniu'inɨaritɨarieni xitekiyakɨ. 25 Hairieka tukaritsie, 'ukitsi 'akuxi mete'ukakukuinekaku, yuhutatɨ Kakuwu niwemama Tsimehuni Rewi matɨa, Rina matsikamama, yu'ixipara me'u'ɨtɨ kiekaritsie mekanekɨne, 'ukitsi memuyeheitɨkateitsie mekayɨ'ɨwiyatɨ, yunaime mekaniwarukwini. 26 Kamuxi meta nu'aya Tsikeni mekaniumieni, Rina Tsikeni kiita mewayehanaka mekanekɨne. 27 Hikɨ hipatɨta Kakuwu niwemama mekaniu'axɨani, mɨkite watsata me'utakɨneka, kiekaritsie naime wapiini mekatene'arieni wa'iwa munanaimariekɨ. 28 Yupiini mekatenayeitɨani wamuxatsima, wawakaitsixima, wapuxurima, naime tita kiekaritsie mɨtiyepikai meta tita memɨte'ekai. 29 Naime mekatenepini tita memɨtehexeiyakai, meta waniwema wa'ɨitamata naime mekateniunawani kiita mɨrayepitɨkatei.

30 Hikɨ Kakuwu mɨpaɨ katiniwarutahɨawe Tsimehuni Rewi mame:

—Waɨkawa 'uximatɨarika xepɨnetsiheutiwiwiriexɨa. Hikɨ 'ena mɨtiyehane kananeutsixi, peretseutsixi, 'enakiekatari yunaitɨ, menetsi'aye'unietɨ mepakɨne. Xɨka mɨkɨ me'uyukuxeɨrieni menetsi'utamieni, mepɨnetsimieni netɨɨriyama yunaime mepɨwakwini, waɨkawa teɨteri nepɨkawarexeiya.

31 Peru mɨkɨ mɨpaɨ mekatenita'eiya:

—Kamɨtsɨ tete'ihayewakekai tsepa 'iya ta'iwa tuminikɨ muyumayɨinɨa hepaɨ mɨranuyemienikɨ.