1 Merikɨtsɨ Kakuwu Kanani kwieyaritsie kaniukateitɨni, 'ukiyarimama memakutekaitsie, peru mana mepɨkakiekataritɨkai 'akuxi.

2 'Ikɨ pɨhɨkɨ 'ɨxatsi yuri maine, yaxeikɨata Kakuwu, tɨɨriyamama wahepaɨtsita kemɨtiuyɨ.

Merikɨtsɨ kepauka Kutse tamamata heimana 'atahuta wiyari mɨhɨkai, yu'iwama kaniwaparewienekaitɨni, Wiriha Tsiripa watɨɨriyama, muxatsi wahɨiyarikɨ. Mɨkɨ Kutse yupaapa katinikuxaxatɨwakaitɨni 'iwamama 'axakememɨteyuriekai.

3 'Ixaheri matsi waɨkawa Kutse kaninaki'eriekaitɨni ke hipame 'iwamama, 'ukiratsitɨtɨ meyexeikɨ. 'Ayumieme kamixa 'atewime witsi'aneme*37:3 kamixa 'atewime witsi'anekame. Yatɨni kamixaya witsimɨ'ane 'amɨmamatetɨtɨ pɨkwaniwe. Yaxeikɨa 37:23. pita'aitsiri. 4 Hikɨ 'iwamama me'ixeiyatɨ paapaya kemɨtinaki'eriekai, matsi waɨkawa mekani'uxiwe'eriekaitɨni ni tɨma 'aixɨa mepɨkate'ikuhɨawekai.

5 Merikɨtsɨ heiwa Kutse tiuheinɨka, yu'iwama katiniwarutaxatɨani. 'Ana matsi waɨkawa mekaniti'uxiwe'erietɨkɨne, 6 mɨpaɨ mɨtiwarutaxatɨakɨ:

—Xekeneneu'eni nepɨtixetaxatɨani kenemɨreheinɨ. 7 Hikɨ tɨriku tenehɨatɨwekaitɨni mɨrati'uximayatsiwatsie. Yapauka ne nemenahɨa 'akaniutakeni, xemeta xemenahɨaxɨa 'auriena 'u'axɨaka hɨxiena kaniukahɨxima'uni.

8 'Iwamama mekanita'eiya:

—Mɨpaɨ xɨari pepɨtiku'eriwa, 'ekɨ petatita'aitɨanike pepɨ'a'erie petatsitanɨ'anike.

Hikɨ matsi waɨkawa mekaniuyeha'ani heinɨtsika hepaɨtsita mɨtiwarutaxatɨakɨ.

9 Merikɨtsɨ hutarieka katiniuheinɨni, tawarita katiniwarutaxatɨani. Mɨpaɨ katiniwarutahɨawe:

—Tawarita mɨpaɨ nepɨreheinɨ. Tau, metseri, tamamata heimana xewi xurawetsixi nehɨxie mekaniukahɨxima'uni.

10 Kepauka mɨpaɨ mɨtiwarutahɨawixɨ, paapaya mɨpaɨ katinitatieni:

—¿Kehepaɨtɨtɨri 'ekɨ pepɨreheinɨ? ¿Kamɨtsɨ ne, 'amaama, 'a'iwama tanaitɨ 'ahɨxie tetekahɨxima'uni?

11 'Iwamama waɨkawa mepihekakai, paapaya matsi pɨta puyu'iyaritɨakai naime mɨkɨ hepaɨtsita.

12 Merikɨtsɨ Kutse 'iwamama mekanekɨne, yupaapa muxatsimama metewareumiyuka Tsikeni paitɨ. 13 Hikɨ 'Ixaheri†37:13 'Ixaheri yaxeikɨa panuyɨne Kakuwu. Kutse mɨpaɨ katiniutahɨawe:

—'A'iwama keniwaxeiyamie, muxatsi memɨwarahɨtɨwetsie Tsikeni paitɨ mepekutei.

Kutse mɨpaɨ katinita'eiya:

—'Aixɨa pɨ'ane.

14 Tawarita katinitaxatɨani paapaya:

—Naime pepɨnetitaxatɨani 'a'iwama kememɨteheu'erie, meta xɨka muxatsi mewarehɨtɨweni, mɨpaɨ nemɨretimanikɨ hekwamekɨ.

Hikɨ kaneyani. Hewuruni 'uyeyaka Tsikeni neta'ani. 15 Xewitɨ tewi kanenukunake yeuta 'uyeikakaku kawataxeiyawekaku. Mɨkɨ mɨpaɨ katinita'iwawiya:

—¿Tita petiwaune?

16 Kutse kanita'eiya:

—Ne'iwama nepɨwawaune. ¿'Ekɨ pekatimate hakewa memɨtehehɨtɨwe?

17 Mɨkɨ tewi mɨpaɨ katinitaxatɨani:

—Takai 'atupaitɨ mepekɨ, nepɨwaru'eni mɨpaɨ mepɨtekuxatakai kename Rutani kiekariyaritsie meyehukai.

Hikɨ Kutse waruwauximetɨ kaneyani, Rutani 'aurie kaniwarutaxeiya. 18 Hikɨ 'iwamama mekanixeiya 'ateewa 'amiekaku kuxi. Mexi kata'awekai mekaniuyu'enieni kememɨte'imienikɨ. 19 Mɨpaɨ meteniyukuxaxatɨwakaitɨni yuxexuitɨ:

—Mana pamie mɨtiheinɨwe. 20 Hikɨrixɨa tukarieya kanaye'ani. Tekanimiekuni xeime putsu muyewakita tekaneikahɨakuni, mɨpaɨ tekanetiyuakuni kename tiyukwa'ame 'itakwai. Mɨpaɨ tepɨtehetimani xɨka 'aku heinɨtsieya yuritɨni.

21 Hikɨ kepauka Xuweni mɨwaru'eni yu'iwama, yu'iwatsie tanuanike memɨka'ikumemiwanikɨ, mɨpaɨ katiniwarutahɨawe:

—Matsi tepɨka'ikumemiwani. 22 Putsu muyewakita xeikɨa xekeneukahɨwa makumawetsie, xepɨka'ikumemiwani, xepɨkate'ikwinitɨaka.

Xuweni mɨpaɨ pɨtiwarutahɨawixɨ 'arike Kutse watihanake 'iyetuanike paapaya hetsɨa.

23 Kepauka Kutse yu'iwama wahetsɨa muta'a, mekaniwiya kamixaya witsimɨ'ane 'amɨmamatetɨtɨ mekaniutatsana. 24 'Anari meheihanaka putsu muyewakita mekaneikahɨani. 25 Hikɨ mekateniukwani. Yareutewikaku mekaniwaruxeiya harerutsixi tenawemete 'itsimaheritsixi teɨteriyari, Karaha memayenexɨa. Kameyutsixi wahetsie mepɨte'a'ikatakai witsimu'ɨa waritsamu mixaxi‡37:25 waritsamu mixaxi. 'Ɨkwa tsuayari witsimu'ɨa. meheituanike 'Ekipitu. 26 Merikɨtsɨ Kura mɨpaɨ katiniwarutahɨawe yu'iwama:

—¿Tita teteha'iwa xɨka ta'iwa te'umieni 'atsiteka'utiyuani? 27 Matsi 'aixɨa katiyɨni 'itsimaheritsixi teɨteriyari xɨka tewarutuirieni muta'iwakɨ.

'Iwamama yamepɨte'utanaki'eri kemainekai, 28 'ayumieme kepauka wahetsɨa memu'axɨa harerutsixi mariyanitsixi, yu'iwa Kutse putsuta mekanewatihana 'itsimaheritsixi mekaniwarutuirieni xeitewiyari pɨrata tuminiyarikɨ. Mɨpaɨ tiunanaiyaka 'Ekipitu kanewitɨkieni Kutse.

29 Hikɨ Xuweni nuaka putsu muyewakita, yu'iwa kaniwatihanakekaitɨni. Meukanierixɨ Kutse puyemawekai. Hikɨ yukamixa neukatsana, mɨpaɨ mɨtimatsiɨkɨnikɨ kename yuhiwerie waɨkawa. 30 Hikɨ yu'iwama wahetsɨa kaneyani mɨpaɨ katiniwaretahɨawe:

—Temaikɨ peuyemawe. Hikɨta, ¿keri nehaineni?

31 Hikɨ Kutse kamixaya me'utihurieka, tsipu me'umieka mekanitaxurimani. 32 Hikɨ hipame mekaniwarenɨ'ani kamixa me'ahuriekame yupaapa hetsɨa, mɨpaɨ memɨteheitahɨawekɨ: «'Ikɨ 'aniwe katikamixaya tekaneitaxeiya».

33 Kepauka Kakuwu kamixa metima mɨpaɨ kaniutayɨni: «Mɨkɨ pɨhɨkɨ neniwe kamixaya. Kauka tiyukwa'ame neitakwai». 34 Hikɨ Kakuwu hiwerikakɨ yukamixa kaneukatsana, mɨyuhiwerie hepaɨ katiniuyukemaritɨani, mɨixa pɨyuhiweriekai yuniwekɨ. 35 Hikɨ yunaitɨ niwemama mekanikɨnɨtɨwakaitɨni peru mɨkɨ pɨkayɨnɨtɨarinɨakai mɨpaɨ 'utaitɨ: «Hawaikɨ, ne nepɨkahetɨmaiya hetsɨana neheta'ameke mɨkite watsata». Mɨpaɨ 'utaitɨ pɨkatihayewakai yuhiwerietɨ Kutse ha'eriwatɨ.

36 Merikɨtsɨ harerutsixi mariyanitsixi Kutse mekaniutuani, 'Ekipitu paitɨ Putipaxi hetsɨa, Parahuni parewiwameya kaninaneni kuyaxi wa'ukiyari mɨtiwa'aitɨwametɨkai.