49
Kakuwu yuniwema kemɨtiwarutahɨawixɨ
1 Merikɨtsɨ Kakuwu yuniwema kaniwarutakwewieni, mɨpaɨ katiniwarutahɨawe: «Xekeneuyukuxeɨri nepɨtixetaxatɨani kemɨtiyɨni xehetsie.
2 »Neniwema: 'Ahurawa xekenakɨni,
xekeneneu'eni kenemɨtixetahɨawe.
3 »'Ekɨ meri Xuweni pemɨnematɨari,
'akɨmana meri pɨmatsiɨkɨkai kenemɨtitɨrɨkaɨyekai tɨɨri nemɨwarexeiyanikɨ.
'Ekɨ matsi heitserie pepexeiya,
'Ekɨ matsi pepɨtɨrɨkaɨye.
4 Perutsɨ 'ekɨ mexɨakame pepɨkahɨkɨtɨniri:
'Axapemɨnetsi'uyurikɨ.
Ne'ɨya matɨa pemukahuikɨ neti'uximayatsiriwame,
'ayumieme hamewari mɨkayunɨtɨarinɨa hepaɨ pepɨ'aneni.
5 »Tsimehuni matɨa Rewi yawixi memayu'eririya wahepaɨ mekani'aneneni,
yu'ixiparakɨ mepɨteyumemiwa.
6 Ne wahetsɨa nepɨkaheu'ixɨaramɨkɨ.
Kapa 'axatiyuruwame hepaɨ netiuxeiyarienikɨ.
Yuhaxɨakɨ teɨteri mepɨwarukwi,
mewaikatɨwetɨ tuurutsixi mepɨwarutixite wa'ɨkatetsie.
7 Wahaxɨa 'axake'itɨarieka kememɨteyumemiwa,
yuhaxɨakɨ pɨwanake hiwerika memɨwapitɨakakɨ hipame.
Ne nepɨwatanɨ'axɨani nekwiepa,
nepɨwataxɨriexɨani 'Ixaheri kwieyaritsie.
8 »'Ekɨ Kura, 'a'iwama 'aixɨa meputiyuaneni 'ahetsiemieme.
Memɨmatsi'aye'unie pepɨwara'iwani,
'ahɨxie mepɨtitunuma'uni 'a'iwamatɨtɨ.
9 Neniwe Kura, maye temaikɨ hepaɨ pepɨ'ane,
maxa muwiyarie mɨkwa'a hepaɨ.
Maye 'amɨpa hepaɨ, pe'itakwaka pehakunuaka pemanuhuputsie pekaniyuhayewa.
Maye 'uka hepaɨ, xewitɨ pɨkayɨwe mɨmatsi'uximatɨanikɨ.
10 Kura xewitɨ pɨka'inawairieni ti'aitame 'itsɨya, nuiwarimama yuheyemekɨ mepɨteta'aita.
Kepaukake munuani yurikɨ ti'aitame,
'aixɨa mɨtiuka'iyari meuyewetse hɨxiena yamemɨtekahunikɨ kwiepa memɨtama.
11 Kura kaxie waɨkawa pexeiya.
'Ayumieme yupuxu pakuwiwa kaxie kɨyeyaritsie,
meta puxu nunutsi pikwa'a kaxie xawariyari.
Yu'ixurikite pɨti'ekwa kaxie winuyaritsie,
yɨ'ɨkarite kaxie takari hayariyaritsie piti'ekwa.
12 Kaxie winuyari waɨkawa pexeiya, 'ayumieme hɨxiteya pɨyɨyɨwi.
Retsi kemɨtituxa, matsi waɨkawa putuxa tameteya.
13 »Tsawuruni haramara tetsita kiekame kanayeimɨkɨ,
nawiyatsixi mɨwa'axe 'aixɨa mɨtiuye'ane kanayeimɨkɨ,
Tsiruni paitɨ kwieya kaniye'atɨkaimɨkɨ.
14 »'Itsakaxi puxu hepaɨ pɨranuweri,
peru naitsata heuti'ikatɨkaitɨ 'apuka.
15 Kepauka mixei yukuraru 'aixɨa tiuye'anekame,
kwiepa 'aixɨa raku'anekame mɨka'uxipienikɨ,
puyuwaɨri 'ika matɨkɨnikɨ,
ti'uximayatame payuyeitɨa.
16 »Rani 'itsɨkame hepaɨ pɨtiyurieni yuteɨterima wahetsiemieme
'Ixaheri nuiwaritemama watsata.
17 Rani pɨtɨrɨkaɨyeni, kuu mɨtiyumemiwa hepaɨ huyeta mɨkaka,
kepauka kawayu 'ɨkayatsie mɨtakeni,
manaka yuwarima peukaweni.
18 »Yawé 'aku 'awikweitsitɨarika nepɨtakwewie.
19 »Kahari, tenawayamete memanitamiekuni,
matsi mɨkɨ wawarita kanakuyeimɨkɨ kaniwakwimɨkɨ.
20 »'Ekɨta 'Atsexi, 'ikwai 'aixɨa ra'anekame pepɨtikwa'a,
'aixɨa ra'anekame petiukawewiwatɨ pepɨtiwamikwani kwiepa te'aitamete.
21 »Nepɨtahari, maxa 'uka yuxaɨta muyeikani hepaɨ pɨ'aneni,
maxatsi tɨɨrixi witsimemɨ'anene yumaama wahepaɨ.
22 »Kutse, hatetsita 'iteɨritsiekame hepaɨ pɨ'ane,
waɨkawa mɨyɨra,
mamateya kurarutsie manutimake hepaɨ.
23 Kuyaxi tupi memu'ɨ mekanitamɨni,
mekaheinenimayatɨ me'ihekatɨ.
24 Perutsɨ Kutse yutupi heitserie pakwe'e,
mamateya pɨka'akatutuke.
Pamɨpariyutsi Kakuwu kakaɨyarieya pemɨtɨrɨkaɨye,
pemɨtatsi'ɨwiyame 'ixaheritsixi,
tete mɨtse'i hepaɨ.
25 Neuxei Kutse:
Pamɨpariyutsi 'apaapa Kakaɨyarieya mɨmatsiparewie.
Pamɨpariyutsi Kakaɨyari Naimekɨmɨtɨrɨkaɨye,
'aixɨa mɨmatsiyurie.
Ke 'aixɨa mɨmatsiyurie taheima miemekɨ wiyerikɨta,
matsipitɨatɨ meta 'emeukatewatsie miemekɨ haixakɨ,
niwekate tɨɨri kememɨtewarayexexeiya kememɨtewatsitsitɨa.
26 Matsi 'aixɨa pɨti'anene tita 'apaapa nehɨkɨtɨtɨ nematiyetuirie,
hɨri ke 'aixɨa mɨtipitɨarie meripaitɨ mieme reutiyetana,
matsi waɨkawa 'aixɨa peke'itɨarieka.
Hikɨ 'aixɨa kenemɨmatsiyurie pɨ'ahetsiemieme Kutse,
'a'iwama watsata pepanayexeiyarie.
27 »Wenikamini, 'ɨrawe mayu'eriya hepaɨ pɨ'ane,
ximeri tikwatɨ tita mɨtiumi,
taikaita hipame pɨtiwamikwa tita mɨtiutatexi».
28 Mɨpaɨ katiniwarutahɨawe 'Ixaheri yuniwema, tamamata heimana huta nuiwariyari, yuxexuime 'aixɨa kaniwaruyurieni, yuhetsie memeixeiyanikɨ.
'Imatɨrieka Kakuwu yuniwema kemɨtiwarutahɨawixɨ
29 'Imatɨrieka Kakuwu mɨpaɨ katiniwarutahɨawe yuniwema: «'Ariri nekanimɨximeni, kepauka nemɨmɨni. Nepaapama memuyehetsie xekeneneutateka, terɨta 'Epuruni Heti tewiyari mɨkwieyatɨkaitsie. 30 Terɨ Makipera nekanixatani Mamɨre hɨxie mɨti'ane, Kanani kwieyaritsie 'Apɨrahami minanai, 'Epuruni Heti tewiyari kaniunanairieni, yunaitɨ tɨɨriyamama muwa memeutatuariwanikɨ. 31 Muwa mekanayeheni 'Apɨrahami, 'ɨyaya Tsara, 'Itsahaki, 'ɨyaya Xeweka, muwa tsiere Reya neneutateni. 32 Mɨkɨ kwie terɨ kaniunanaiyani, Heti teɨteriyari meri katiniwapiinitɨkaitɨni».
33 Kepauka mɨtiutahayewaxɨ Kakuwu yuniwema tiwakuxaxatɨwatɨ, 'ukahuka 'imatɨrieka kaniuka'ietɨyani kaniumɨni. Kaneyani yu'ukiyarima wahetsɨa.