5
1 Mawari wewiwamete tewa'aitɨwamete teɨteri watsata mekananuyexexeiyarɨwani yunaitɨ, mekaniukayatsarieni Kakaɨyari hetsiemieme memɨhɨritɨariekakɨ, teɨteri wahetsiemieme memixatɨanikɨ 'imikieri mawariyari, meta mawarite tita 'axamemɨteyurie hepaɨtsita. 2 Kaniyɨweni 'atsimemɨkatemate meta memeuyexɨrɨwe wanenimayatɨ mɨwatahɨawekɨ, mɨkɨta weranitɨ 'amuyeikakɨ wahepaɨ. 3 Mɨpaɨ mɨ'anekɨ 'ayumieme kaneuyeweka mawari Kakaɨyari mɨxatɨanikɨ teɨteri tita 'axamemɨteyurie hepaɨtsita, mɨpaɨta pɨreuyewetse mawari mɨwewienikɨ yɨkɨmana tita 'axamɨtiuyuri hepaɨtsita 'aixɨa miyurienikɨ.
4 Mɨkɨ meta, tewi yɨkɨmana pɨka'uyukaye 'ipaɨ mɨtihɨritɨariekakɨ, matsi Kakaɨyari yarenayexeiyaku xeikɨa pukayerie 'Aruni hepaɨ. 5 Yaxeikɨata Kɨritsitu witsi'anetɨ pɨka'ayuyeitɨa yɨkɨmana mawari wewiwamete tiwa'aitɨwame mayanikɨ, matsitsɨ mɨpaɨ pɨtipitɨa kemɨ'ane mɨpaɨ mɨtitahɨawixɨ:
«'Ekɨ pepɨneniwe.
Hikɨri nekamaniutinuiwitɨani».
6 Kemaine xeime xapatsieta:
«'Ekɨ mawari wewiwame pekanihɨkɨtɨni yuheyemekɨ mieme,
Merikitsereki hepaɨ».
7 Kɨritsitu mexi tewitɨtɨ 'a'uyeikakai karima kaniyutanenewieni hahiwatɨ 'utatsuatɨ, kanitawawirieni kemɨ'ane mɨyɨwekai mitawikweitsitɨanikɨ kapa 'umɨnikɨ, pu'enierie Kakaɨyari mariweme mayeitɨakɨ. 8 Tsepa nu'aya mɨhɨkɨtɨkai, tiukwineka yapɨretima yamɨtikamienikɨ, 9 mɨpaɨ raye'atɨarieka, yuheyemekɨ memɨtawikweitsitɨarienikɨ wapitɨatɨ kanayani, yunaitɨ yamemɨtekahu kemaine, 10 Kakaɨyari kanenayexeiya mawari wewiwamete tiwa'aitɨwame mayanikɨ Merikitsereki kemɨtiuhɨritɨarie hepaɨ.
Kemɨtiwaku'imaiyakai memɨkatehayewanikɨ yuri mete'erietɨ
11 Mɨkɨ Merikitsereki hepaɨtsita waɨkawame niuki mɨkwaniwe tepeixeiya yatemɨtexehekɨatsitɨiyanikɨ, xeme xemɨyu'ɨraraxiekɨ kexemɨte'u'enana. 12 Kamɨtsɨ, mɨpaɨ pɨreuyewetse matsi te'ɨkitamete xemɨhɨkɨtɨnikɨ, mɨixa manuyetɨakɨri yuri xemɨte'uta'eri, peru xekaneiyehɨaka kemɨ'ane hutarieka mitsutɨani tixe'ɨkitɨatɨ tsutɨapai mieme 'ɨkitsika Kakaɨyari kemaine, hekwamete kememɨte'ɨkitɨarie. Retsi xeheuyehɨatɨ xekanakɨne, 'ikwai mɨtɨrɨkaɨye xekematɨ xepɨka'akɨniwawe. 13 Yunaitɨ retsi memɨtsitse mepɨka'iyamatɨka niuki mɨheitserie hepaɨtsita, mepɨtɨɨri 'akuxi. 14 'Ikwai mɨtɨrɨkaɨye 'amemuyumate wahetsie kanimiemetɨni, mɨkɨ memɨ'iyamatɨkakɨ yu'iyaritsie memɨteyɨ'ɨkitɨawawekɨ para memipatanikɨ tita 'aixɨa mɨti'ane tita 'axamɨti'ane, mɨkɨ wahetsie pɨmieme.