7
1 ne kepauka 'Ixaheri nemu'uayema,
'Epɨrahini meta Tsamariya ke'axamemɨteyuriekai waɨkawa
mɨkɨ naitɨ pɨtihekɨare.
Mɨkɨ mepɨtewa'itaiyakai,
kepauka mɨtinawarienekaitsie kiita,
yumɨiretɨ kaye'utɨma mepɨtenawatɨwe.
2 Mɨpaɨ mepɨkateku'eriwani
ne naime nekatinimaika 'axakememɨte'u'iyari.
Ke'axamemɨteyurie mɨkɨ pɨwakunama,
ne naime nepɨtimate.
3 »'Axamemɨteyuriekɨ ti'aitame mepɨtemawieritɨa,
meta yaxeikɨa 'itsɨkate memɨtewa'itaiyakɨ.
4 Huxunu muwatita'a hepaɨ mepɨ'anene
taitsie kɨyexi manunetɨani pɨkaheuyewetse
kepauka paa wewiwame harina mɨhawiya
kepauka 'aixɨa mɨyɨnike.
Yunaitɨ mɨpaɨ mepɨ'anene kayu'ɨitama wahamatɨa memɨhitɨwe.
5 Ti'aitame 'ixɨarari matiwewiwatsie 'itsɨkate
winukɨ mepɨtitarɨwewe,
ti'aitame pɨreuyehɨpa kemɨtimariwe
tɨratu wewietɨ yunaime meminanaima wahamatɨa.
6 Huxunu hepaɨ putiutatawe wa'iyari,
'axamɨti'ane ti'eriyakɨ.
Tɨkarikɨ wahaxɨa peukukutsu,
ximerita panutaneniere.
7 Yunaitɨ mɨkɨ huxunu mɨtixɨka hepaɨ mepɨtexɨxɨka,
wahetsɨa memɨte'aita mepɨwatakukuya.
Yunaime te'aitamete mepɨwaranakaxɨrɨwa,
peru xewitɨ mɨkɨ pɨkanetsikuwaune nemiparewienikɨ.
8 »'Epɨrahini yumɨireme nuiwarite pɨwanɨ'ɨ,
papa tapaxeikɨa mɨwakwani hepaɨ pɨ'ane.
9 Nuiwarite kiekatari tɨrɨkariyaya mepɨkɨme,
perutsɨ mɨkɨ 'atsipɨkatiyumate.
Kɨpateya putituxarixɨ,
peru mɨkɨ 'atsipɨkatimate.
10 Mariwemekɨ 'Ixaheri pɨtihekɨata yuhepaɨtsita,
peru mɨkɨ Yawé yukakaɨyari hetsɨa pɨkanuawe.
Mɨyaranuyemietɨ, pɨka'ikuwaune tɨma.
11 »'Epɨrahini kukuru mautuxa
mɨkatiyu'aitɨarinɨa meta mɨkatimaiwe hepaɨ pɨ'ane,
heiwa parewiya puta'iwawa 'Ekipitu kwieyaritsie,
heiwata 'Atsiriyatsie.
12 Peru kepauka mɨpaɨ memɨteyurieni
yapauka newipi waheima nepuwiwieni,
wikixi wahepaɨ nepɨtiwaxɨrieni,
'atahutamexɨa matsi nepɨwaranutaxɨrieni 'axamemɨte'uyurikɨ.
13 Xɨa'ui nepaine memɨnetsi'uku'eiri wahetsiemieme.
Meke'uka'unarieni nehɨxie memɨnetsi'aye'uniekai.
Ne yemekɨ nepɨwaranayexeiyawe,
peru mɨkɨ hatsuaku yuri mehaitɨkaitɨ mepɨkanetsihahɨaweni.
14 Yu'iyarikɨ mepɨkanetsihahɨawe,
yu'utatsie xeikɨa mekaheitɨ meputitsuana.
Yu'iku mekuwaunike meta yuwinu 'axa'anekɨa mekanekɨkani
nehepaɨtsita meheuniutɨ menakɨkani.
15 Ne'aixɨa nepɨtiwaru'ɨkitɨa meta wamamate neputitɨrɨkariyaxɨ,
peru mɨkɨ 'axa xeikɨa mepɨteku'eriwakai nehepaɨtsita.
16 Kakaɨyari 'Amutewi hetsɨa mepɨka'axɨaku,
tupi tiyu'irɨwiyame hepaɨ mepɨ'anene.
Peru wa'itsɨkate 'ixiparakɨ mepɨka'unarieni
waniuki 'axamanuyɨnekɨ,
meta 'Ekipitu kiekatari
mepuwatinanaimani.