6
Kitsariyaxi 'uximayatsikaya
1 Mɨkɨ wiyaritsie ti'aitame 'Utsiyaxi 'ɨmɨkuri, Ti'aitame Kakaɨyari nekaniuxeiya wapaitɨ 'aheutitewametsie 'akakaime mariwetɨ 'uwenitsie 'akaime, yu'ixurikitsie mataxitɨanikɨ tukita naitɨ puyenɨkakai. 2 Heimana mepuyewɨkai 'iteɨtametemama, yuxexuitɨ 'anate 'ataxexuime mepexeiyatɨkatei, hutamekɨ yuhɨxie mekaneuyutinatɨkateitɨni, hutamekɨta yɨ'ɨkate meteheutinatɨkatei meta hutamekɨ mete'ɨwɨwekai. 3 Mɨpaɨ yuxexuitɨ meteyutahɨawetɨ:
«Kanipatsieka, kanipatsieka, kanipatsieka Yawé Naimekɨmɨtɨrɨkaɨye,
naitsarie kwiepa pɨmatsiɨkɨ witsikemɨ'ane».
4 Waniuki yuariyaya me'u'enieka, kitenie tsutumeyari kɨyeyari kaniwatayuaxɨani meta tukita kɨtsi kaniuyeyerɨni. 5 Hikɨ nekaniutahiwa: «Xɨa'ui ne, nehetsie pɨrahɨiwa. Tewi nepɨhɨkɨ neteta mɨkati'itiya pɨrayeneika meta teɨteri 'axame'utiyuaneme watsata nepuyeika, matsi Ti'aitame nepuxei, Yawé Naimekɨmɨtɨrɨkaɨye».
6 Hikɨ 'ana xewitɨ Kakaɨyari teɨtameya nehepa kanawietɨyani. Yumamatsie tɨɨ kanatukaitɨni, tepɨa titɨkɨmekɨ mawari taiyametsie meyetukai. 7 Mɨkɨkɨ netenitsie kaneniuyuitɨani, mɨpaɨ kanetiniutahɨawe:
«Neuxei, 'ikɨ 'ateni kaniuyuitɨani,
'axamɨti'ane pemɨrexeiyakai katineukuyeitɨarieni,
meta ke'axapemɨtiuyuri, pekatineuyehɨwiyarieni».
8 Hikɨ Ti'aitame niukieya nekaniu'enieni mɨpaɨ 'utaineme:
―¿Kemɨ'ane nepɨtanɨ'ani? ¿Kemɨ'ane tahetsiemieme pɨmie?
Hikɨ mɨpaɨ nekaniutayɨni:
―Ne kenenanɨnɨ'a. 'Ena nekaniuweni.
9 Mɨkɨ mɨpaɨ kaniutayɨni:
―Kenemie mɨkɨ teɨteri mɨpaɨ ketiniwaretahɨawi:
»“Tsepa kwi xemɨta'enana matsi xepɨkaheti'enatɨkɨne,
tsepa kwi xemɨtaneniere matsi tixaɨtɨ xepɨkatexeiya”.
10 'Ikɨ teɨteri wa'iyari tsetse'ime kenayeitɨa,
wa'enakareme kenanunaxɨa
meta mekaheuneniereme keniwarayeitɨa,
nɨkahɨrixɨa me'uneniere,
me'u'enanani,
meta yu'iyarikɨ meheitimaixɨani,
kapa mete'uhayewame
'aixɨa meteheu'erietɨ mehayeitɨarieni».
11 Hikɨ mɨpaɨ nekaniutayɨni:
―¿Ti'aitame, 'ikɨ kereutere?
Mɨkɨ mɨpaɨ kaniutayɨni:
«Kepaukake kiekarite mɨka'unariexɨanitsie
nixewitɨ mana mɨka'uyeikanitsie,
kepaukake kiita teɨteri memɨka'ayetetɨkanitsie,
meta 'ɨtsi yuxaɨta kumanekaku 'axa'anekɨa,
12 Yawé yunaime teɨteri kepaukake 'ateewa paitɨ mɨwaranɨnɨ'anitsie,
meta mɨkɨ kwie kepaukake yuheyemekɨ yuxaɨta muyuhayewatsie.
13 Xɨka 'akuxi kwie tamamatatsie mieme xewitɨ yuhayewaneni,
mɨkɨ 'akuxi mekanakumaweriyariekuni.
Peru kepauka xiu mawitekietsie meta tuaxa
kutsunuyari kemɨtiyukuhayeikawa,
mɨkɨ yɨrameyari mɨpatsie kanihɨkɨtɨni».