14
1 Yurikɨ, Yawé Kakuwu kanitinenimayatamɨkɨ, hekwamekɨta 'Ixaheri kananayexeiyamɨkɨ. Wakwietsie kaniwa'atɨamɨkɨ. Kɨkamete mekaniwatinɨikuni, Kakuwu nuiwarimama wahamatɨa mekaniyutinɨikuni. 2 Teɨteri yukwietsie mepɨwatanaki'erieni meta wakiekaritsie paitɨ mepuwatuayu. 'Ixaheritsixi teyu'uximayatsiriwamete 'ukitsi meta 'ukarawetsixi Yawé kwieyatsie mepɨwarayeitɨani, memɨwaraye'uniekai mekaniwaranutaxɨriekuni meta mekateniwata'aitɨakuni kemɨ'ane memɨtewa'aitɨakai.
3 Kepauka Yawé kexemɨte'uka'eniwakaikɨ mɨxeka'uxipitɨani, kexemute'u'uximatɨarie meta waɨriyarika xepitɨarietɨ xemɨte'aitɨariekaitsie, 4 'ikɨ xatsika xepɨtaxata ti'aitame Wawiruniya hetsiemieme:
Neuxei kereutiparixɨ waɨriyarika mɨtati'aitɨakai,
meta haxɨaya kereutiparixɨ.
5 Yawé 'axateyuruwamete wakɨye kananumura,
memɨmamariwawe wa'itsɨ pakamuraxɨ
6 haxɨakɨ meta yatiwaruwayatɨ
teɨteri pɨtiwakwinitɨakai,
haxɨa mɨkapariwekɨ
nuiwarite mɨtiwa'aitɨakai meta puwaruweiyakai.
7 Kwie naitɨ 'aixɨa 'iyari kani'uxipieka,
meta temawierikakɨ mekaniutihiwani.
8 Metsɨ huku meta kariuxa Riwanu mieme
'ɨaritɨ mekaniutinaweni 'ahepaɨtsita, mɨpaɨ mekaniutiyuaneni:
«Kepauka pematihɨiyatsie paitɨ,
tawariri xewitɨ pɨkatatsihawitexɨawe».
9 Hutipaitɨ meukatewatsie, 'ahekɨ,
teukiyapa putayɨyɨaka
matsi'anunakeke,
'ahekɨ mɨyapemuyɨkɨ mɨkite mepanutaneniere,
kemɨ'ane kwiepa memanuyetekai.
Yapɨtiyurie yunaitɨ nuiwaritetsie te'aitamete
yu'uwenitsie memanuku'unikɨ.
10 Mɨkɨ yunaitɨ mekaniti'akuni mɨpaɨ mekametenikɨhɨaweni:
«'Ekɨta pekaniutaweranaxɨani.
'Ekɨtsɨari ta'iwa pekanihɨkɨtɨni».
11 'Ekɨ kepemɨtiyuta'ɨrekai teukiyapa kaneukahɨiyani,
'a'aripa yuariyaya yunɨkame.
Kwitsiteri watsata pekanikutsuni,
meta harekuxi mekamaninɨkani.
12 Kekuta pe'ɨyɨka muyuawitsie pepanakahɨiya,
xurawe tuxakɨta mieme.
'Ekɨ, nuiwarite pemɨtiwa'aitɨakai,
kwiepa pekaniukaweni.
13 'A'iyaritsie mɨpaɨ peputainekai:
«Muyuawitsie paitɨ nepanutiyani.
Ne'uweni mana paitɨ nepɨtakeni
Kakaɨyari xurawetsiximama waheima.
Tayeta mutiniere paitɨ nepɨtita'aita,
kakaɨyarixi wahɨritsie paitɨ.
14 Nekananutiyeimɨkɨ haiwitɨri yekɨrita paitɨ 'emeutitewatsie,
'Amutewi hepaɨ nekani'anekamɨkɨ».
15 Peru neuxei teukiyapa pepeukahɨiya,
putsu 'emeukatewatsie.
16 Kemɨ'ane memɨmatsixeiya, kwi mepɨmatsikuxexeiya,
meta kepemɨranuyeyanikɨ mɨpaɨ meputiyuane:
«¿Kamɨtsɨ 'ikɨ kwie mutayuitɨwakai tihɨkɨ
meta te'aitamete muwamariutakai,
17 kwie naime 'akumaweme mayeitɨwakai,
wakiekarite mɨti'unakai
meta memanutaxɨriya hatsuaku mɨkawatatuayakai?»
18 Yunaitɨ nuiwarite tewa'aitɨwamete
'aixɨa 'anemekɨ mepu'uxipie,
yuteukiyapa yuxexuitɨ.
19 Matsi 'ekɨ teukiya kameniuhayani
kɨye kutsunuyari mutaxainixɨ hepaɨ.
Kemɨ'ane 'ixiparakɨ memukwi'iwaxɨ,
kemɨ'ane teukiyapa tetɨata memeukakɨ,
mɨkɨri naime mepɨmatsi'anukana.
Mɨki ketsinariekame hepaɨ pekani'aneni.
20 Te'aitamete wahamatɨa teukiya pehexeiyatɨ pepɨka'ayani,
'akwie pemuka'unaxɨkɨ
meta 'ateɨterima pemɨwarukwikɨ.
Tawariri pɨkataxatsieni
'axateyuruwamete wanuiwari.
21 Wapaapama 'axamemɨte'uyurikɨ,
xekeneukuha'arita niwemama hakewa memekwi'iwakɨ.
Mepɨka'anuku'uweni kwie wahetsie mɨtinakenikɨ
meta kiekaritekɨ kwiepa mepɨkahakɨnɨtsani.
22 «Ne mɨkɨ wahepaɨtsita nekananukukemɨkɨ
―Yawé mɨpaɨ kanaineni―.
Ne Wawiruniya nepɨka'una
kemɨtitewakɨ meta nuiwarieya,
tsutumeyari meta 'imatɨreme
―Yawé mɨpaɨ kanaineni Naimekɨmɨtɨrɨkaɨye―.
23 Naikatsi 'ɨtsita kiekatari wakie nepayeitɨani,
haa mayema,
meta tiyu'uname matsikɨiyarikɨ nepeku'itieni»,
Yawé Naimekɨmɨtɨrɨkaɨye mɨpaɨ kanaineni.
Niuki 'Atsiriya hepaɨtsita mieme
24 Yawé Naimekɨmɨtɨrɨkaɨye kaniyuhɨritɨani:
«Yemekɨ kenemɨtiku'eriwa, mɨpaɨ katinaye'amɨkɨ,
kehepaɨ nemɨtiyurienikekai, mɨpaɨ katiniyɨmɨkɨ.
25 'Atsiriya 'ena nekwiepa nekanika'unamɨkɨ,
nehɨritetsie nekanitiketsixɨamɨkɨ.
Neteɨterima mɨkɨ yuku hetsɨana mieme me'anuyetetɨ mekatenihayewakuni,
'ari wanaiparietsie mɨkɨ 'ika pɨkahahetere».
26 'Ipaɨ nekatiniyurimɨkɨni
naime kwie hetsie,
'ikɨ kanihɨkɨtɨni nemamá nemeutatsera
nuiwarite yunaime wahetsie.
27 Xɨkari mɨpaɨ tiɨyɨhɨawe Yawé Naimekɨmɨtɨrɨkaɨye,
¿kemɨ'ane pɨyɨwe mita'imaiyakɨ?
Xɨkari mɨkɨ yumamá hautatserani,
¿kemɨ'ane pɨyɨwe muwaketɨanikɨ?
Niuki piritsiteutsixi wahepaɨtsita mieme
28 'Ikɨ niuki Kitsariyaxi hetsie kaninuani kepauka ti'aitame 'Akatsi mumɨ mɨkɨ wiyaritsie:
29 Piritsiteutsixi yunaitɨ xeme,
xepɨkayutemamawieka kename 'akamurixɨ
'itsɨ kɨmana pemɨtiweiwakai,
matsi kuu xewitɨ kanayenemɨkɨ
kuu nanayaritsie,
mɨkɨ nuiwarieya kuu hawiwetɨ kanayeimɨkɨ.
30 Kemɨ'ane memɨnanaimarie muxatsi wahepaɨ mepɨtetikwani,
memɨteheuyehɨwa 'aixɨa 'anemekɨ mepɨka'uxipieni.
Matsi wananayari haakakɨ nepɨmieni,
memuyuhayewa nekaniwaka'unamɨkɨ.
31 Keneutatsuakani meta keneutahiwani, kiekari 'ituparieya.
Keneuyɨyɨakani marikakɨ, naitɨ Piritsiteu kwieyari.
Matsi tayeta kuyaxi kɨtsi haiyari hepaɨ meteyuxexeiyatɨ 'umekanayehuni,
meta nixewitɨ pɨkahanayeyeika yu'utuma kememɨtehewetɨka.
32 ¿Ke'aneme niuki tepɨwayetuirieni tupiritsixi mɨkɨ nuiwaritsie miemete?
Kename Yawé Tsiyuni 'a'utake,
mana memuyuti'awietakɨ
teɨterimama memɨte'ukakukuine.