17
Niuki Ramatsiku hepaɨtsita mieme
1 Niuki Ramatsiku hepaɨtsita mieme:
«Ramatsiku xekeneuxeiya.
Kiekariri pɨkahɨkɨtɨni.
'Unitɨ kwinie netɨ kanikemɨkɨ.
2 Kiekarite 'Aruhexi mieme
kaniku'eiriwamɨkɨ,
'ɨ'ɨxayatɨ kanayeimɨkɨ mana muxatsi
mekatenitikwaikuni nixewitɨ kawamariutakaku.
3 'Epɨrahini kiekari mɨtɨrɨkaɨye kaneuyehɨamɨkɨ,
Ramatsiku ti'aitame kahexeiyatɨ kaniyuhayewamɨkɨ.
'Arami memuyukuhayewaxɨ meta tita memɨtehexeiyakai
mɨkɨ 'ixaheritsixi waniwema wahetsiemieme katinayeimɨkɨ
―mɨpaɨ kanaineni Yawé Naimekɨmɨtɨrɨkaɨye―.
4 »'Iya tukaritsie
Kakuwu kemɨtimariwekai kanitaweranaxɨamɨkɨ
meta kemɨtiwaiyakai kanitawamɨkɨ.
5 Tɨriku 'itsaname hepaɨ kani'anekamɨkɨ,
yumamakɨ tɨriku 'uriyari pɨka'itsana,
kepauka 'uriyari manukutɨkieni
Xepahini mayeweritsie hepaɨ pɨtiyɨni.
6 Peru hipatɨ puyuhayewa,
kepauka huriwu manuyekatsiwa hepaɨ,
hutatɨ yatɨni haikatɨ takari puyukuhayeikawa
xawaritetsie meutitetewatsie,
heiwatɨ naukatɨ yatɨni 'auxɨwitɨ
naime xawarite kɨyeyaritetsie».
Yawé mɨpaɨ kanaineni, 'Ixaheri Kakaɨyarieya.
7 'Iya tukaritsie
tewi, kemɨ'ane mitawewi pɨtiwauni,
Mɨpatsie 'Ixaheri hetsiemieme kwi pɨxeiya.
8 Kakaɨyarixi memɨte'atimawiyarɨwari pɨkaxeiya
mitiwewiekai,
meta kakaɨyarixi 'Atserá 'ɨkiyarite pɨka'anakuxeiya,
meta hakewa 'ɨkwa matitaiyakaitsie
mɨtiutiwewiekai.
9 'Iya tukaritsie kiekarite mɨtɨrɨkawi, muku'eiriwaxɨ 'ixaheritsixi ya'aneme meheutiwiwiexɨaku, kiekarite muku'eiriwaxɨ hepaɨ tiyuxexeiyatɨ kanayeimɨkɨ 'uhukuyatɨ meta 'u'ɨtsiyatɨ mayeika hepaɨ. Naitɨ 'akumawetɨ kanayeimɨkɨ.
10 'Akakaɨyari metsiwikweitsitɨwame pematɨmaikɨ,
'ai mɨmatsitseiriya pemɨkahaye'erikɨ.
'Ayumieme, tsepanetɨ 'iteɨri 'aixɨa 'aneme pemuka'iteɨtaxɨ
meta tsepa kaxie 'ateewa mieme pemukayatsaxɨ,
11 tsepanetɨ tsipemɨtikuweriya 'apemɨtika'iteɨtaxɨtsie paitɨ,
meta tsepanetɨ 'uxa'arieka pemitixutuitsitɨa,
kukuiniya tukariyaritsie meta kwiniya mɨkayu'uayemarinɨa tukariyaritsie,
tixaɨtɨ pɨkatikaxuawere.
12 Xɨa'ui yumɨiretɨ nuiwarite wayuarika.
Haramara kemɨtiutapauwarɨka mɨpaɨ meputaine.
Xɨa'ui teɨteri wahiwari.
Wayuarika haa 'ateewa meukaxɨrɨweni hepaɨ meputaine.
13 Tsepanetɨ mɨkɨ teɨteri memutihiwa haa 'ateewa meukaxɨrɨweni hepaɨ tiyu'eniɨriɨkɨmekɨ,
kepauka mɨkɨ mɨwarutate'a mepuyuta'una,
'ekakɨ mepu'enitsitɨariexime
xatsi hɨritetsie mieme hepaɨ,
meta 'eka tɨrɨkaɨyetɨ kwauni mu'enitsitɨaximeni hepaɨ.
14 Kutaikaireyu, mekaniutimariutsiwani.
Kakatariwekaku 'akuxi, mepukumamawere.
Mɨpaɨta mepɨte'anuyekɨne kemɨ'ane memɨtatsitaweiya,
mɨpaɨta ti'anetɨ wahetsie 'upɨramie kemɨ'ane takie memɨtenawatɨwe.