25
Yawé hetsiemieme kwikari nɨawari
1 Yawé, 'ekɨ pepɨnekakaɨyari,
'aixɨa nepaineni kepemɨtitewakɨ meta nepɨmetsinɨawani
mariweme pemɨtiyurienekɨ.
Meripaitɨ kepemɨtiyɨhɨawixɨ
mɨpaɨ pepɨtiyuriene heitseriemekɨ.
2 Kiekari, 'uniyari kwiniemieme netɨ 'uweme pepayeitɨa,
kiekari 'aixɨa mɨreukukurarutɨarie pepanuti'unaxɨ.
'Ari 'ateewa kiekatari waparatsiyu kiekari pɨkahɨkɨ,
tawariri pɨka'anukuketɨarieni.
3 'Ayumieme teɨteri metɨrɨkawitɨ 'aixɨa mepɨmatehahɨawe,
nuiwarite 'axamemɨte'u'iyari wakiekari pɨmatsi'ayemakaxe.
4 'Ekɨtsɨ pemɨhɨkɨkɨ,
kepauka memu'uximatɨariekatsie,
tixaɨtɨ memɨkate'eriwa wa'inɨari,
mɨreuyehɨwa hetsie nunuwame,
wiyeri mɨtɨrɨkaɨye hepaɨtsita 'ewiweme hetsiemieme,
'etɨriya xɨri hepaɨtsita mieme,
Matsi, 'axamemɨte'u'iyari wahɨtsierikayari
wiyeri mɨtɨrɨkaɨye hepaɨ kani'aneni kuraru mɨtse'i maye'unie,
5 xɨri makumawetsie mieme hepaɨ kani'aneni.
'Ekɨ teewatari wayuariya kayuwatɨ pepɨkupitɨwa,
xɨri haiwitɨri kemɨtixeriya hepaɨ,
meta pepenukayunitɨa 'axamemɨte'u'iyari wakwikari.
6 Yawé Naimekɨmɨtɨrɨkaɨye, 'ikɨ hɨriyaritsie
katinikuha'aritɨamɨkɨ yunaime teɨteri wahetsiemieme
'ikwai 'ixɨarariyari witsiti'aneneme ranapikame,
winu xeiwiyari mexeiya 'ixɨarariyari,
'ikwaite 'aixɨa ti'anenekame meta winu 'aixɨa mɨ'ane xeiwiyari mexeiya.
7 'Ikɨ hɨriyaritsie kaneikutsanamɨkɨ
'ixuriki teɨteri yunaime muwareukunama,
meta matakɨ nuiwarite yunaime muwakanama.
8 Mɨki mɨɨya kanikumaweriyamɨkɨ yuheyemekɨ,
Yawé naimekɨmɨyɨwe yunaime teɨteri kaniwara'ukaipiexɨamɨkɨ,
meta naitsarie kwiepa
teɨterimama memɨkananaimariekakɨri katinikumaweriyamɨkɨ.
Yawé yɨkɨmana mɨpaɨ kanaineni.
9 'Iya tukaritsie mɨpaɨ pɨtitaniukieni:
«Huu, 'ikɨ pɨtakakaɨyari,
hetsiena yuri tepɨte'erieka, mɨkɨ pɨtatsi'utawikweitsitɨa.
'Ikɨ pɨhɨkɨ Yawé, hetsiena yuri temɨte'erie,
tepɨtatemamawieka tepuyutemamawieka wikweitsitɨarikayatsie».
10 Yawé tɨrɨkariyaya 'ikɨ hɨritsie puyuhayewa,
peru Muhawi makumatsie pɨtaketsinarieni,
'ɨxa mɨtiketsinarɨwa hepaɨ muwatiketsinaruwatsie.
11 Mana yumamá pɨtatseraxɨani,
tewi hauweme hepaɨ.
Peru Yawé kememɨteyuti'ɨre kaniwanawairiemɨkɨ,
meta ke'axamɨtiyurimɨkɨ yumamatekɨ.
12 Kanika'unamɨkɨ, kanetihɨamɨkɨ meta kaniwatayuitɨamɨkɨ
'akuraru 'amatitewa meta 'aixɨa mɨ'anene,
kepaukake tumuanari mayani 'anake kanihayewamɨkɨ.