32
Ti'aitame 'aixɨa tiuka'iyaritɨ
1 Neuxei, xewitɨ ti'aitame heitseriemekɨ katinita'aitamɨkɨ
meta kuwexinaruritsixi 'aixɨa 'anemekɨ mekatenita'uximayatakuni.
2 Yuxexuitɨ mɨkɨ 'eka hepaɨtsita memuyu'awietani hepaɨ mekani'anekuni,
wiyeri mɨ'ekama mɨkawakema,
haa 'akite 'utɨma muhapaneni hepaɨ makumawetsie,
'ai 'etɨriyari mekanihɨkɨtɨkakuni makumawetsie.
3 Kemɨ'ane memeuneniereni 'aixɨa mepɨteneniereni,
memeu'enana mepuku'enakareni.
4 Mekaheitimaitɨkɨkatɨ memutiniuka mepeitimaitɨkɨkani meta mepeti'enatɨkɨkani,
memɨnenurietɨka 'aixɨa mepɨte'uxaxatani.
5 Tewi 'aixɨa mɨtiuka'iyariri pɨkatiuterɨwarɨwani mɨka'uka'iyari
meta mɨtiuyuka'irɨwiya heitserie pɨkaxeiyarieka.
6 Mɨka'uka'iyari tixaɨtɨ mɨkatiyunaki'eriekɨ katinikuxatani,
'axamɨti'ane xeikɨa katiniku'eriwani,
'inɨari niukiyaritsie yapɨkatikamie
meta Yawé hepaɨtsita 'itarikakɨ katinikuxatani,
meuhaakamɨkɨ heuhakamɨkɨme kanikuhayeikawani,
meta kemɨ'ane meuharimɨkɨ pɨkakuharitɨwa.
7 Mɨtiyukwamana katinikuwauneni kemɨtiwakwamanakɨ,
meta yakatinikuxatani kehepaɨ mɨtiwananaimanikɨ,
tixaɨtɨ memɨkatehexeiya kaniwaka'unani 'itarikakɨ,
tsepanetɨ tixaɨtɨ mɨkarexeiya mɨtixanetane.
8 Matsi, tewi 'aixɨa mɨtiuka'iyari,
'aixɨa mɨti'anekɨ kaniyɨhɨaweni,
meta ke'aixɨa mɨtiyuriene mɨkɨtsie kanimatsiɨkɨni.
'Ukari Kerutsaremetari
9 'Ukarawetsixi nitixaɨtɨkɨ xemɨkateyɨhɨawe,
xekenanuku'uti meta xekeneneu'eni.
'Ukari kename 'atsikatixeyurieni xemɨteku'eriwa,
xekeneneu'eni kenemɨtixetahɨawe.
10 Xeme, 'atsikatixeyurienike xemuyu'erie,
xeiwiyari 'anuyeyayu matsi xekanitiyɨyɨakakuni marikakɨ,
karikɨ kaxie pɨkatixuawere,
pɨkatika'inɨiyani.
11 'Ukarawetsixi xemɨkayu'iyaritɨa, xekenemamaka.
Xeme, 'aixɨa 'iyari xemu'uwa,
xekeneuyɨyɨakatɨkani.
Xekeneuyutikemaripi, xekeneuyutimaweripi,
hiwerika kamixayari pɨta xekenanakatɨki.
12 Yutawitsie xekeneuyuhutsunani,
kwie 'aixɨa mɨ'anene xemaka'etsa hetsiemieme,
kaxie 'aixɨa mutiukaxuxuawere hetsiemieme,
13 kwie hetsiena neteɨterima memu'uwa hetsiemieme
xuya xuawekaku meta 'ɨtsi,
naitsarie kiita hakewa temawierika mexuawe
meta 'ikɨ kiekari temawierika mexeiya hetsiemieme.
14 Paratsiyu kaniku'eiriwamɨkɨ
meta kiekari teɨteri yuwaɨkawa memimatekai,
yuheyemekɨ terɨ xeikɨa kanakɨnikuni kiekari
'aixɨa mɨ'anene meta tuxiyute,
puxuri tiwa'iyari kanayeimɨkɨ,
'ɨxa mɨtineni muxatsi wahetsiemieme kanayeimɨkɨ,
15 kepaukake taheima paitɨ
'Iyari temakanɨ'airiyarieni tahetsie mɨtinakenikɨ.
Hikɨ makumawetsie kwie 'aixɨa mɨ'ane mɨraka'etsitɨre kanayeimɨkɨ,
meta kwie 'aixɨa mɨ'ane mɨraka'etsitɨre 'uhukuyatɨ kanayeimɨkɨ.
16 Tita mɨtiheitserie makumawetsie kaniuyeikamɨkɨ,
meta kwie 'aixɨa mɨ'ane mɨraka'etsitɨretsie tita mɨtiheitserie mana kaniuyeikamɨkɨ.
17 Tita mɨtiheitserie kayuwatɨ mexeiyanikɨ mɨ'ayumieme kanayehɨamɨkɨ,
'aixɨa 'iyari temu'uwanikɨ 'ikwaxiyari kanayehɨamɨkɨ.
18 Neteɨterima kayuwatɨ 'umakaku mekaniu'uwakuni,
kiite 'aixɨa 'anenemeta,
witsitiu'anekaku mepu'uxipieka.
19 Tsepanetɨ tee waɨkawa huku mukatuaxixɨ
meta tsepa kiekari 'akuweritɨ mayeitɨarie,
20 'aixɨa xeke'itɨarieka xeme,
xemuka'etsa haatetsita,
meta tuuru puxu hamatɨa xemɨwarutatuaya.