1 'Iya tukaritsie ti'aitame Wawiruniya kiekame Meruraki-Wararani Wararani nu'aya, xapa niuki 'aye'ukame 'Etsekiyaxi kanenɨ'airieni meta 'imikieri, tiutamarieka kename rekuyekai meta kenameri 'etsiwa 'aixɨa reu'eriekai. 2 'Etsekiyaxi mɨkɨ ranupika kaniyutemawiekaitɨni, mɨkɨta tupiritsixi katiniwaruxeitsitɨani naime yupiinite waɨkawa mɨraye'atɨka mɨrexeiyakai: pɨrata, huru, witsimɨtiɨ'ɨatɨka, hatseiti 'aixɨa mɨ'ane, meta kuyaxa timieme mɨtiuyepine tinaime. 'Etsekiyaxi naime yuparatsiyuta timieme pɨtiwaruxeitsitɨa nitixaɨtɨ pɨkatiuhayewaxɨ meta keyeumetsie mɨti'aita naime puwaruxeitsitɨa.

3 Hikɨ Kakaɨyari niukameya Kitsariyaxi ti'aitame 'Etsekiyaxi hetsɨa kaneyani mɨpaɨ katinita'iwawiya:

―¿Ketita mɨkɨ teɨteri meteheuyehɨakai? ¿Hakewa mepeyekɨ?

'Etsekiyaxi mɨpaɨ katinita'eiya:

―'Ateewa mekaneyekɨne Wawiruniya kwieyaritsie paitɨ, mana meheyekɨneka mepɨnetsiheku'iwataxɨ.

4 Kakaɨyari niukameya mɨpaɨ katinita'iwawiya:

―¿Ketita 'aparatsiyuta timieme mete'uxei?

'Etsekiyaxi mɨpaɨ katinita'eiya:

―Tinaime muwa timieme mepɨte'uxei, tixaɨtɨ nepɨkatiuti'awietaxu mɨraye'axe memɨkatexeiyakɨ tinaime nepɨtiwaruxeitsitɨa.

5 Hikɨ Kitsariyaxi mɨpaɨ katinitahɨawe:

―Yawé Naimekɨmɨtɨrɨkaɨye niukieya keneu'eni: 6 “Tukari kanaye'amɨkɨ kepauka tita naitɨ 'aparatsiyuta mɨtiyepine mɨraye'atɨka 'apaapama muwa memɨte'uku'eiri, mɨkɨ Wawiruniya katinanutɨkiemɨkɨ. Nitixaɨtɨ pɨkatiyuhayewa ―Yawé mɨpaɨ kanaineni―. 7 Meta hipatɨ 'aniwema meta 'anuiwarima mekananuhapaniekuni mekaneneɨkiwawetɨ memayeitɨarienikɨ Wawiruniya kiekariyaritsie ti'aitame paratsiyuyata memɨte'uximayakakɨ”.

8 'Etsekiyaxi mɨpaɨ katinita'eiya:

―Yawé niukieya 'ekɨ pemɨnetsi'atɨiri 'aixɨa kani'aneni.

Mɨkɨ mɨpaɨ pɨtiku'eriwakai: «Mexi ne ne'uyeikani, kayuwatɨ pumaka meta 'aixɨa 'iyari nepuyeikani».