49
Yawé ti'uximayatsiriwame
1 Xekeneneu'eni, haramara tetsita 'ateewa xemeutitei,
'ikɨ xeketeneu'eni, nuiwarite teewatari:
Yawé pɨnetsi'anayexei nekatinuiwawekaku 'akuxi,
nemaamatsie neyekaiku pɨnetsi'utaterɨwaxɨ.
2 Neteta 'ixipara 'atamɨariekame patike,
pɨnetsi'uti'awietaxɨ yumamá 'etɨrieyatsie,
'ɨrɨ hepaɨ witsine'aneme pɨnetsihayeitɨa,
meta pɨnetsi'uti'awietaxɨ yɨ'ɨrɨ 'uitɨwameta.
3 Mɨpaɨ kanetiniutahɨawe: «'Ixaheri,
'ekɨ neti'uximayatsiriwame pepɨhɨkɨ,
'ahekɨ 'aixɨa nepɨtitahɨawarieni».
4 Neta mɨpaɨ neputayɨ: «Yakɨ xeikɨa nepɨti'uximaya,
neputiwaɨripiri 'atsinekatiyuriwetɨ.
Peru heitserie kenemɨrexeiya Yawé mamayatsie pɨti'ane,
tita nemɨra'iwaxɨ nekakaɨyari hetsɨa pɨrekupine».
5 Hikɨta Yawé mɨpaɨ kanaineni,
nemaamatsie mɨnetsikaye,
ne ti'uximayatame hetsiena mieme nemayanikɨ,
Kakuwu nemɨ'atɨanikɨ hetsɨana,
'ixaheritsixi 'auriena memɨ'axɨanikɨ,
Yawé hɨxie ne 'aixɨa nemɨtiuka'iyarikɨ,
Kakaɨyarita nehetsie nunuwame pɨhɨkɨ:
6 «Neti'uximayatsiriwame pepɨhɨkɨ,
meta Kakuwu nuiwarimama pemɨwahekwariya,
meta 'ixaheritsixi pemɨwa'atɨani,
kemɨ'ane nemɨwa'ɨwiya,
hikɨ 'ayumieme nuiwarite wahekɨariwiyame nekamenayeitɨamɨkɨ,
newikweitsitɨarika kwie manu'axe paitɨ pemɨtaxatakɨ».
7 Mɨpaɨ kanaineni Yawé,
Tiyuwikweitsitɨwame meta Mɨpatsie 'Ixaheri hetsiemieme,
mɨnanaimarie nuiwarite memixani'erie mɨpaɨ katinahɨaweni,
ti'uximayatame kuwexinaruritsixi wahetsiemieme:
«Te'aitamete mepɨmatsixeiya 'ana 'amepɨti'uni,
memanuyetei memetsixeiyame 'ana mepakatutsitaxɨani,
Yawé hekɨ, 'Ixaheri hetsie Mɨpatsie,
yamɨtikamie meta mɨmetsi'anayexei».
'Ixaheri kemɨrakunuitɨarieni
8 Mɨpaɨ kanaineni Yawé:
«Yemekɨ kepauka yanemɨra'eriwakai 'ana nepɨmetsi'uta'ei,
kepauka newikweitsitɨarika maye'a 'ana nepɨmetsi'uparewi.
Hikɨri nekameni'ɨwiyakamɨkɨ,
meta ne tɨratu nepɨmetsi'ayeitɨa teɨteri wahetsiemieme,
tawari 'akwieyari 'aixɨa pemukuyurienikɨ,
meta kwie yuxaɨta mukumane 'aniwema pemɨwaxatɨanikɨ,
9 mɨpaɨ pemɨtiwatahɨawekɨ memanutaxɨriya:
“Xekenewayekɨni”,
meta yɨwita memu'uwa:
“Xekanixɨxɨniniri”.
»Huye 'aurie xepɨtetikwani
meta naitsarie hɨri mu'aiyatsie yu'ikwai xepɨkaxeiya.
10 Xepɨkaheuhaakakwikuni meta xepɨkaheuharikuni,
tau pɨkaxetiweranariya meta xepɨkaxɨrikwini,
kemɨ'ane mɨxenenimaya mɨxekuwitɨnenikɨ,
meta haixa muhapanetsie kanixekuwitɨnemɨkɨ.
11 Naime nehɨritetsie huye nekanitiwewimɨkɨ,
meta nehuye 'a'atayeyeume nekanitiwewimɨkɨ.
12 Neuxei. Mɨkɨ mekani'axɨakuni 'ateewa paitɨ meheyekɨneme,
hipatɨ tayeta mepakanexɨani, hipatɨta tau makayuyuipiketsie,
hipatɨta 'Atsuhani kwieyaritsie mepanexɨani».
13 Xeme muyuawi, xekeneutihiwani temawierikakɨ.
Kwie, keneyutemawieka.
Hɨrite, kwikari xekenekwikani.
Yawé yuteɨterima muwanɨtɨakɨ
meta tixaɨtɨ memɨkateheuxeiya muwanenimayakɨ.
14 Peru Tsiyuni mɨpaɨ putayɨ: «Yawé pɨnetsi'uku'eiri.
Ti'aitame pɨnetsihatɨmai».
15 «¿Kamɨtsɨ tiyɨwe niwekame yuniwe tsitsitɨwatɨ metɨmaiya,
meta yuniwe naki'erietɨ miku'eirieni?
Tsepa mɨkɨ mɨyɨwe metɨmaiya,
peru ne nepɨkamatsihatɨmaiya.
16 Nemamá meuweweritsie nepɨmatsiha'utɨa,
'akuraru yuheyemekɨ nepɨkahatɨtɨmaiya.
17 Memɨmatsi'anukakitɨani mepuyukumexɨitɨani,
memɨmatsi'uka'unakai mepɨmatsiku'eirieni,
meta heyekɨa memɨmatsi'ɨhɨa.
18 Keneutanierixɨa, kenanieretɨye'a,
yunaitɨ mekaniyukuxeɨriximeni, 'ahepa 'umekanahuni.
Ne yuri nekaniutaineni ne'ayenieretɨ, —kanaineni Yawé—,
yunaime mɨkɨ witsipemɨtiyuxexeiyanikɨ pekaniwarayeitɨamɨkɨ,
mɨkɨ wahekɨ wikiwame kamixayari pemanakatɨnitsie tetexi mɨraye'axe pemɨreukapine pepɨtihekɨata.
19 »Tsepa pemuka'unarienike, tsepa yeuta pemuhayewarienike,
tsepa 'axaɨta pemu'ahayewake,
hikɨri mepɨkatenakeni 'ateɨterima 'ahetsie,
'ateewa mepuyuhayewari memɨmetsikwakai.
20 'Aniwema meheuyexɨrieme pemɨ'eriekai
'anakata mɨpaɨ mepɨmeteheukahɨawe:
“'Ena nehetsiemieme 'etsipakuyewa,
tawari 'ayeume kwie nepeuyehɨwa mana nemukanikɨ”.
21 Hikɨ mɨpaɨ pepɨti'erieni:
“¿Kemɨ'ane tɨɨri waɨkawa pɨnetsiyetuiri?
Ne tɨɨri nepɨkawarexeiyakai, nepɨkaniwewekai,
nepuka'unariekai, nepehɨiyakai,
peru 'ikɨ, ¿kemɨ'ane puwarutiwaweriyaxɨ?
Nexaɨtame nepunehayewakai,
peru 'ikɨ, ¿kemetehanexɨa?”»
22 Mɨpaɨ kanaineni Yawé naimekɨmɨyɨwe:
«Ne nuiwarite mɨpaɨ nepɨtiwatahɨawe,
yunaime teɨteri mɨpaɨ nepɨtiwata'aitɨani.
Mɨkɨ 'aniwema yumamatsie mepɨwara'ɨka,
meta 'aniwema 'ukari yuwaritsie mepɨwarutɨkɨni.
23 Te'aitamete yuniwema wahepaɨ mepɨwatiwaweriya,
meta wa'ɨitama mepɨmatsitiwaweririeni.
'Ahɨxie mepɨtihɨxima'uni kwiepa,
kwie mepakutsena pemiketsina.
'Ana mɨpaɨ pepɨretimani ne Yawé nemɨhɨkɨkɨ,
mepɨkatewiyatsitɨarieni
kemɨ'ane nehetsie yuri memɨte'erie».
24 ¿Yukukuyamete piinitɨarika memɨte'a'iwaxɨ mɨtiwarunawairieni tiyɨwe?
¿Tiyɨwe manutahɨiya manayexɨnekɨ?
25 Peru mɨpaɨ paine Yawé:
«Huu, kuya mɨtɨrɨkaɨye xeime tewi manutahɨa pɨnawaiyarieni,
meta mɨkatiyukanenimaya piinitɨarika mɨra'iwaxɨ pɨtinawaiyarieni,
kemɨ'ane memɨmatsimietɨwe nekaniwatakwimɨkɨ,
netɨtɨ nekaniwatawikweitsitɨamɨkɨ 'aniwema.
26 Yanepɨtiyurieni memɨmatsi'aye'unie yuwaiyari memɨtikwanikɨ,
meta yuxuriyakɨ memɨtitarɨwenikɨ
winu mɨhɨkɨtɨni hepaɨ.
Hikɨ 'ana yunaitɨ teɨteri mɨpaɨ mepɨtehetimani
ne, Yawé, 'awikweitsitɨwame nemɨhɨkɨkɨ,
ne, Mɨtɨrɨkaɨye Kakuwu hetsiemieme, Nemumatsixɨname nemɨhɨkɨkɨ».