54
Tsiyuni 'arike kemɨtimariweni
1 «'Ekɨ 'ukaratsi hatsuaku pemɨkatiniwewe,
keneutahiwani temawierikakɨ.
'Ekɨ, hatsuaku niweyame kukuiniyaya pemɨkamate,
keneutakwikani meta keneutahiwani temawierikakɨ.
'Ukaratsi muku'eiriwaxɨ matsi waɨkawa tɨɨri warexeiyatɨ kanayeimɨkɨ,
mɨwikie kemɨkatiwarexeiya
—Yawé mɨpaɨ kanaineni—.
2 »'Axamaru 'akeneutayeuriya,
'ixuriki meɨwɨ 'akiita keneɨxɨnaxɨa.
Hawaikɨ peheuye'atɨkaitɨ pepɨkahayuyeitɨwani.
'Akaunari 'akeneutitɨriya, 'akɨtsunute kwi keneuka'uitɨa.
3 Karikɨ 'atserieta meta 'a'utata pekanitawerimɨkɨ,
'anuiwarite hipame nuiwarite waɨkawa mepuwara'iwa,
kiekaritetsie hikɨ makumamawe mana mepɨyutikiitɨani.
4 »Pepɨkamaka,
hatsuaku pepɨkatewiyatsitɨarieni.
Pepɨkayu'iyaritɨaka,
hatsuaku nitixaɨtɨ petihɨkɨtɨtɨ pepɨkahayeitɨarieni.
Pemɨ'ɨimaritɨkaitsie mieme tewiyarika pepatɨmaiya,
meta tawariri pemɨwiuratɨkaitsie 'axapemɨtikɨhɨawarɨwakai pepɨkahaye'erieni.
5 Kemɨ'ane mɨmatsi'utawewi mɨkɨ kani'akɨnatɨni,
Yawé Naimekɨmɨtɨrɨkaɨye katinitewaka.
Matsiwikweitsitɨwame kanihɨkɨtɨni Mɨpatsie 'Ixaheri hetsiemieme,
naime kwie Kakaɨyarieya katinitewaka.
6 Yawé kamanitahɨawimɨkɨ
'ukaratsi 'eiriwakame hepaɨ,
'ukaratsi tiuka'eniwatɨ muyu'iyaritɨa hepaɨ,
'uka wikiekame 'etsiyumaitɨ mutiwiki hepaɨ
mɨtixani'eriwakɨ xeikɨa
―'akakaɨyari mɨpaɨ kanaineni―.
7 Nepɨmatsi'uku'eiri yatewimekɨ xeikɨa,
peru waɨkawamekɨ nematsinenimayatɨ
tawarita 'ahetsɨa nepunuani.
8 Yatewimekɨ xeikɨa, ne'uyeha'aka,
nepɨkamatsixeiyamɨkɨkai,
peru yuheyemekɨ nematsinaki'erietɨ
nepɨmatsitinenimayata
―Yawé mɨpaɨ kanaineni, Matsiwikweitsitɨwame―.
9 »Kepauka Nuhexi 'amuyeikakai hepaɨ nepaine,
kepauka nemɨyuhɨritɨa kename haa
hatsuaku kwie kakayunitɨanikekai.
Hikɨ mɨpaɨ nekatiniyuhɨritɨaka tawariri nepɨkamatsiyeheka,
meta tawariri nepɨkamatsitatieni.
10 Tsepa hɨrite muyupataxɨa,
meta tsepa hɨrite 'etsimɨtɨtɨ mɨtiwatayuatɨka,
hatsuaku nematsinaki'erietɨ nepukatihayewa,
meta netɨratu kayuwatɨ 'amuyeikanikɨ mɨ'ayumieme nepɨkatananaimani,
—Yawé mɨpaɨ kanaineni, mɨmatsinenimaya—.
11 »Neuxei 'ekɨ, kiekari pemuyuhiwerie,
pemɨmariutsie meta pemɨkanɨtɨarie.
Yuawitɨ tsiɨraɨyemekɨ nepumatsitakeni,
meta tetexi yuawimekɨ mukutuxie hekɨ 'atenari nepɨkatsutɨani.
12 Tetexi mɨxetakɨ 'atetsariya nepatiwewiexɨani,
tetexi mɨxawawatɨkɨ 'a'itupari nepɨtiwewieni,
meta tetexi witsimɨ'anenekɨ 'akuraru nepawewietɨyani.
13 Yawé 'aniwema yunaime kaniwata'ɨxatsitɨamɨkɨ,
yemekɨ 'aixɨa 'anemekɨ mepɨtiteni.
14 Mɨtiheitseriekɨ pepɨtseiriyarieni,
waɨriyarika pepɨkati'aitɨarieka,
meta nitixaɨtɨ pepɨkarayemakaka,
pepɨkamaka,
meta hatsuaku pepɨkatimani.
15 Xɨka xewitɨ matsimiemɨkɨni,
ne nepɨkatiyurieneni,
kemɨ'ane mumatsitamieni
'ahɨxie kanikawemɨkɨ.
16 »Neuxei, ne tepɨakɨ tiwewiwame nekaniunetɨani,
tɨɨ 'anutataiyatɨ mɨti'uximaya,
tepɨa tiyumemiwame mɨtiwewiwa xexuitɨ kemɨtiyuruwametetɨni.
Neta nekaninetɨani tiyuka'uname
muwaruka'unanikɨ.
17 Tsepa tepɨa matsimemiwame 'ahetsiemieme mutawewiya yapɨkatiyurieni,
kemɨ'ane mɨmatsixanetani mɨkɨ tenieyatsie pepuwiere.
'Ikɨ kanihɨkɨtɨni te'uximayatamete memɨte'ukuhayewiyarie,
tita mɨtiheitserie nehetsie mɨyetɨa
―Yawé mɨpaɨ kanaineni―.