60
Xawatɨriya Tsiyuni mieme
1 »Kenanukukexi, kenexawatɨni, 'ahekɨariya kaninuaniri.
Yawé xawatɨriyaya 'ahetsie kaniutitataweni.
2 Neuxei, kwie yɨriya kananukanaka,
teɨteri wahetsie yɨriya 'amayetsuye kanixuaweni.
Peru Yawé hekɨariyaya ximeri mieme 'ahetsie kanitaimɨkɨ,
xawatɨriyaya 'ahetsie matsiɨkɨtɨ payani.
3 Nuiwarite mepuwitɨkieximeni 'axawatɨriya mexeiyatɨ,
meta te'aitamete, 'ahekɨariya ximeri mieme mexeiyatɨ.
4 »Teikɨ kenenieri, kenanieretɨye'a:
yunaitɨ mepuyuxeɨrie meta 'ahetsɨa mepɨ'axe.
'Aniwema 'ateewa mepaneika,
'aniwema 'ukari mepɨ'atɨariwa me'ɨtɨkietɨ.
5 Mɨpaɨ petiniereme waɨkawa pepuyukatemawieni,
'a'iyari puyuaneni, temawierikakɨ,
mɨraye'atɨka mekamani'atɨiriekuni haramaratsie mieme,
'ahetsɨa katini'atɨariemɨkɨ nuiwarite tiwapiini mɨraye'atɨka.
6 'Ahetsɨa kameyutsixi mewaruhapatɨ yuwaɨkawatɨ mepɨ'axɨani,
Mariyani meta 'Epa kiekatari.
Tsawa kiekatari yunaitɨ mekani'axɨakuni,
huru me'ɨtɨtɨ meta 'ɨkwa witsimu'ɨa,
meta Yawé nɨawarieya mekuxatatɨ.
7 Yunaitɨ Tseraxi muxatsimama 'ahetsɨa mepuyukuxeɨrieni,
meta Newayuti hetsɨa miemete muxatsi 'ukitsi mepɨmeteta'uximayatsirieni,
mawari witsimu'ɨa hepaɨ nemawari taiyametsie mepanutikɨne,
Ne witsitiyuxexeiyame nepayeitɨani netuki mɨmariwe.
8 »¿Kemɨ'ane mepɨhɨkɨ hai hepaɨ memanuyekɨka,
meta kukuruxi memeutuxa wahepaɨ yu'ituatsie memekɨka?
9 'Ateewa kiekatari haramara tetsita, mepɨnetsitakwewie,
kanuwa 'amupapa Taritsi mieme mexɨakate kani'axɨamɨkɨ,
'ateewa 'aniwema waratɨme,
meta wahuru wapɨrata hatɨtɨ,
Yawé memɨyetuirienikɨ 'akakaɨyari,
Mɨpatsie 'Ixaheri hetsiemieme,
mɨkɨ pemariweme pɨmatsi'ayeitɨa.
10 »Tewanarixi 'akuraru mepanukuhana,
meta tewa'aitɨwamete mepɨmateta'uximayatsirieni.
Tsepa neha'atɨ nemɨmatiukwinitɨakai,
kemɨnetinakekɨ nepɨmatsinenimayaka.
11 'Akitenie yapɨreuyepietɨkani,
tukarikɨ meta tɨkarikɨ pɨkareunarɨmiketɨkani,
'ahetsɨa pɨti'atɨarieni nuiwarite tiwapiinite waɨkawa muraye'atɨka,
meta 'ahɨxie xuruku mehewetɨkaitɨ mepuku'uni tewa'aitɨwamete mema'iwarie.
12 Kemɨ'ane nuiwari mɨkameti'uximayatsirie, pɨkumawere,
naitɨ pɨka'unarieni.
13 »Riwanu kemɨtimariwekai mɨpaɨ pepɨyɨni,
huku 'amutɨtɨ, kwetsi kɨyeyari, meta tsiiná pɨ'atɨarieni,
witsipemɨrakuyurienikɨ netuki manuwe.
'Aixɨa nepiyurieni hakewa ne'ɨkate meyuwetɨka.
14 'Ahɨxie mepɨkahɨxima'uni
kemɨ'ane waɨriyarika memɨxete'aitɨakai waniwema,
yunaitɨ kemɨ'ane memɨmatsixani'erie
'a'ɨkatɨa mepɨtihɨxima'uni,
“Yawé Kiekarieya” mepɨmateterɨwa,
“Tsiyuni Mɨpatsie 'Ixaheri hetsiemieme”.
15 »Tsepa pemuku'eiriwakai meta pemutixani'eriwakai,
tsepa xewitɨ 'ahuye 'utɨma mɨka'uyeyeikakai,
yanepɨtiyurieni 'ahetsie yuheyemekɨ pemuyuta'ɨrenikɨ
meta temawierika yamɨreuyuhanenikɨ.
16 Nuiwarite waretsikɨ pepɨtikwaka,
te'aitamete memɨtehexeiyakɨ pepɨtsitsitɨarieka.
Hikɨ 'ana mɨpaɨ pepɨretimani kename, ne Yawé, 'awikweitsitɨwame nehɨkɨ,
kename ne, nemɨtɨrɨkaɨye Kakuwu hetsiemieme, nemumatsiwikweitsitɨwame nehɨkɨ.
17 Wurunitse hetsiemieme huru nepɨmatsi'atɨirieni,
meta tepɨa hetsiemieme pɨrata nepɨmatsi'atɨirieni.
Kɨyexi hetsiemieme Wurunitse nepɨmatsi'atɨirieni,
meta tetexi hetsiemieme, tepɨa nepɨmatsi'atɨirieni.
Yanepɨtiyurieni kayuwatɨ pemexeiyanikɨ,
meta tita mɨtiheitserie mɨmatsikuyuitɨwanikɨ.
18 'Akwietsie nanaimarika pɨkamariwani,
meta pepɨkaka'unarieni, metatsiere 'akwie manuye'atɨka pɨka'anuye'unarietɨyani,
matsi pɨta 'akurarute “Wikweitsitɨarika” pepɨtiterɨwa,
meta 'a'ituparite “Nɨawari” pepɨtiterɨwa.
19 Tau pɨkahɨkɨtɨniri tukarikɨ mɨmatsihekɨariwiyani,
meta metsa yuhekɨariyakɨ pɨkamatsihekɨariwiyani,
Yawé pɨta 'ahekɨariya yuheyemekɨ mieme kanihɨkɨtɨkamɨkɨ,
'akakaɨyari pɨmatsixawatɨriyani.
20 'Atau hatsuaku pɨka'akayune,
meta 'ametseri hatsuaku pɨkatɨni,
Yawé kanihɨkɨtɨkamɨkɨ 'ahekɨariya yuheyemekɨ mieme,
meta hiwerika tukariyari kaneutiparimɨkɨ.
21 Hikɨ 'ana yunaitɨ 'ateɨterima heitserie mepu'uwani,
meta yukwietsie mepu'uwani yuheyemekɨ.
'Iteɨri nemikake mɨyɨra xepɨhɨkɨtɨni,
newewiya 'aixɨa muyɨ kɨmana nemɨmariwe.
22 Waɨkawa mɨwerani xeimiriyarikɨ pɨtaxiɨni,
'etsimutewi nuiwari tɨrɨkaɨyetɨ payani.
Ne Yawé nekanihɨkɨtɨni,
kepauka tukari maye'ani yanekatiniyurimɨkɨ, nepɨkatihayewa».