63
Yawé mɨyɨkɨhɨani tukariyari meta kepauka Kakaɨyari 'aixɨa mɨwayurieni
1 ¿Kemɨ'ane pɨyɨane 'Erumi makamie,
meta Wutsira makamie, 'ixuriki yɨtsikimaɨyeme 'anakatɨtɨ?
¿Kemɨ'ane pɨyɨane mɨkɨ witsimɨrekemari,
yutɨrɨkarima mumie?
«Ne nekaniyɨaneni, heitseriemekɨ nemɨtikuxata,
tɨrɨkariya nemexeiya nemɨratawikweitsitɨanikɨ».
2 ¿Titayari 'a'iwite tixeta,
kaxie matiketsinarɨwa te'uximayatamete wahepaɨ?
3 «Ne kaxie nexaɨtame nekaniutiketsini,
hipatɨ teɨteri mepɨkanetsi'uparewi.
Nekanitiketsini nehaxɨakɨ,
nekaniwarutipɨna neha'atɨ.
Waxuriya ne'ixuriki kaniuwirieni,
naime nekamixa nekaniutawirieni.
4 'Ariri kepauka nemɨnekɨhɨani yanepɨtimate.
Newikweitsitɨarika wiyari paye'ari.
5 Neuxei, peru pumawekai kemɨ'ane mɨnetsiparewieni,
nepɨhɨxiya xewitɨ mɨkanetsiparewimɨkɨkɨ.
Netɨrɨkariya katiniuyurieni nemɨrayu'iwaxɨ,
nehaxɨatɨtɨ kaneniuparewieni.
6 Neha'atɨ teɨteri kwiepa memɨtama nepɨwarutiketsi,
nepɨwarutitarɨwaitɨa nehaxɨa tekɨxiyarikɨ,
waxuriya kwiepa 'uhaneme nepayeitɨa».
Nɨawari meta nenewieri
7 Yawé naki'eriyaya mɨmariwe nepaye'erieni,
meta kemɨtiuyuri 'aixɨa pɨ'ane minɨawanikɨ,
naime kemɨtiuyuri tahetsiemieme,
kemɨtiuyukanenimaya meta naki'eriyaya mɨmariwekɨ.
Huu, pɨmɨire 'aixɨa 'anemekɨ kemɨtiuyuri
'Ixaheri nuiwarimama wahetsiemieme.
8 Mɨpaɨ nepaine: «Yurikɨ neteɨterima mepɨhɨkɨ,
neniwema hatsuaku memɨkanete'itaiya».
Mɨpaɨ pɨratɨa wawikweitsitɨwame
9 naime kememɨte'uka'eniwakaikɨ.
Mɨkɨtɨtɨ puwarutawikweitsitɨa,
xeime pɨkaheyenɨ'a meta nixeime niuki tuayame.
Yunaki'eriyakɨ meta yunenimayatsikakɨ kaniwarutawikweitsitɨani,
kaniwaranukutɨkɨ, kaniwaretɨkɨ yumamatetsie
meripaitɨ hepaɨ.
10 Peru mɨkɨ mepɨkahenu'eni,
meta 'iyarieya mɨpatsie mepu'iyarimɨtɨa.
'Ayumieme waraye'unietɨ patɨa,
mɨkɨtɨtɨ pɨwarutakwi.
11 Teɨterimama meripaitɨ mieme mepaye'eri,
Muitsexi muyeikakaitsie:
¿Hakewari haramaratsie muwaranawitɨ,
muxatsi wahɨweme muxatsi mɨtiwaruwitɨkɨ hepaɨ?
¿Hakewari yu'iyari mɨpatsie
watsata mɨ'atɨa,
12 yamɨtiuyuri yumamá mariwemekɨ
Muitsexi tserieta mumienikɨ,
kemɨ'ane haa manutayepi mana muyanikɨ,
yuheyemekɨ matiwatɨ mayanikɨ?
13 ¿Hakewari haramaratsie muwaranawitɨ,
makumawetsie yeikame kawayutsie manaka hepaɨ,
witsi'anekɨa muwarawitɨ memɨkahekaxɨri?
14 Yawé 'iyarieya puwaruka'uxipitɨa
tewaxi makuweritsie memɨtekwatɨwe wahepaɨ.
Mɨpaɨ pepɨtiwaruwitɨ 'ateɨterima,
waɨkawa pemariwetɨ pemayanikɨ.
15 Kenakanieri muyuawitsie paitɨ,
keneutanierixɨa 'akiekari mɨpatsietsie meta witsimɨtiyuxexeiyatsie paitɨ.
¿Hakewari 'atɨrɨkariya meta 'a'ɨtetsarika?
pepɨtatsikweririe mɨmɨirekɨ kepemutiyukanenimaya, witsikepemɨtiuka'iyari.
16 Peru 'ekɨ tapaapa pepɨhɨkɨ,
tsepa 'Apɨrahami mɨkatatsimate
meta tsepa 'Ixaheri mɨkatatsimaiwe,
'ekɨ, Yawé, tapaapa pepɨhɨkɨ,
«Tatsiwikweitsitɨwame» yuheyemekɨ pepɨtitewa.
17 ¿Titayari Yawé, petareuyexɨrɨwa 'ahuyeta,
meta titayari ta'iyari petitseiriya
temɨkametsimakaxenikɨ?
Kenenua te'a'uximayatsiriwamete pemɨwanaki'eriekɨ,
'anuiwarite 'ahetsɨa miemete yuheyemekɨ memɨhɨkɨ.
18 'Ateɨterima yatewimekɨ 'atuki mepexeiyakai,
peru hikɨ memɨtatsi'aye'unie mepitiketsixɨa.
19 Wa'atɨtɨ hatsuaku pepɨkatatiuta'aitɨa tepɨ'ane,
wa'atɨtɨ hatsuaku kepemɨtitewa temɨkate'uterɨwarieni hepaɨ.