65
Ke'aixɨa mɨtiyurieni meta kemɨtiwatawikweitsitɨani
1 «Kemɨ'ane memɨkanetsiku'iwawakai wahetsɨa pɨta nepunehekɨataxɨ,
kemɨ'ane memɨkanetsikuwautuwekai wahetsɨa yanepɨtiutanaki'eri memɨnetsitaxeiyakɨ.
'Iya nuiwari memɨkanetsihahɨawekai,
mɨpaɨ nepɨtitahɨawixɨ: “'Ena nepuwe”.
2 Tukarikɨ nemamá nepaɨtatsera
'iya teɨteri memɨkanetsi'enie wahetsɨa,
'axamɨ'ane huyeyari 'utɨma memuhu,
kememɨteku'eriwa xeikɨa yameteyurietɨ.
3 Mɨkɨ teɨteri mepɨhɨkɨ nehɨxie
memɨnetsihaxɨatɨa tukarikɨ,
harawerita mawari mekaniwewietɨweni
meta 'ɨkwa witsimu'ɨa mekanitaiyatɨweni mawari taiyametetsie,
4 mɨkite wateukiyapa putayeixa
meta yuxaɨtame tɨkarikɨ maku'awietsie pɨkatariyarɨwa kakutɨ,
tuixu waiyari pukwa'a,
meta yuxarita wai mɨka'itiya puka'eetsa,
5 mɨpaɨta kaniutaineni: “Teewa xekeneu'uwani.
'Ahurawa nehetsɨa xepɨkahakɨkani.
Ne yemekɨ nekanipatsieka xehetsiemieme”.
'Ikɨ naitɨ pɨkanetinake kɨtsi nemɨ'ɨkweni hepaɨ,
tai yamɨtita'a tukarikɨ kanihɨkɨtɨni.
6 »Nehɨxie yakatinaka'utsieni:
Ne kayuwatɨ nepɨkatiyerɨni.
Yanepɨtiwarakapitɨani,
mekatenikwinikuni yuwaiyaritsie,
7 xeme 'axakexemɨte'uyuri hetsiemieme meta
xepaapama kememɨte'uyuri
―Yawé mɨpaɨ kanaineni―.
Mɨkɨta 'ɨkwa witsimu'ɨa mekaniutitaiya hɨritsie,
meta hɨri 'amanutitɨtɨtsie 'axamepɨnete'utama,
nekatiniwakwinitɨamɨkɨ wawaiyaritsie
meripaitɨ 'axamemɨte'uyurikɨ».
8 Yawé mɨpaɨ kanaineni:
«Kepauka xewitɨ kaxie takari witsi'aneneme mɨtaxeiya,
mɨpaɨ putaine: “Nemarima 'aixɨa,
'akuxi kanayemaneni hayari”.
Mɨpaɨta yaxeikɨa nepɨtiyurieni nete'uximayatsiriwamete nemɨwanaki'eriekɨ:
Yunaime nepɨkawaka'una.
9 Kakuwu hetsie nuiwari nepuwarayenetɨani,
meta Kura hetsie nepuwarayenetɨani kemɨ'ane 'ikɨ hɨrite wapiini mayani.
Kemɨ'ane nemuwaranayexeiya tiwapiini payani,
mana mepɨtiteni nete'uximayatsiriwamete.
10 Neteɨterima kemɨ'ane memɨnetsikuwautɨwe,
Tsaruni makuweritsie wamuxatsima mepu'uwani,
'Akuhuxi mayeweritsie, wawakaitsixi mepɨye'uwani.
11 »Peru xeme Yawé xemuku'e'eiriwa
meta nehɨri mɨpatsie xematɨmai,
kakaɨyarixi waɨkawa mɨrexeiyanikɨ meta 'aixɨa pemɨtiumienikɨ memɨ'ayumiemete
wahetsiemieme mexa xemukuha'arita meta winu nɨkame xemukatu'a,
12 'Ixiparakɨ xemukwi'iwakɨ nepɨxeyetuani,
yunaitɨ xeme xepakatutsitaxɨani xemanutixitekiexɨanikɨ,
Nexe'utahɨaweku xemɨkanetsi'uta'eikɨ,
kepauka nemɨxe'utahɨawixɨ xepɨkanetsi'u'eni.
Matsi 'axaxepɨte'uyuri pɨta nehɨxie
tita mɨkanetinake xepɨte'anukuwei».
13 'Ayumieme, mɨpaɨ kanaineni Yawé naimekɨmɨyɨwe:
«Nete'uximayatsiriwamete mepɨtekwaka,
peru xeme xepɨhaakakwini,
nete'uximayatsiriwamete mepɨhareka,
peru xeme xepɨharikwini,
nete'uximayatsiriwamete mepuyutemamawieka,
peru xeme xepuyutetewiyani.
14 Nete'uximayatsiriwamete meputikwikani
yu'iyarikɨ meyutemamawietɨ,
peru xeme xeputihiwani
yu'iyaritsie xete'uka'eniwatɨ,
xeputitsuanani yu'iyaritsie xete'uka'eniwatɨ.
15 Nemɨwaranayexei wahetsie pɨtinake kexemɨtetewa
'axaxemɨ'itɨarikakɨ.
Yawé naimekɨmɨyɨwe pɨxekwini,
peru te'uximayatamete yuhetsɨa miemete yɨkɨ pɨtiwatiterɨwa.
16 Tsepa kemɨ'ane xewitɨ 'aixɨa mɨ'itɨariekakɨ mɨkɨ kwieyaritsie xɨka tiutawauni,
yapɨtiyurieni Kakaɨyari yuri mɨhɨkɨ hetsiemieme,
meta tsepa kemɨ'ane 'ikɨ kwietsie yamɨtiyɨhɨritɨani,
yapɨtiyurieni Kakaɨyari yuri mɨhɨkɨ hetsiemieme,
'Uximatɨarika meripaitɨ mieme mepatɨmairi,
hikɨ nepɨka'iku'eriwari.
Muyuawi hekwatɨ meta kwie hekwatɨ
17 »Kayuwatɨ xekeneu'enana, 'ari nekaninetɨaximeni
muyuawi hekwame meta kwie hekwame.
Tawariri pɨkatitaxatsieni meripaitɨ timieme,
meta pɨkaha'eriwani.
18 Matsi xekeneyutemamawieka, yuheyemekɨ xekeneyutemamawieka,
tita nemɨtinetɨaximekɨ:
Nepinetɨaxime xeime Kerutsareme yutemawiekame,
kiekari temawierika waɨkawa hexeiyakame.
19 Nepuyutemawieka Kerutsareme hetsiemieme
meta nepuyutemawieka neteɨterima wahetsiemieme,
tawarita mana pɨka'enierieni
tsuari hiwariyari meta kukuiniya hiwariyari.
20 »Hatsuakuri mana tɨɨri kwitɨwa metakukuwetɨ
mepɨkatixuawere,
meta 'ukirawetsixi kwitɨwa mepɨkatakukuweni.
Kemɨ'ane mɨmɨni xeitsienituyari hexeiyatɨ
temaikɨ hepaɨ 'anetɨ pɨyɨaneni,
peru kemɨ'ane mana mɨka'utineni
'axamɨ'itɨarieka hepaɨ 'anetɨ payeitɨarieni.
21 Kii mepɨtiwewieni, muwa mepayetetɨkani,
kaxie mepɨka'eni meta takarieya mepɨtikwani.
22 'Ari kii mepɨkatiwewieni hipatɨ pɨta muwa memeutayaxekɨ,
meta kaxie xepɨkaka'eni hipatɨ pɨta memitikwanikɨ.
Matsi neteɨterima watukaritsie
kɨye tukarieya kemɨ'ane mɨpaɨ kani'anemɨkɨ,
nemɨwaranayexeiya kememɨteyurieni
mepɨtekaxeiya mepɨteha'inɨata.
23 'Ari yakɨ xeikɨa mepɨkateta'uximayata,
meta tɨɨri mepɨkawarayexeiya 'axamemɨ'itɨarienikɨ,
mɨkɨ metatsiere waxiɨyarima
'ɨimari Yawé 'aixɨa miyurie mekanakɨnikuni.
24 'Akuxi mekanetsitahɨawiwekaku,
ne nepuwata'eiya,
'akuxi meputiniukani
peru ne 'ari newa'enieyu.
25 Maye muxa hamatɨa yunaitɨ mepɨtetikwani makutsiɨraɨyetsie,
maye 'ɨxa pɨtikwani tuuru hepaɨ,
meta kuu 'ikwaiya tumuanari pɨhɨkɨtɨni.
Naitsarie nehɨri mɨpatsietsie
tiyukwinitɨwatɨ kaniumawekamɨkɨ meta tiuyuka'unatɨ»,
Yawé kanaineni.