1 'Epɨrahini xiɨyarimama Kerehuni mɨpaɨ mekateniutahɨawe:

―¿Titayari mɨya petatiyuriene? ¿Titayari pekatatiuta'ini kepauka pemetɨa mariyanitsixi pewaretakwinike?

Mekanitatieni yu'iyarikɨ.

2 Mɨkɨ mɨpaɨ kaniutayɨni:

―¿Kenetiuyuri ne, xemeta kexete'uyuri? ¿'Atsixekatemate xeme matsi waɨkawa xemɨte'uyuri keyuri ne? Xeme 'etsiwa kexemɨte'uyuri, matsi waɨkawa pɨraye'axe, keyuri tame waɨkawa temɨte'uyuri. 3 Kakaɨyari puwayetua xehetsɨa 'Urewi meta Tsewi, mariyanitsixi tewa'aitɨwamete. Xɨka teheitixeiyaxɨani xeme kexemɨte'uyuri, neta kenemɨtiuyuri tixaɨtɨ pɨkatihɨkɨ.

Kerehuni kemutayɨ me'i'enieka mekateniuhayewa meha'atɨ hepaɨtsitana.

4 Kerehuni meta teɨterimama haika tsienituyari Kurutani hatuxameyaritsie mekananukɨne tsepanetɨ memɨ'u'uxekai, peru mɨyatɨtɨ 'akuxi hipame mepɨwaruweiyakai memɨwaraye'uniekai. 5 Mana Kerehuni Tsukuti kiekatari mɨpaɨ katiniwarutahɨawe:

―Paa xekeniwarumikwa nekuyaxima, mepu'u'uxe 'akuxi Tsewa meta Tsarimuna nepɨwaruweiya Mariyani kiekariyaritsie te'aitamete.

6 Tsukuti kiekatari memanuyetei mɨpaɨ mekaniutiyuani:

―¿Kamɨtsɨri Tsewa meta Tsarimuna petiwara'iwaxɨ? ¿Titayari paa tetewamini 'akuyaxima?

7 Kerehuni mɨpaɨ kaniutayɨni:

―'Aixɨa kani'aneni, kepauka Yawé mɨnetsiyetuirieni Tsewa meta Tsarimuna, xuyakɨ ne nenixetiherɨkamɨkɨ xewaiyaritsie meta 'ɨtsi makumawetsie miemekɨ.

8 Mana mɨyetɨa kaneyani Peniheri manata yaxeikɨa kaniutayɨni. Peru Peniheri kiekatari yaxeikɨa mekateni'eiya Tsukuti kiekatari wahepaɨ. 9 'Ayumieme mɨpaɨ katiniwarutahɨawe Peniheri kiekatari: «Kepauka nemakunuani nerane'iwame 'ikɨ tuxiyu nekanatihɨamɨkɨ».

10 Tsewa hamatɨa Tsarimuna, Karikuxi mekanititekaitɨni kuyaxi tamamata heimana 'auxɨwime miriyari mewarawitɨtɨ, mɨkɨ xeikɨari mekanihɨkɨtɨkaitɨni tau manatineika hepatsie kiekatari, mekaniukwi'iwakaitɨniri meyukwitɨwetɨ xeitsienituyari heimana xeitewiyari miriyari kuyaxi. 11 Kerehuni ku'uwamete mematiteitsie kaneutiyune, Nuwa tserieta meta Yukiweya, mana kaniwarutakwini kepauka kuyaxi 'atsimemɨkateha'eriwakai. 12 Te'aitamete memuyuhuta Mariyani kiekatari, Tsewa meta Tsarimuna mekaniuyuta'una, peru mɨkɨ kaniwaranukuweiya kaniwarutiwiya, wamariutatɨ yunaime kuyaxi.

13 Kepauka Kerehuni Kuhatsi nu'aya makunua heyukumieka, Keretsi kaniuyeyani, 14 mana xeime kaniuwiya temaikɨ kaniti'iwawiya. Hikɨ temaikɨ kaniwaraka'utɨani haika tewiyari heimana tamamata memanuyetei 'ukirawetsixi Tsukuti kiekatari. 15 Hikɨ Kerehuni kaneyani mɨpaɨ katiniwarutahɨawe Tsukuti kiekatari: «Kamɨ 'ena Tsewa meta Tsarimuna mɨkɨkɨ xemɨniukixiekai mɨpaɨ xe'utiyuatɨ: “¿Kamɨtsɨ petiwara'iwaxɨri Tsewa meta Tsarimuna? ¿Titayari paa tetewamini 'akuyaxima memu'u'uxe?”» 16 Mɨkɨ kaniwarutiwiya 'ukirawetsixi te'aitamete mana kiekatari, xuya kanikuwauni meta 'ɨtsi makumawetsie mieme, mɨkɨkɨ katiniwarukwinitɨani Tsukuti kiekatari. 17 Peniheri tuxiyuyari meta kaniuka'una meta teɨteri kaniwarukwini mana kiekatari.

18 Hikɨ kaniwaruta'iwawiya Tsewa meta Tsarimuna:

―¿Keme'anenekai teɨteri xemɨwarukwi Tawuxi?

Mɨkɨ mɨpaɨ mekaniutiyuani:

―'Ahepaɨ mepɨteyuxexeiyakai, hutarieka te'aitamete wahepaɨ mepɨteyuxexeiyakai.

19 Kerehuni mɨpaɨ kaniutayɨni:

―Ne'iwama mekanihɨkɨtɨkaitɨni, nemaama niwemama, Yawé kemɨrayeniere xɨka xetewareuyehɨwirienike, ne nepɨkaxekwinikeyu.

20 Yuniwe Ketexi hepa 'uyaka 'amɨyumate mɨpaɨ katinitahɨawe:

―Xeiya keniwarukuya.

Peru Ketexi yu'ixipara pɨkahewatiha mɨtemaikɨtɨkaikɨ pɨmakai. 21 Tsewa hamatɨa Tsarimuna mɨpaɨ mekaniutiyuani:

―Xeiya, 'ekɨtɨ ketaneukuya. “'Uki kanimatsiɨkɨni kemɨtiyɨwe”.

Kerehuni kananukukeni Tsewa meta Tsarimuna kaniwarukwini meta wakameyutsixi kuka mematitɨtɨkatei metseri hepaɨ 'aneneme kaniwaratixɨniriexɨani.

22 Hikɨ 'ixaheritsixi Kerehuni mɨpaɨ mekateniutahɨawe:

―Ketatineuta'aitɨa tame, 'a'utɨata 'aniwe, mɨkɨ 'utɨata 'ateukari, pemɨtatsi'uxɨnaxɨkɨ mariyanitsixi wahetsɨa.

23 Peru Kerehuni mɨpaɨ katiniwarutahɨawe:

―Ne nepɨkatixeta'aitɨani, meta neniwe. Yawé xeikɨa pɨtixeta'aitɨani.

24 Mɨpaɨta kaniutayɨni:

―Mɨpaɨ nepɨtixetahɨawe, yuxexuitɨ xeme xekenetsiyetuirieni hanira, meripai temɨwarutakwi tiwapiini.

'Itsimaheritsixi huru hanirayari yamekateneumanakaitɨni.

25 Mɨkɨ mɨpaɨ mekaniutiyuani:

―Tekameniyetuiriekuni.

Mana mata 'ixurikiyari mekanikuwera, yuxexuitɨ mana yuhanira mekanamaxɨani. 26 Naitɨ kanayani tamamata heimana 'atanauka kiruyari huru hanirayari, ka'inɨaritɨ mɨrakatɨriketɨka, mɨtixikɨrawi, 'ixurikite mɨxeta te'aitamete wakamixa Mariyani kiekatari, meta kuka kameyutsixi memekatɨtɨkatei. 27 Mɨkɨ hurukɨ Kerehuni mawari wewiwamete memenakatɨkɨ kaniutawewieni, yukiekaritsie 'Upɨra mɨrakutewatsie kanihɨani. Yunaitɨ 'ixaheritsixi 'axamekateniuyurieni mɨkɨ hɨxie metitunuma'uwetɨ, Kerehuni meta niwemama wawiniyari kanayani.

28 'Ixaheritsixi mariyanitsixi mekateniwaruta'uximayatsitɨani. Huta tewiyari wiyari kepauka Kerehuni muyeikakai 'akuxi tawariri metehayu'iwatɨ mepɨkahakɨ kayuwatɨ mehexeiyatɨ mekanakɨne 'ixaheritsixi.

29 Yeruwahari Kuhatsi nu'aya kanakunuani yukie mukanikɨ. 30 Haika tewiyari heimana tamamata yuniwema kaniwarayexeiya, 'ɨitamama memɨyuwaɨkawakaikɨ. 31 'Ukaratsi mɨti'uximayatsiriekai, Tsikeni mukatei hetsiemieme xeimeta kanayexeiya, Kerehuni 'Awimereki katiniterɨwa 32 Kerehuni kaniumɨni Kuhatsi nu'aya, kaniukateukieni Kuhatsi makateukietsie 'Upɨra kiekariyaritsie, 'Awietsexi xiɨyarimama mematitekaitsie.

33 Kepauka mumɨ Kerehuni, 'ixaheritsixi tawarita 'axamekateniuyurieni kakaɨyarixi Wahari hetsɨa miemete mewarayexeiyatɨ mekanakɨne. Wahari-Weriti mekananayexeiya mɨwakakaɨyaritɨnikɨ. 34 'Ixaheritsixi Yawé mekanatɨmaiya yukakaɨyari, mɨwaruparewi kepauka hipatɨ memɨwa'uximatɨakaitsie. 35 Metatsiere Yeruwahari Kerehunitɨtɨ niwemama mekapɨwanaki'eriekai, tsepa 'aixɨa mɨtiuyuriekai 'Ixaheri hetsiemieme.