14
Tsanitsuni kemɨtiutineɨkixɨ
1 Hikɨ Tsanitsuni kaneyani Timinati kiekariyaritsie, mana 'uka kaniuxeiya piritsiteutsixi waniwe kanitihiwe'erieni. 2 Kepauka makunua yupaapama mɨpaɨ katiniwarutahɨawe:
―Timinati mɨrakutewatsie 'uka nepexei netsinakeme piritsiteutsixi waniwe, xekeneutawawa nemitiwitɨnikɨ.
3 Peru paapamama mɨpaɨ mekatenitahɨawe:
―Kamɨtsɨ xewitɨ tiumawe ta'iwatɨtɨ matsinaketɨ naitsarie 'ena mɨtiuyehane titayari piritsiteutsixi watsata petiwauneni xitekiya 'inɨariyari memɨkahexeiya wahetsɨa.
Tsanitsuni yupaapa mɨpaɨ katiniuta'eiya:
―Mɨkɨ xekeneneutawawiri, waɨkawa ne pɨnetsinake.
4 Paapamama 'atsimepɨkatemaikai Yawé tiyurieneme mepɨka'eriekai, miwaunekai piritsiteutsixi mɨwayehaxɨatɨanikɨ, 'ana piritsiteutsixi 'ixaheritsixi mepɨtewa'aitɨakai. 5 Hikɨ Tsanitsuni Timinatitsie kaneyani yupaapama wahamatɨa. Kaxie ma'iteɨritsie me'aye'axɨaku Timinati miemetsie, yapauka maye temaikɨ ha'atɨ Tsanitsuni kananukunake. 6 Peru Yawé 'iyarieya yutɨrɨkarima Tsanitsunitsie kaninuani, mɨkɨ yumamakɨ kanimieni xewitɨ muxa nunutsi mumieni hepaɨ. Mɨkɨ pɨkatiwarutaxatɨa yupaapa yumaama kemɨranayetɨa. 7 Hikɨ kaneyani 'uka hamatɨa katinetixata minakekai.
8 Mɨixa tukari 'anukayaku, kepauka makunua 'itiwitɨnike, huniuyune huyeta 'ixeiyake maye mɨmɨki, hetsiena xietexi kaniwaruxeiya meta mehayemakame. 9 Yumamakɨ xiete yapaɨmeme wayetuka 'ikwaiximetɨ kaniumiekaitɨni. Kepauka yupaapama mɨwaranuku'axixɨ kaniwarumini, mɨkɨta mekanitikwani, katiwaraxaxatɨwatɨ kename maye kaxarita heyetukai,
10 Hikɨ paapaya 'uka hetsɨa kananuyani. Mana Tsanitsuni 'ixɨarari kaniuwewieni, temari kememɨte'uhukai. 11 Kepauka piritsiteutsixi memixei, xeitewiyari heimana tamamata temari mekaniyetuirieni memiteɨtanikɨ.
12 Tsanitsuni mɨpaɨ katiniwarutahɨawe:
―Tsipara xekapɨtehetimani titatihɨkɨ. Xɨka xetehetimani, 'atahuta tukari kemɨreutetere 'ikɨ 'ixɨarari, ne nepɨxeyetuirieni xeitewiyari heimana tamamata rinu kamixayari meta xeitewiyari heimana tamamata kamixate 'ixɨararipa mieme. 13 Peru xɨka xekaheitimani, xeme pɨta xepɨnetsiyetuirieni xeitewiyari heimana tamamata rinu kamixayari meta xeitewiyari heimana tamamata kamixate 'ixɨararipa mieme.
Mɨkɨ mɨpaɨ mekatenita'eiya:
―Ketaneutaxatɨa, tame tekanita'enanakakuni.
14 Hikɨ mɨpaɨ katiniwarutahɨawe:
«Mɨtiyukwa'atsie 'ikwai pɨrane,
mɨtɨrɨkaɨyetsie rakakatɨ pɨrane».
Haika tukari kananukayani, mepɨkaheitima ketɨtɨ manuyɨnekai. 15 Naurieka tukaritsie 'ɨyaya mɨpaɨ mekateniutahɨawe: «'Akɨna keneuti'iwawiya mɨmatitaxatɨanikɨ 'ekɨta pemɨtatitaxatɨanikɨ, yamɨpaɨ pepɨkatiuyuri, tame temenitataiyakuni meta 'apaapa niwemama yunaime. Xeme xetate'inie xeikɨa xetatenawairiekutɨ».
16 Hikɨ Tsanitsuni 'ɨyaya 'utatsuatɨ hetsiena kaniuweni, mɨpaɨ katinitahɨawe:
―Pepɨnetsixani'erie. Yurikɨ pepɨkanetsinaki'erie. Niuki pemɨwarutaxatɨa nekie kiekatari memeitimanikɨ, peru ne pepɨkanetsitaxatɨawe kehepaɨtɨtɨ manuyɨne.
Mɨkɨ mɨpaɨ kaniutayɨni:
―Nepaapamatɨtɨ mɨpaɨ nepɨkatiwarahɨawe, titayari 'ekɨ nemaraxaxatɨwani.
17 Peru mɨkɨ kaniutitsuani 'atahuta tukari kemɨreuterixɨ 'ixɨarari, 'imatɨrieka tukari, Tsanitsuni yakatinitahɨawe, mɨkɨ waɨriyarika yamɨtikɨhɨawekaikɨ. Peru mɨkɨ muyɨ yukie kiekatari katiniwarutaxatɨani kehepaɨ manuyɨnekai.
18 Tau kahakayuniwekaku 'imatɨrieka tukari mana kiekatari mɨpaɨ mekatenitahɨawe:
«¿Tita matsi waɨkawa rakaka xiete kemɨrakaka?
¿Tita matsi waɨkawa titɨrɨkaɨye kemɨtitɨrɨkaɨye maye?»
Tsanitsuni mɨpaɨ katiniwarutahɨawe:
«Xɨka newakaxi 'ɨimari xeka'utikwietsanatsitɨiyake,
xepɨkaheitimanikekai kenemɨtixe'uxatɨa».
19 Hikɨ Yawé 'iyarieya mɨtɨrɨkaɨye Tsanitsuni hetsie kaninuani, hikɨ mɨkɨ kaneyani 'Atsikaruni mana xeitewiyari heimana tamamata wateɨterima kaniwarukwini, katiniwarunawairieni wapiinite, wakamixate katiniwarupitɨani memɨtehetima. Hikɨ, ha'atɨ, kaninuani yupaapa kie. 20 Hikɨ Tsanitsuni 'ɨyaya kaniyetuiyani xeime hetsɨa, kepauka 'ixɨarari mɨwewiekai hamatɨana muyeikakai hetsɨa.