1 Heiwa xeitukaritsie Tsanitsuni Kahatsa kiekariyaritsie kananuyani, mana 'ukaratsi tuminikɨ muyumayɨinɨa kaniuxeiya. Hikɨ kiitana kaneutahani hamatɨana manuhunikɨ. 2 Kahatsa kiekatari mɨpaɨ mekateniutahɨawarieni: «Tsanitsuni 'ena puyeika». 'Ayumieme mekanaketɨkɨne, tɨkarikɨ mekanihupiekaitɨni kiekari kitenie. Kayuwatɨ mekaniumakaitɨni mɨpaɨ me'utiyuatɨ: «Kahekɨareyu tekanimiekuni».

3 Peru Tsanitsuni muwa kanayekateitɨni tɨkari hixɨapa xeikɨa, 'ana kananukukeni, kiekari 'itupariyari kaneu'una, naime kɨyexi hutatu mɨkawetɨkatei 'ɨarime meta meukukerɨwa naime. Yunaiparie heitimaka nei'ɨni hɨritsie paitɨ Hewuruni kiekariyari hɨxie mukatsie paitɨ.

4 Mɨixa tukari 'anukayaku, Tsanitsuni xeime 'ukaratsi kaniutihiwe'erieni, mayeweritsie Tsureki kiekame, Rarira titewakame. 5 Piritsiteutsixi wa'ukiyarima hetsɨana mekananukɨne mɨpaɨ mekatenitahɨawe: «Witsiketineutixatɨa, mɨmatitaxatɨanikɨ titayari kwinimieme titɨrɨkaɨye kehepaɨ tetehe'iwa, tepihɨanikeyu tepɨte'ita'aitɨanikeyu. Tame teyuxexuitɨ tematsiku'ɨitɨaxɨani xeimiriyari heimana xeitsienituyari pɨrata tuminiyari».

6 Rarira Tsanitsuni mɨpaɨ katiniutahɨawe:

―Kenetineutaxatɨa titayari kwinimieme petitɨrɨkaɨye, kehepaɨ matsi'uyurieyu pɨmatsi'uhɨani pɨmatiuta'aitɨani.

7 Tsanitsuni mɨpaɨ kaniutayɨni:

―Xɨka netsi'uhɨani 'atahuta tupi kaunariyari hehekwamekɨ, 'ana nekanitaweranaxɨamɨkɨ xeime tewi hepaɨ nekaniyɨmɨkɨ mɨkatɨrɨkaɨye.

8 Piritsiteutsixi wa'ukiyarima mekani'atɨirieni 'atahuta tupi kaunariyari hehekwame, Rarira kanihɨani kɨmana. 9 Hipatɨ me'ita'awie'ixɨariekaku kiita, mɨkɨ mɨpaɨ katinihiwieni:

―Tsanitsuni, mana piritsiteutsixi.

'Ana mɨkɨ kaunari mɨhehekwa kanakatekixɨani, xewitɨ kaunari tsipɨanime makateke hepaɨ. Mɨpaɨ 'akuxi pɨka'uhekɨarixɨ titayari kwinimieme mɨtitɨrɨkaɨyekai.

10 Rarira Tsanitsuni mɨpaɨ katiniutahɨawe:

―Pepɨnetiu'itai. Yakɨ peputayɨ. Xeiya, kenetineutaxatɨa kematiuhɨani.

11 Mɨkɨ mɨpaɨ kaniutayɨni:

―Maixa kaunariyari hehekwamekɨ xɨka netsi'uhɨani, nepɨtaweranaxɨani xeime tewi mɨkatɨrɨkaɨye hepaɨ nepɨyɨni.

12 Hipatɨ piritsiteutsixi 'awie me'ixeiyakaku kiita, Rarira maixa kaunariyari hehekwame 'utihurieka kanihɨani, hikɨ mɨpaɨ katinihiwieni:

―Tsanitsuni, mana piritsiteutsixi.

Peru mɨkɨ maixa kaunariyari kanakatekixɨani mihɨakai mamateyatsie, xeime hiru makateke hepaɨ.

13 Hikɨ Rarira Tsanitsuni mɨpaɨ katiniutahɨawe:

―Hikɨtatsiere pepɨnetiu'itai, yakɨ peputayɨ. Kenetineutaxatɨa kematiuhɨani.

Mɨkɨ mɨpaɨ kaniutayɨni:

―Xɨka 'atahutame nekɨpate pe'utitsani 'ixuriki mɨharuani nɨtɨkaimekɨ, mɨkɨ mɨtsatɨkatsie 'iyehatɨame xɨka netsi'akuwieni, mɨpaɨ nepɨtaweranaxɨani tewi mɨkatɨrɨkaɨye hepaɨ nepɨyɨni.

Hikɨ kepauka Tsanitsuni mukutsukai, Rarira 'atahuta kɨpateya tsaiyatɨkaime kaniutiwewieni 'ixuriki nutɨkaime kaniutitsani 14 titse'imekɨ kanekuwieni kɨyetsie.

Tawarita mɨkɨ kanitahiwieni: «Tsanitsuni, mana piritsiteutsixi 'ahetsie». Tsanitsuni kepauka manutanierixɨ hetsiena makuwiekai naitɨ 'ixurikimatɨ kanewatihune kɨyetsie.

15 Hikɨ mɨkɨ mɨpaɨ katinitahɨawe: «Pepɨkanetsinaki'erie, yurikɨ pepɨkanetixatɨamɨkɨ. Hairiekari pepɨnetiu'itai, pepɨkanetitaxatɨawe titayari kwinimieme pemɨtitɨrɨkaɨye».

16 Yaxeikɨa tikɨhɨawetɨ mɨixa tukari puyuri, yuniukikɨ kwinimieme katinihiweritɨakaitɨni kaneumɨmɨkɨkaitɨniri. 17 'Imatɨrieka tinaime katinitaxatɨani. Mɨpaɨ katinitahɨawe: «Ne nepɨkakaxiriewe, natsareyu nekanihɨkɨtɨni, nemupatsie Kakaɨyari hetsiemieme nekatinuiwawetɨ. Xɨka netsi'ukaxini, nekatɨrɨkaɨyetɨ nekanayeimɨkɨ, xeime tewi hepaɨ ne'anetɨ nekanayeimɨkɨ».

18 Rarira retimaika kename yuri titaxatɨa, piritsiteutsixi wa'ukiyarima kaniwarutakwewieni, mɨpaɨ katiniwarutahɨawe: «Tawarita xekenahu, mɨkɨ naime kanetiniutaxatɨani». Hikɨ piritsiteutsixi wa'ukiyarima mekaniu'axɨani hetsɨana, pɨrata me'a'ɨtɨ memixatɨakai. 19 Yutunutsie 'itimu'utsitɨakaku kaneukuni, 'anari xeime tewi kaniuta'inieni 'atahuta kɨpaya mɨtsarietɨka maxixɨanikɨ. Mɨpaɨ katina'iwarieni. Tɨrɨkariyaya kaneyani.

20 Hikɨ kanitahiwieni: «Tsanitsuni mana piritsiteutsixi».

Tsanitsuni 'anutaniereka mɨpaɨ katiniu'erieni: «Nepɨneta'unata hikɨ, nepɨwatawikweiya». 'Atsipɨkatimaikai kename Yawé 'iku'eiriekai.

21 Hikɨ piritsiteutsixi mekaniwiya, hɨxiteya mekanayetɨkɨ mekaneihana Kahatsa paitɨ. Mekaniwiwitɨani wurunitse kaunariyarikɨ, katsariyanata mekanitɨxitsitɨakaitɨni. 22 Peru kepauka 'amemɨte'ikaxi kɨpateya, yapauka hutarieka kaniwawerekaitɨni.

23 Piritsiteutsixi wa'ukiyarima mekaniuyukuxeɨrieni 'ixɨarari mewewienike meta mawari me'iwewirienike yukakaɨyari Rakuni, mɨpaɨ me'utiyuatɨ:

24 Kepauka yunaitɨ teɨteri memixei yukakaɨyari mekaniutanɨawa, mɨpaɨ me'utiyuatɨ:

25 Kepaukari waɨkawa memuyutemamawiekai, mɨpaɨ mekateniuhiwa: «Tsanitsuni xekenewayehani 'etsiwa mɨtatsitinanaitɨanikɨ». Hikɨ Tsanitsuni katsariyanata mekaniwayehana, waɨkawa mekaninanaimakaitɨni.

Kepauka tuki mutuikatɨka 'aurie memitake, 26 Tsanitsuni temaikɨ mihaximekai mɨpaɨ katiniutahɨawe: «Kenenanuhani tuki mutuikatɨka mati'utsie mana nemɨrawiyanikɨ». 27 'Ana mekanihɨnekaitɨni 'ukitsi meta 'ukarawetsixi tukita, yunaitɨ piritsiteutsixi wa'ukiyarima muwa mekanayetekaitɨni, 'amautitewatsie mekanayetekaitɨni haika miriyari 'ukitsi 'ukari temawierika mewewietɨ Tsanitsuni 'aurie. 28 Hikɨ Tsanitsuni Yawé kaniutahɨawe karima: «Kenenaye'eri Kakaɨyari, waɨkawa nepɨmatsiwawirie, tawarita 'aixɨa keneneyurieka, xeimieme xeikɨa, tawarita xeimieme xeikɨa keneneupitɨa nemɨtiwakuhɨwirienikɨ piritsiteutsixi nehɨxite memayetɨkixɨkɨ». 29 Hikɨ Tsanitsuni tuki mutuikatɨka hutame kaniuwiyaxɨani mana katinawiyakaitɨni, yutseriekɨ xeime yu'utakɨta xeime. 30 Hikɨ mɨpaɨ katiniuhiwa: «Neke'umɨni piritsiteutsixi wahamatɨa». 'Ana kaneitaimaxɨani naime kemɨtitɨrɨkaɨye, tuki kananuka'une piritsiteutsixi wa'ukiyarima waheima meta yunaime wahetsie muwa memayetekai. Yuwaɨkawame matsi 'ana kaniwarukwini Tsanitsuni mɨximetɨ, keyuri meripaitɨ mɨwarukwikai 'uyeikatɨ.

31 'Iwamama meta maremama mekanekɨne meheikweiyuka. Meheikweka mekaneikateuku Tsura meta 'Etsitahuri reuhixɨapatsie, paapaya Manuhani manukateitsie. Tsanitsuni 'ixaheritsixi katiniwaruta'aitɨakaitɨni xeitewiyari wiyari.