15
1 Yawé mɨpaɨ kanetiniutahɨawe: «Tsepa Muitsexi meta Tsamuheri nehɨxie memɨteti'ui, ne nepɨkawarutinenimayatawe 'ikɨ teɨteri. Hikɨ keniwaranunɨ'a nehɨxie memɨka'u'uwanikɨ. Mekeheuhuni. 2 Xɨka mɨpaɨ memateha'iwawiyani: “¿Hakewa kuta tepeyehu?”, mɨpaɨ ketiniwarayemari'itɨa mɨpaɨ ne Yawé nemainekɨ:
»“Kemɨ'anetsɨ memɨkwinikɨ memɨ'ayumiemete, meke'ukwini,
kemɨ'ane 'ixiparakɨ memɨkwinikɨ memɨ'ayumiemete, 'ixiparakɨ meke'ukwini,
haakakɨ memɨkwinikɨ memɨ'ayumiemete, haakakɨ meke'ukwini,
kemɨ'ane memanuhapanienikɨ memɨ'ayumiemete mekehehapanieni”.
3 »Ne neniwaranunɨ'airiemɨkɨ naukame 'uximatɨarika —Yawé mɨpaɨ kanaineni—: 'ixipara mɨtiyumemiwa, tsɨikɨri memɨwatahapaxɨanikɨ, wirɨkɨxi memɨwatitutsenikɨ meta yeutari naimeri memɨwatikwanikɨ. 4 Te'aitamete yunaitɨ kwiepa memɨtama memɨmamakakɨ nekatiniyurimɨkɨ, Manatsexi 'Etsekiyaxi nu'aya, Kura kwieyaritsie ti'aitame, kemɨtiuyurikɨ Kerutsareme.
5 «¿Kemɨ'ane pɨmetsitinenimayata, Kerutsareme?
¿Kemɨ'ane 'ahetsiemieme pɨtatsuani?
¿Kemɨ'ane puyuwaɨriya mɨta'iwaunikɨ kepemɨreu'erie?»
6 Yawé mɨpaɨ kanaineni:
«'Ekɨ pepɨnetsi'uku'eiri, 'a'utɨa pepetɨa.
Nemamá 'ahetsie nekanitatseramɨkɨ
nekamenika'unamɨkɨ,
nepu'uxeri nematsinenimayatɨ.
7 Kiekari kitenie
nekameneuyewiwimɨkɨ nakitsaraɨkɨ.
'Ekɨ 'aniwema 'ukitsi yunaime nekameninawairiemɨkɨ,
neteɨterima yunaime nekaniwaka'unamɨkɨ,
'axameteyurietɨ memɨkate'uhayewaxɨkɨ.
8 Xiekari haramara mɨtika reuyeta hepaɨ meyupaɨmeme
nekaniwarayeitɨamɨkɨ xewiuraxi,
tuka yemekɨ tiyuka'uname nepanunɨ'ani
temari wamaamama wahepaɨtsita.
Yapauka wahetsie nekatinipitɨamɨkɨ
'uximatɨarika meta hiwerika.
9 Kaniku'amɨweni kemɨ'ane 'atahutame yuniwema 'ukitsi mɨwarayexeiyakai,
ka'u'iwetɨ payeika.
Tsepa mutuka pukɨ'iyɨriwa,
'ukaratsi yutewiyatɨ payeika yemekɨ.
Kemɨ'ane memɨyuhayewa nepuwayetuani memɨkwi'iwakɨ
memɨwaraye'unie wahɨxie»,
Yawé mɨpaɨ kanaineni.
10 Xɨa'ui nehetsie, nemaama,
pemɨnetsi'utiniwexɨ
niuki nemɨxɨatɨakakɨ meta nemɨnemienenikɨ
naime 'ikɨ kwieyaritsie wahepaɨtsita.
Ne xeime nepɨkatiniɨtɨawe meta nepɨkanetaniɨwe,
peru yunaitɨ 'axamepɨnetekumamateke.
11 Yawé mɨpaɨ kaniutayɨni:
«Ne yurikɨ nekamenixɨnamɨkɨ 'aixɨa mɨti'anenikɨ,
yanepɨtiyurieni 'aneɨkixiwi metsitawawirienikɨ pemiparewienikɨ
'uximatɨarikatsata kememɨtekwine.
12 »¿Kamɨtsɨ tiyɨwe tewi tepɨa makamura,
tepɨa tayeta mieme meta wurunitse?
13 'Axapemɨtiuyurikɨ nekatiniyetuamɨkɨ
xepiinite mɨraye'atɨka, tixaɨtɨ nekatiwautɨ,
tita waɨkawa pemɨrexeiya meta piinite mɨraye'atɨka,
naime 'ikɨ 'akwietsie.
14 'Aneɨkixiwima pemɨtiwata'uximayatsirienikɨ yanekatiniyurimɨkɨ
xeime kwieyaritsie pemɨka'imatetsie,
nehaxɨatsie tai kaniutani xehetsie
kaneutanerɨkwawani».
15 Yawé, 'ekɨ pepɨtimate.
Kenena'eriwani, kenene'ɨwiyani.
Memɨnetsi'uweiya ketiniwarakapitɨa.
Wahepaɨtsita kepemɨtiukanewiekɨ,
pepɨkanetsipitɨaka nemɨka'unarienikɨ,
'ahetsiemieme neuxei nepɨtiuka'eniwa.
16 Kepauka 'aniuki nemukaxexeiyakai,
ne nepitikwa'akai,
mɨkɨ pɨnetemawierikatɨkai
meta ne'iyari pɨtemawierikayatɨkai,
kepemɨtitewakɨ nehetsie nematsihexeiyakɨ,
Yawé, Kakaɨyari Naimekɨmɨtɨrɨkaɨye.
17 Ne 'ixɨararitsata memɨ'iyamatɨka nepɨkawatinɨiwe,
meta wahamatɨa nepɨkanetitemawiwe 'akuxi,
nexaɨtame nepuyeika, nehamatɨa pemuyeikakɨ
meta pekaneniuyehaxɨatɨani wahepaɨtsita.
18 ¿Titayari katihayewawe nekukuiniya?
¿Titayari katiyu'uayemarinɨa nekukuiniya?
¿Titayari katiyumɨkɨ?
¿Nehetsiemieme yakɨ haa manukatsukwaka
pepɨhɨkɨtɨni haixa mɨkawani?
19 'Ayumieme Yawé mɨpaɨ kanaineni:
«Xɨka petiuhayewa,
ne nepumatsi'anukuhana 'anata pepɨnetsi'ayexeiyani.
Xɨka petiuhayewa yakɨ petikuxatatɨ,
xɨka yurikɨ xeikɨa petikuxatani yemekɨ meuyewetsekɨ,
neniukame 'ekɨ pepayani.
Mɨkɨ 'ahetsɨa meke'u'axɨani,
peru 'ekɨ wahetsɨa pepɨkaheyeikani.
20 Ne yanekatiniyurimɨkɨ 'ikɨ teɨteri wahetsiemieme
wurunitse mukawe mɨkaha'iwarie hepaɨ pemɨ'anenikɨ,
mepɨmatsitamieni,
peru mepɨkamatsiha'iwa,
ne 'ahamatɨa nemuyeikakɨ
nemetsitawikweitsitɨanike meta nemɨmatsixɨnakɨ
—Yawé mɨpaɨ kanaineni—.
21 Nepɨmatsixɨna 'axamemɨte'u'iyari wahetsie,
nepɨmatsitawikweitsitɨani memayu'eririya waxɨtetetsie».