18
'Iwewame niukiyari
1 'Ikɨ Yawé niukieya kanihɨkɨtɨni Keremiyaxi hetsɨa munua: 2 «Kenemie hikɨ kwitɨwa 'iwewame kiita, muwa nekametinetaxatɨamɨkɨ».
3 Hikɨ nekaneyani 'iwewame kiita, nekaneitaxeiya ti'uximayakame tixikɨraɨyemetsie. 4 Hikɨ xari muwewiekai 'axakaniuyɨni mamayatsie, tawarita xeime xari kaniutawewieni, kepaukake 'aixɨa 'aneme mayeitɨani.
5 'Ana Yawé niukieya nehetsɨa kaninuani mɨpaɨ kanetiniutahɨawe: 6 «Teɨteri 'Ixaheritsixi, ¿kamɨtsɨ nekatiyɨwe xehetsie mɨpaɨ nemɨtiuyurieni 'iwewame kemɨtiuyuri haxukɨ? —Yawé mɨpaɨ kanaineni—. Xeme teɨteri 'ixaheritsixi, haxu 'iwewame yumamatsie kemɨratu'u, mɨpaɨta xeme xepɨ'ane nemamatsie. 7 Mɨpaɨ nemɨtiuxata nepɨyɨwe nemuwarahunakɨ, nemuwaratixɨrienikɨ meta nemuwarakumaweriyakɨ xeime nuiwari yatɨni xewitɨ mɨra'aitatsie, 8 peru xɨka mɨkɨ nuiwari tiuhayewa 'axatiyurienetɨ, neta nepɨtihayewa kenemɨti'uximatɨanikekai meta kenemɨtiunehɨawekai hepaɨtsitana. 9 Mɨpaɨta neputayɨwe xeime nuiwari nemɨkamanikɨ meta nemikayenikɨ yatɨni xewitɨ mɨra'aitatsie. 10 Peru xɨka nehɨxie mɨkɨ nuiwari 'axatiuyurieni xɨka kanetsiheu'enieka, nekatinihayewamɨkɨ ke'aixɨa nemɨtiu'eriekai hetsiena mieme. 11 Hikɨta ketiniwarutaxatɨa Kura kiekatari meta Kerutsareme, mɨpaɨ ketiniwarayehɨtɨa Yawé mɨpaɨ kanaineni: “Nekaniha'aritɨaka 'uximatɨarika xehetsiemieme nekaniwewieka kehepaɨ nemɨtiyurieni xehepaɨtsita. Huye 'axamɨ'ane xekeneuhayewa, xeketenehɨwa, 'aixɨa xekeneyuyuri pɨta ke'axaxemɨte'u'uwakaikɨ meta ke'axaxemɨteyuriekaikɨ”. 12 Mɨkɨ mɨpaɨ mekanitiyuakuni: “Yakɨ xeikɨa peputaine. Ketemɨteku'eriwa yatepɨteyurieka, meta teyuxexuitɨ 'axatepɨteyurieka ta'iyari 'axamɨ'ane kemɨtatikɨhɨawe”».
13 'Ayumieme Yawé mɨpaɨ kanaineni:
«Xekeneuta'iwau hipame nuiwarite watsata:
¿Hakewa xewitɨ mɨpaɨ pɨre'enaxɨ?
'Ixaheri 'ɨimari
yemekɨ 'axa'anemekɨ pɨtiuyuri.
14 ¿Kamɨtsɨ 'ɨwi Riwanu hɨriyaritsie
'ai 'amanutitɨtɨtsie titipapare?
¿Kamɨtsɨ haa mɨhaɨtɨ hɨritsie
makaneika tiukawauke?
15 Peru neuxei, neteɨterima mepɨnetsihatɨmai,
hipame kakaɨyarixi tixaɨtɨ memɨkateyunaki'erie 'ɨkwa mepuwatairietɨwe.
Yuhuyeta mepekaxɨri,
huye meripaitɨ mieme 'utɨa,
hipame huyetsie memu'uwanikɨ
meta muka'uyeyɨkɨtsie.
16 Mɨya meyɨatɨ yukwie yuxaɨtame mekaniuku'eirieni,
tixaɨtɨ tiyuriyarɨwame menayeitɨani.
Kemɨ'ane mana muyeyani
yumu'u kaniyuitɨamɨkɨ matɨ.
17 'Eka tau manatineika matineika hepaɨ,
nekanixetaxɨriexɨamɨkɨ mɨxe'aye'unie hɨxie.
Kepauka xemu'uximatɨariekatsie
nekanawaritamɨkɨ nepɨkahaniere».
18 Teɨteri mɨpaɨ mekaniutiyuani: «Xekeneuyukuxeɨri tepɨtetixata Keremiyaxi hepaɨtsita. 'Inɨari niukiyari pɨkaheuyeweka mawari wewiwame hetsie, 'ɨxatsi mɨtimaiwe hetsie pɨkaheuyeweka tɨma meta niuki Kakaɨyari niukameya hetsie pɨkaheuyeweka. Niukikɨ tepeye'atɨirieni, tsepa kemaine yatepɨkateyurieni».
19 Yawé, keneneu'eni kwerietɨ.
Keniwaru'eni kemɨ'ane nehetsie memɨtehahɨpa.
20 ¿Kamɨtsɨ 'aixɨa mɨti'ane 'axamɨ'anekɨ tiyupitɨaritɨre?
Mɨkɨri putsu mekaniwati'inieni muwa nemeukawenikɨ.
Ne matsi nematsi'utahɨawixɨ
wahetsiemieme nemɨtaniunikɨ,
'ahaxɨa wahetsie mɨkatinakenikɨ.
21 'Ayumieme waniwema 'ukitsi keniwayetua haakakɨ memɨkwinikɨ,
keniwaruku'eiri 'ixiparakɨ memɨkwi'iyanikɨ.
Wa'ɨitama wiuraxi meke'akɨne meta yuniwema 'ukitsi mekawarexeiyatɨ,
wakɨnama meke'ukwi'iwa,
waniwema temari mekehekwi'iwa
'ixiparakɨ meheyukwitɨwetɨ.
22 Hiwari kehewaku'eiyani wakiita paitɨ,
kepauka 'atsimekateha'eriwakaku pemɨwaranɨ'ani wahetsɨa
yɨmɨireme tenawayamete.
Mekaniuti'ineri muwa nemeukawenikɨ,
meta winiyari nehɨxie mekaniuwɨtɨaxɨani.
23 Yawé, peru 'ekɨ pepɨrakumate
naime kememɨteku'eriwa kememɨnetemieni.
Ke'axamemɨteyurie pepɨkatiwareuyehɨwirieka,
meta ke'axamemɨte'uyuri pepɨkahekuyeitɨwani 'ahɨxie.
'Ahɨxie meke'ukaxɨriyani.
Kepauka wahekɨ pemɨha'a 'ana keniwaraye'atɨiri.