20
Keremiyaxi Patsuxi matɨa
1 Kepauka mawari wewiwame Patsuxi 'Imexi nu'aya, Yawé tukieya mɨhɨritɨarie mexɨakame mɨhɨkɨtɨkai, mu'enaxɨ Keremiyaxi kemɨtikuxatakai, 2 'ana katiniuta'aita Keremiyaxi Kakaɨyari niukameya mukuweiyaxɨanikɨ meta Wenikamini kitenieyari 'amautitewatsie kɨyexi hanuyexaxawametsie memeiye'ɨkatsitɨanikɨ, Yawé tukieya manuwe hɨxie. 3 'Uxa'arieka, kepauka Patsuxi kɨyexi mayunexaxawatsie mixɨnaxɨ, Keremiyaxi mɨpaɨ katinitahɨawe: «Yawé Patsuxi pɨkamatiterɨwari, matsi pɨta “Marika naitsarie” pepɨtitewaka. 4 Mɨpaɨtsɨ Yawé kanaineni: “Marika 'ahetsie nekani'atɨamɨkɨ meta 'ahamikuma wahetsie, mɨkɨ memɨwaraye'unie mekaniwakwikuni, 'ekɨtɨtɨ pekaniwaxeiyamɨkɨ. Kura kiekatari yunaime nekaniwayetuamɨkɨ Wawiruniyatsie ti'aitame hetsɨa, Wawiruniya paitɨ mekananuhapaniekuni, yatɨni 'ixiparakɨ pɨxekwini. 5 Metatsiere, memɨxe'aye'unie nekaniwayetuiriemɨkɨ naime tita waɨkawa xemɨteheuxeiya 'ikɨ kiekariyaritsie, naime tita xemɨte'ukaxei xete'uximayatɨ meta waɨkawa mɨraye'atɨka, meta Kura kwieyaritsie te'aitamete tita piinite mɨraye'atɨka memɨtehexeiyakai, memɨtewanawatsirienikɨ meta memɨtehanutɨnikɨ Wawiruniya paitɨ. 6 'Ekɨta Patsuxi pekananuhaniemɨkɨ Wawiruniya paitɨ meta yunaitɨ 'atɨɨriyama. Mana pekanemɨmɨkɨ, mana pekanekateukiemɨkɨ yunaitɨ 'ahamikuma wahamatɨa kemɨ'ane yakɨ xeikɨa pemɨtiwakuxaxatɨwakai”».
Keremiyaxi kemɨtiuyu'uximatɨa
7 Yawé, pepɨnetsi'ukwamanaxɨ 'aniuki witsi'anemekɨ,
neta nepɨmatsi'anu'eni.
'Ekɨ matsi waɨkawa pepɨtɨrɨkaɨyekai,
pepɨnetsi'a'iwaxɨ.
Yunaitɨ teɨteri mepɨnetsinanaima,
yamepɨnete'atse tukarikɨ.
8 Kepauka nemutaniuka, mɨpaɨ nepɨtiuhiwa:
«Nanaimarika 'ukanamieniri».
'Ayumieme Yawé niukieyakɨ
neyuriyarietɨ nepayeika
meta nenanaimarietɨ.
9 Xɨka mɨpaɨ ne'utayɨni: «Tawari nepɨka'enuku'erieni,
tawariri hetsiena mieme nepɨkatitaxata»,
hikɨ niukieya netaɨta
tai hepaɨ 'anetɨ kanayeikani
ne'umeyari 'ɨarime kanititaiyani.
Nepɨtikuwaune nemɨtinewienikɨ,
peru nepɨkayɨwe netinewienike.
10 Yɨmɨireme nepɨwa'enie menetsinanaimatɨ mɨpaɨ meputiyuane:
«Naitsarie marika puxuawe».
Hipatɨta mɨpaɨ mekaniutiyuaneni: «Xekeneutaxaneta.
Hikɨmɨtɨka tepitaxaneta».
Nehamikutsixitɨtɨ
yamekatena'eriwani nemekawenikɨ.
Meta mɨpaɨ mekaniutiyuaneni: «Tepiwiniya.
'Anake tekane'iwakuni
tekatenekapitɨakuni».
11 Peru Yawé nehamatɨa kaniuyeikani
yumemiwame kwinimieme mɨtiyɨwe hepaɨ,
'ayumieme memɨnetsi'uweiya
mekana'iwariekuni mekapɨyɨwekaxɨani,
yamepɨkateyurieni mekaniyutitetewiyakuni.
Ke'axamemɨ'itɨarieni
hatsuaku pɨkahatɨmaiyarieni.
12 Yawé Naimekɨpemɨtɨrɨkaɨye, 'ekɨ
'aixɨa mɨtiuka'iyari pemɨmate,
tewi kemɨtiyu'iyaritɨa kemɨtiku'eriwa pemi'enie,
keneneuxeitsitɨa kepemɨtiwarakapitɨani,
'ahetsɨari nekaniwayetuani kememɨnetsiyurie.
13 Yawé xekenenɨawani kwikarikɨ.
Mɨkɨ tixaɨtɨ memɨkateheuxeiya kaniwawikweitsitɨaka
'axamemɨte'u'iyari mewaruweiyakaku.
14 'Axake'itɨarieka 'iya tukari nematinuiwaxɨtsie.
'Axake'itɨarieka 'iya tukari kepauka nemaama mɨnetsi'ayexeitsie.
15 'Axake'itɨarieka 'iya tewi nepaapa mutemawieritɨa
kepauka mɨpaɨ mɨtitahɨawixɨ: «'Ukitɨme pekanayexeiya».
16 Yawé kiekarite kemɨtiuka'unaxɨ kawareunenimayatɨ
mɨpaɨ ke'u'itɨarieni mɨkɨ tewi.
Hiwarika ximeri ke'enieka
meta tuka mɨrayukwine hiwariyari.
17 ¿Ketitayari nemaama yuriepana paitɨ Kakaɨyari
kanetiupitɨa nemɨmɨnikɨ?
Mɨpaɨ mɨkɨ neteukiya payanikekai,
ne 'ana nepɨkatinuiwakekai hetsiena.
18 ¿Ketitayari nemaama yuriepana neranuyetɨa
'uximatɨarika xeikɨa nemɨxeiyakɨ meta hiwerika,
meta nemɨmɨnikɨ tewiyarika tsata?