22
Te'aitamete 'axamemɨte'u'iyari wahepaɨtsita
1 Yawé mɨpaɨ kanaineni: «Kenemie Kura kwieyaritsie ti'aitame kie, muwa 'ikɨ niuki kenetaxata: 2 “'Ekɨ, Kura kwieyaritsie ti'aitame, Rawiri 'uwenieyatsie pemaka, 'aparewiwamete meta 'ateɨterima, 'ikɨ kitenieyaritsie memeutahake, Yawé niukieya xekeneu'eni. 3 Mɨpaɨ kanaineni Yawé: ‘Yaxeketeneyurieka kemɨtiheitserie meta kehepaɨ 'aixɨa mɨ'ane. Munawarie xekeneɨxɨna minanaima tɨrɨkariyaya mamayatsie. 'Ateewa kiekame 'axaxepɨkayurieka xepɨka'inanaimaka, meta nutui, meta wiura, metatsiere xeime xepɨkakumemiwani 'atsikatiyurieneme 'ikɨ kwieyaritsie. 4 Xɨka yemekɨ 'ikɨ niuki xehaye'atɨani, hikɨ 'ana 'ikɨ paratsiyu kitenie mekaneutahaxɨakuni te'aitamete Rawiri 'uwenieya hetsie memayaxe, kaxetatetsie me'utetɨ meta kawayutsixi wahetsie, yuparewiwamete mewarawitɨtɨ meta yuteɨterima. 5 Peru 'ikɨ niuki xɨka xekahaye'atɨani, ne mɨpaɨ nekanaineni 'ikɨ paratsiyu 'uniyari kwinienetɨ kanikemɨkɨ. Ne Yawé, mɨpaɨ nekanaineni’ ”».
6 Karikɨ Yawé mɨpaɨ kanaineni 'ikɨ paratsiyu Kura mieme hepaɨtsita:
«'Ekɨ nekɨmana, Karaha hepaɨ pekani'aneni
meta Riwanu wiyeyari hepaɨ,
peru ne mɨpaɨ nekanaineni makumawe nekamanayeitɨamɨkɨ,
kiekarite ka'akukiepayatɨkaime.
7 'Ahetsɨa te'unamete nekamaneutanɨ'airiemɨkɨ,
yu'ɨrɨ me'ɨ'ɨkame yuxexuitɨ,
'akariuxa memawitexɨanikɨ witsimɨtitemari
meta taipa mekaneixɨrikuni.
8 »Teɨteri waɨkawamexɨa kiekatari 'ena mekaniuyekɨnikuni, hikɨ mɨpaɨ mekateniyuta'iwawiyakuni: “¿Titayari Yawé 'ikɨ kiekari mumariwe mɨyatiuyuri?” 9 Mɨpaɨta mekatenita'eiyariekuni: “Yawé yukakaɨyari tɨratuya memuku'eirikɨ, hipame kakaɨyarixi pɨta mewarayexeiyatɨ meta metewa'uximayatsirietɨ memakɨkɨ”».
10 Xepɨka'utitsuanani mumɨ hepaɨtsita,
meta xepɨkayuhiwerieka hetsiena mieme.
Xekeneutitsuanani matsi mehanie hetsiemieme,
hatsuaku mɨkanuani hepaɨtsita
meta tawariri yukwie mɨkaxeiyakɨ matinuiwaxɨtsie.
11 Yawé mɨpaɨ kanaineni Tsaruni hetsiemieme Kutsiyaxi nu'aya, Kura kwieyaritsie ti'aitame, yupaapa 'utɨa manukake Kutsiyaxi, mehanie 'ateewa: «Tawari mɨkanuani, 12 matsi kanemɨmɨkɨ hakewa mehanie. 'Ikɨ kwieyari tawariri pɨkaxeiya.
13 »Xɨa'ui nepaine yukii mɨwewiene hepaɨtsita
meta heimana menawewiwa
tiyukananaimatɨ meta heitserie katiyurienetɨ.
Xɨa'ui nepaine yuhepaɨ tewi waɨriyarika mɨti'aitɨa hetsiemieme
yakɨxeikɨa mɨti'uximayatsitɨa,
mɨti'uximayakɨ mɨkatipitɨa.
14 Xɨa'ui nepaine mɨpaɨ mutaine hetsiemieme: “Kii nekanitawewimɨkɨ waɨkawa mariweme,
wapaitɨ 'a'uyeyeyeume”.
'Ituparite 'etsimayeyeutsie neniereme 'aheuyeyeume mepeuyepiexɨa,
herie kariuxa kɨyeyari kamaneme meta xetamekɨ kawiriyariekame.
15 »¿Kamɨtsɨ peti'aitametɨni
kariuxakɨ waɨkawamekɨ mɨya petiuyurieka?
'Apaapa pɨkatikwakai xeikɨa pɨkati'iekai xeikɨa,
matsi heitserie yapɨtiyurienekai meta tita mɨti'aixɨa,
'ayumieme 'aixɨa 'iyari puyeikakai.
16 Kemɨ'ane tixaɨtɨ mɨkarexeiya puparewiekai meta kemɨ'ane mɨreuyehɨwa,
'ayumieme 'aixɨa 'iyari puyeikakai.
¿Mɨpaɨ kati'ane kemɨ'ane mɨnetsimate?
—Yawé mɨpaɨ kanaineni—.
17 »Peru 'ahɨxite meta 'a'iyari
'iwarika 'axamɨti'ane xeikɨa pukuwautɨwe,
mepɨtekuwautɨwe xeikɨa 'atsimemɨkate'u'iyari waxuriya memɨtayeurienikɨ
meta waɨriyarika memɨte'aitanikɨ meta nanaimarikakɨ».
18 'Ayumieme mɨpaɨ kanaineni Yawé Kura kwieyaritsie ti'aitame hepaɨtsita Kuhatsimi Kutsiyaxi nu'aya:
«Xewitɨtɨma hetsiena mieme pɨkatatsuani meta mɨpaɨ pɨkatihiwa:
“Xɨa'ui ne'iwatɨkai 'uki. Xɨa'ui ne'iwatɨkai 'uka”.
Xewitɨ pɨkayukahiwerieni hetsiena mieme meta mɨpaɨ pɨkatihiwa:
“Xɨa'ui, tati'aitɨwametɨkai. Xɨa'ui, mumariwekai”.
19 Puxu hepaɨ katineteukiemɨkɨ,
Kananuyehaniemɨkɨ kanehɨiyamɨkɨ,
Kerutsareme kitenieyaritetsie 'ateewa paitɨ».
20 «Riwanu hɨriyaritsie keneutiyaka karima keneutahiwa,
meta Watsani hetsie.
'Awarini hetsie paitɨ keneutahiwani,
yunaitɨ 'atuxexerima memukwi'iwaxɨkɨ.
21 Ne nepɨmatsi'utahɨawixɨ kepauka 'aixɨa 'iyari pemuyeikakaitsie,
peru 'ekɨ mɨpaɨ peputayɨ: “Ne nepɨkamatsi'enieni”.
'Ɨimariyari paitɨtɨ mɨyapepɨtiuka'iyari:
hatsuaku pepɨkanetsihanu'eniwe.
22 Yunaime muxatsi wahɨwemete 'eka kaniwaranu'enitsitɨamɨkɨ,
meta xetuxexerima 'ateewa mekananuhapaniekuni.
Xeme 'axaxemɨte'uyurikɨ
hikɨ xepuyutitetewiya tixaɨtɨ xepɨkatehayeitɨarieni.
23 'Ekɨ Riwanu tsata pemayeka,
kariuxatsata 'a'itɨa pemutawewi,
kepetitsuani kepauka 'akukuiniya munuani,
niweyame kukuiniyaya hepaɨ».
24 Yawé mɨpaɨ kanaineni: «Ne yurikɨ nemayeyuri mɨpaɨ nekanaineni, tsepa Kekuniyaxi Kuhatsimi nu'aya, Kura kwieyaritsie ti'aitame, nemamá tserieta hanira hepaɨ mɨ'ane, mana nekanenutixɨnamɨkɨ. 25 Ne nekamaniyetuamɨkɨ memɨmatsimieku wahetsɨa meta waɨkawa pemɨwamakaxe wahetsɨa, tatsɨari Nawukurunutsuxi hetsɨa, Wawiruniyatsie ti'aitame, meta wawiruniyutsixi wahetsɨa. 26 'Ekɨ meta 'amaama mɨmatsi'utiniwexɨ xeime kwieyaritsie nekameneutahɨamɨkɨ xemɨkahatinunuiwaxɨtsie, meta mana xekanekwikuni. 27 Hatsuakuri xepɨka'axɨani yukwietsie xeme'eriwanitsie».
28 Kekuniyaxi xari mɨkaheuyehɨiya mɨtari pɨhɨkɨ,
xewitɨ mɨka'iheiwe'erie.
¿Titayari xeime kwieyaritsie reutahɨiya mɨkɨ meta yunaitɨ nuiwaritemama,
xeime kwieyaritsie memɨka'imatetsie?
29 Kwie, kwie, kwie.
Yawé niukieya keneu'eni.
30 Yawé mɨpaɨ kanaineni: «'Ikɨ tewi xekenaka'utɨa
tewi mɨka'utinuari hepaɨ,
tewi 'aixɨa mɨkatiyetɨa hepaɨ.
Karikɨ nixewitɨ xiɨyarieyatɨtɨ
Rawiri 'uwenieyatsie pɨkatita'aita,
meta hatsuaku pɨkatita'aita Kura kwieyaritsie».